ഡോളറിനെതിരെ രൂപയുടെ മൂല്യത്തിൽ റെക്കോഡ് തകർച്ച; രൂപയുടെ മൂല്യം 96.90 നിലവാരത്തിലേക്ക് താഴ്ന്നു

ഡോളറിനെതിരെ രൂപയുടെ മൂല്യത്തിൽ റെക്കോഡ് തകർച്ച. ബുധനാഴ്ച രാവിലത്തെ വ്യാപാരത്തിനിടെ മൂല്യം 96.90 നിലവാരത്തിലേക്ക് താഴ്ന്നു. രൂപ റെക്കോഡ് ഇടിവ് നേരിടുന്ന പശ്ചാത്തലത്തിൽ ഇറക്കുമതിക്ക് കർശന നിയന്ത്രണം ഏർപ്പെടുത്തിയേക്കും. ആഭ്യന്തര ഉത്പാദനം പ്രോത്സാഹിപ്പിക്കുക, രൂപയെ ശക്തിപ്പെടുത്തുക, വ്യാപാര കമ്മി കുറയ്ക്കുക എന്നിവയക്കാകും പ്രാധാന്യം നൽകുക.

രൂപയുടെ മൂല്യമിടിവും പ്രതിസന്ധിയും യുഎസ് ഡോളറിനെതിരെ രൂപയുടെ മൂല്യം റെക്കോഡ് താഴ്ചയായ 96.90 നിലവാരത്തിൽ എത്തി. ഇറാൻ യുദ്ധം ആരംഭിച്ച ഫെബ്രുവരി മുതൽ രൂപയുടെ മൂല്യത്തിൽ ഇതുവരെ ആറ് ശതമാനം ഇടിവുണ്ടായി. വ്യാപാര കമ്മി ഏപ്രിൽ മാസത്തിലെ വ്യാപാര കമ്മി 28.4 ബില്യൺ ഡോളറായി ഉയർന്നു. മാർച്ചിൽ ഇത് 20.7 ബില്യൺ ഡോളറായിരുന്നു. ഇറക്കുമതിക്കുള്ള ചെലവ് വർധിച്ചതും കയറ്റുമതിയിലെ കുറവുമാണ് കാരണം. 

ആഗോള ഘടകങ്ങൾ

അമേരിക്ക-ഇറാൻ പ്രതിസന്ധി മൂലം ആഗോളതലത്തിൽ പണപ്പെരുപ്പം ഉയരുമെന്ന ഭീതി നിലനിൽക്കുന്നു. ബ്രെന്റ് ക്രൂഡ് ഓയിൽ വിലയിൽ 50 ശതമാനത്തിലധികം വർധന രേഖപ്പെടുത്തി. വിദേശ നിക്ഷേപകർ ഫെബ്രുവരി മുതൽ 22 ബില്യൺ ഡോളർ മൂല്യമുള്ള ഓഹരികളും കടപ്പത്രങ്ങളും ഇന്ത്യയിൽനിന്ന് പിൻവലിച്ചു.

സർക്കാർ ഇടപെടൽ ധനമന്ത്രാലയം, വാണിജ്യ മന്ത്രാലയം എന്നിവയുടെ പ്രതിനിധികൾ സാഹചര്യം വിലയിരുത്താൻ അടുത്തയാഴ്ച യോഗം ചേരും. 

പ്രധാനമായും താഴെ പറയുന്ന നടപടികളാണ് പരിഗണനയിലുള്ളത്: 

ഇറക്കുമതി നിയന്ത്രണം ഇറക്കുമതിയെ ആശ്രയിക്കേണ്ടാത്തതും ആഭ്യന്തരമായി ഉത്പാദിപ്പിക്കാൻ കഴിയുന്നതുമായ സാധനങ്ങളുടെ പട്ടിക തയ്യാറാക്കാൻ മന്ത്രാലയങ്ങളോട് ആവശ്യപ്പെട്ടിട്ടുണ്ട്. ഇത്തരം സാധനങ്ങൾക്ക് ഉയർന്ന ഇറക്കുമതി തീരുവ ഏർപ്പെടുത്തിയേക്കും. 

വിതരണ ശൃംഖലയെ ബാധിക്കാത്ത രീതിയിലുള്ള നിയന്ത്രണങ്ങൾ കൊണ്ടുവരും. സ്വർണ ഇറക്കുമതി കുറയ്ക്കാൻ ഇതിനകം തന്നെ തീരുവ കൂട്ടുകയും നിയന്ത്രണങ്ങൾ ഏർപ്പെടുത്തുകയും ചെയ്തിട്ടുണ്ട്. ആഭ്യന്തര ഉത്പാദനത്തിന് മുൻഗണന 'ഇന്ത്യയിൽ നിർമിക്കാൻ കഴിയുന്ന ഉത്പന്നങ്ങൾ വിദേശത്തുനിന്ന് കൊണ്ടുവരുന്നത് ഒഴിവാക്കണം' എന്ന് കേന്ദ്ര വാണിജ്യ മന്ത്രി പീയൂഷ് ഗോയൽ ഇറക്കുമതിക്കാർക്ക് നിർദേശം നൽകിയിട്ടുണ്ട്. കുറഞ്ഞ വിലയിൽ ഇറക്കുമതി ചെയ്യുന്ന ഗുണനിലവാരമില്ലാത്ത ഉത്പന്നങ്ങൾ നിയന്ത്രിക്കുന്നതിലൂടെ പ്രാദേശിക വ്യവസായങ്ങൾക്ക് കൂടുതൽ അവസരങ്ങൾ നൽകുകയാണ് സർക്കാർ ലക്ഷ്യം. രാജ്യത്തിന്റെ സാമ്പത്തിക സ്ഥിതിയെ പ്രതികൂലമായി ബാധിക്കുന്ന ഘടകങ്ങളെ പ്രതിരോധിക്കാൻ കൃത്യമായ കണക്കുകൂട്ടലുകളോടെയുള്ള നടപടികളാണ് സർക്കാർ ആസൂത്രണം ചെയ്യുന്നത്. വിതരണ ശൃംഖലയിലെ തടസ്സം ഉത്പാദന മേഖലയെ ബാധിക്കാതെ ഇറക്കുമതി ബിൽ കുറയ്ക്കുക എന്നതാണ് സർക്കാരിന് മുന്നിലുള്ള വെല്ലുവിളി.