മുരിങ്ങ ഇനി 'അത്ഭുത വൃക്ഷം' മാത്രമല്ല; കുടിവെള്ളത്തിലെ മൈക്രോപ്ലാസ്റ്റിക് നീക്കം ചെയ്യാൻ കഴിയുമെന്ന് പുതിയ പഠനം, മറ്റ്ഗുണങ്ങളറിയാം,

 കോട്ടയം: നമ്മുടെ പറമ്പുകളില്‍ സാധാരണയായി കണ്ടുവരുന്ന മുരിങ്ങ മരത്തെ ഇനി 'അത്ഭുത വൃക്ഷം' എന്ന് വിളിക്കുന്നത് അതിന്റെ പോഷകഗുണങ്ങള്‍ കൊണ്ട് മാത്രമല്ല.

കുടിവെള്ളത്തിലെ വലിയ ഭീഷണിയായ മൈക്രോപ്ലാസ്റ്റിക്കുകളെ 98.5% വരെ നീക്കം ചെയ്യാൻ മുരിങ്ങ വിത്തുകള്‍ക്ക് കഴിയുമെന്ന് ബ്രസീലിലെയും യുണൈറ്റഡ് കിംഗ്ഡത്തിലെയും ശാസ്ത്രജ്ഞർ കണ്ടെത്തിയിരിക്കുന്നു. ഏപ്രിലില്‍ പ്രസിദ്ധീകരിച്ച ഈ പഠനമനുസരിച്ച്‌, മുരിങ്ങ വിത്തിലെ സത്തിന് വെള്ളത്തിലെ ചെറിയ പ്ലാസ്റ്റിക് കണികകളെ ഒരുമിച്ച്‌ പറ്റിപ്പിടിച്ച്‌ പുറംതള്ളാനുള്ള സവിശേഷമായ കഴിവുണ്ട്. സഹസ്രാബ്ദങ്ങള്‍ക്ക് മുമ്പ് തന്നെ ഈജിപ്തുകാരും റോമാക്കാരും വെള്ളം ശുദ്ധീകരിക്കാൻ മുരിങ്ങ ഉപയോഗിച്ചിരുന്നതിന്റെ തെളിവുകള്‍ നിലവിലുണ്ട്.

ഇന്നത്തെ കാലത്ത് ലോകമെമ്പാടുമുള്ള പൈപ്പ് വെള്ളത്തില്‍ 83 ശതമാനത്തോളം മൈക്രോപ്ലാസ്റ്റിക് മലിനീകരണം ഉണ്ടെന്നാണ് കണക്കുകള്‍ സൂചിപ്പിക്കുന്നത്. നമ്മുടെ രക്തത്തിലും ഹൃദയത്തിലും തലച്ചോറിലും വരെ പ്ലാസ്റ്റിക് കണികകള്‍ എത്തുന്നത് വലിയ ആരോഗ്യപ്രശ്നങ്ങള്‍ക്ക് കാരണമാകുന്നു. 

നിലവില്‍ ജലശുദ്ധീകരണത്തിനായി ഉപയോഗിക്കുന്ന അലുമിനിയം സള്‍ഫേറ്റ് (ആലം) പോലുള്ള രാസവസ്തുക്കള്‍ പരിസ്ഥിതിക്കും മനുഷ്യശരീരത്തിനും ദോഷകരമായേക്കാം. എന്നാല്‍ മുരിങ്ങ വിത്ത് തികച്ചും ജൈവികമായതിനാല്‍ യാതൊരുവിധ വിഷാംശങ്ങളും അവശേഷിപ്പിക്കുന്നില്ല എന്നതാണ് ഇതിന്റെ ഏറ്റവും വലിയ പ്രത്യേകത.

ഒരു മുരിങ്ങ വിത്ത് കൊണ്ട് ഏകദേശം 10 ലിറ്റർ വെള്ളം ശുദ്ധീകരിക്കാൻ സാധിക്കും. വലിയ നഗരങ്ങളിലെ വാട്ടർ പ്ലാന്റുകളില്‍ ഇത് പ്രയോഗിക്കാൻ കൂടുതല്‍ വിത്തുകള്‍ ആവശ്യമായി വരുമെങ്കിലും, ചെറിയ സമൂഹങ്ങള്‍ക്കും രാസവസ്തുക്കള്‍ ലഭ്യമാകാത്ത ഇടങ്ങള്‍ക്കും ഇത് ഏറ്റവും മികച്ച സുസ്ഥിരമായ പരിഹാരമാണ്.

നാനോപ്ലാസ്റ്റിക്കുകള്‍ ഉള്‍പ്പെടെയുള്ള മറ്റ് പ്ലാസ്റ്റിക് മലിനീകരണങ്ങളിലും മുരിങ്ങ വിത്ത് ഫലപ്രദമാണോ എന്നതിനെക്കുറിച്ച്‌ കൂടുതല്‍ ഗവേഷണങ്ങള്‍ നടന്നുവരികയാണ്. പ്ലാസ്റ്റിക് മലിനീകരണം രൂക്ഷമാകുന്ന വരും പതിറ്റാണ്ടുകളില്‍ മുരിങ്ങ വിത്തുകള്‍ ജലശുദ്ധീകരണ രംഗത്ത് വിപ്ലവകരമായ മാറ്റങ്ങള്‍ കൊണ്ടുവരുമെന്നാണ് പ്രതീക്ഷിക്കുന്നത്.