ആശുപത്രിയില്‍ ചികിത്സയിലായിരുന്ന ഭര്‍ത്താവിന് കൂട്ടിരിക്കെ ഭാര്യ മരിച്ചു, അപ്രതീക്ഷിത മരണത്തില്‍ തകര്‍ന്ന് കുടുംബം

കൊച്ചി: പെരുമ്പാവൂരില്‍ ചികിത്സയില്‍ കഴിയുന്ന ഭർത്താവിന് ആശുപത്രിയില്‍ കൂട്ടിരിക്കെ ഭാര്യ ഹൃദയാഘാതത്തെ തുടർന്ന് മരിച്ചു. പാണംകുഴി മറ്റമന എമിലി ജെയിംസ് (68) ആണ് മരിച്ചത്.

ഒരാഴ്‌ചയായി ആലുവ രാജഗിരി ആശുപത്രിയില്‍ ചികിത്സയിലായിരുന്ന ഭർത്താവ് ജയിംസ് തോമസിനൊപ്പം ആശുപത്രിയില്‍ കൂട്ടിരിക്കെയാണ് എമിലിക്ക് ദേഹാസ്വാസ്ഥ്യം അനുഭവപ്പെട്ടത്. കഴിഞ്ഞ ദിവസം വൈകുന്നേരമാണ് സംഭവം. ഉടൻ ചികിത്സ നല്‍കിയെങ്കിലും ജീവൻ രക്ഷിക്കാനായില്ല. ജയിംസ് തോമസ് ക്രാരിയേലി സെന്റ് മേരീസ് ഹൈസ്കൂളില്‍ നിന്നും വിരമിച്ച അധ്യാപകനാണ്. പാണംകുഴിയിലെ വീട്ടിനോട് ചേർന്ന് ഇരുവരും ഹോംസ്റ്റേ നടത്തി വരികയായിരുന്നു.

ദിവ്യ, ബേസില്‍ ജെയിംസ് എന്നിവരാണ് മക്കള്‍. മരുമക്കള്‍: ദീപക് (ഇടവിളായില്‍, പോത്താനിക്കാട്), ജീവ മറിയം സണ്ണി (മാടപ്പമ്പില്‍, മഴുവന്നൂർ). സംസ്കാരം വ്യാഴാഴ്ച രാവിലെ 11 മണിക്ക് വീട്ടിലെ ശുശ്രൂഷകള്‍ക്ക് ശേഷം ക്രാരിയേലി മർത്തമറിയം യാക്കോബായ സുറിയാനി പള്ളി സെമിത്തേരിയില്‍ നടക്കും.