ബംഗാളിലെ ജനശക്തിക്ക് മുന്നിൽ ഞാൻ തലകുനിക്കുന്നു”; ജനക്കൂട്ടത്തിന് മുന്നിൽ നിലംതൊട്ട് വണങ്ങി മോദി

കൊൽക്കത്ത: "ബംഗാളിലെ ജനശക്തിക്ക് മുന്നിൽ ഞാൻ തലകുനിക്കുന്നു” ജനക്കൂട്ടത്തിന് മുന്നിൽ നിലംതൊട്ട് വണങ്ങി മോദി

പശ്ചിമ ബംഗാളിലെ ആദ്യ ബിജെപി സർക്കാർ അധികാരത്തിലേറുന്ന ചരിത്ര മുഹൂർത്തത്തിന് സാക്ഷ്യം വഹിക്കാൻ കൊൽക്കത്തയിലെത്തിയ പ്രധാനമന്ത്രി നരേന്ദ്ര മോദി ജനക്കൂട്ടത്തിന് മുന്നിൽ നിലംതൊട്ട് വണങ്ങി. ബ്രിഗേഡ് പരേഡ് ഗ്രൗണ്ടിൽ നടന്ന ചടങ്ങിൽ സുവേന്ദു അധികാരി ബംഗാളിന്റെ ഒൻപതാമത് മുഖ്യമന്ത്രിയായി സത്യപ്രതിജ്ഞ ചെയ്തതിന് പിന്നാലെയായിരുന്നു പ്രധാനമന്ത്രിയുടെ ഈ വൈകാരിക പ്രകടനം.

വേദിയിലെത്തിയ പ്രധാനമന്ത്രി സദസ്സിലുണ്ടായിരുന്ന ആയിരക്കണക്കിന് വരുന്ന ജനങ്ങളെ പൂർണ്ണമായി കുമ്പിട്ട് അഭിവാദ്യം ചെയ്യുകയായിരുന്നു. “ബംഗാളിലെ ജനശക്തിക്ക് മുന്നിൽ ഞാൻ തലകുനിക്കുന്നു. ജനാധിപത്യത്തിന്റെ യഥാർത്ഥ കരുത്ത് ജനങ്ങളുടെ അനുഗ്രഹമാണ്,” എന്ന് അദ്ദേഹം പിന്നീട് എക്സിൽ കുറിച്ചു. ചരിത്രപരമായ വിജയത്തിന് ശേഷം അധികാരമേൽക്കുന്ന പുതിയ സർക്കാരിന് ജനങ്ങൾ നൽകിയ പിന്തുണയ്ക്കുള്ള നന്ദി പ്രകടനമായിരുന്നു ഇത്.

കേന്ദ്രമന്ത്രിമാരായ അമിത് ഷാ, രാജ്നാഥ് സിംഗ്, ജെ.പി. നദ്ദ എന്നിവരും വിവിധ ബിജെപി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരും ഈ ബൃഹത്തായ ചടങ്ങിന് സാക്ഷ്യം വഹിക്കാൻ എത്തിയിരുന്നു. അഴിമതിക്കും കുടുംബ ഭരണത്തിനുമെതിരായ ബംഗാൾ ജനത നൽകിയ വലിയ അംഗീകാരമായാണ് ബിജെപി ഈ വിജയത്തെ കാണുന്നത്. 

സുവേന്ദു അധികാരിയുടെ നേതൃത്വത്തിലുള്ള പുതിയ സർക്കാർ ഓരോ ബംഗാളിക്കാരനും വേണ്ടിയുള്ളതായിരിക്കുമെന്ന് അമിത് ഷായും പ്രതികരിച്ചു. പ്രധാനമന്ത്രി ജനങ്ങളെ വണങ്ങുന്ന വീഡിയോ ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു