വയോധികയെ വീടിനുള്ളില്‍ മരിച്ച നിലയില്‍ കണ്ടെത്തി; കൊലപാതകമെന്ന് സംശയം,,യുവാവിനെ കേന്ദ്രീകരിച്ച് അന്വേഷണം,

തിരുവനന്തപുരം: വയോധികയെ വീടിനുള്ളില്‍ മരിച്ച നിലയില്‍ കണ്ടെത്തി. വെഞ്ഞാറമൂട്ടില്‍ ആണ് സംഭവം. വെള്ളുമണ്ണടി കൂട്ടുമുഖം സ്വദേശി 79 വയസ്സുള്ള സീതമ്മയെയാണ് മരിച്ച നിലയില്‍ കണ്ടെത്തിയത്.

സീതമ്മ ഒറ്റയ്ക്കാണ് താമസിച്ചിരുന്നത്. രാവിലെ വീട്ടില്‍ തൊഴിലാളികള്‍ എത്തിയപ്പോള്‍ മുൻവശത്തെ വാതില്‍ തുറന്നു കിടന്ന നിലയിലായിരുന്നു. തൊഴിലാളികള്‍ അകത്തുകയറി നോക്കിയപ്പോഴാണ് സീതമ്മയെ മരിച്ച നിലയില്‍ കാണുന്നത്. ഉടൻ തന്നെ മകനെ വിവരം അറിയിക്കുകയായിരുന്നു.

അതേസമയം പൊലീസ് നടത്തിയ പരിശോധനയില്‍ മുറിക്കുള്ളില്‍ പിടിവലി നടന്നതിന്റെ സൂചനകള്‍ കണ്ടെത്തി. മരണം കൊലപാതകം എന്ന പ്രാഥമിക നിഗമനത്തിലാണ് പൊലീസ്. കഴിഞ്ഞദിവസം സീതമ്മയുടെ വീട്ടിലെത്തിയ യുവാവിനെ കേന്ദ്രീകരിച്ചാണ് അന്വേഷണം നടക്കുന്നത്.