വിജയകരമായ മുന്നേറ്റം: ഭൂമിയുടെ മനോഹാരിത ഒപ്പിയെടുത്ത് ആര്‍ട്ടെമിസ് 2 സംഘം; ചന്ദ്രനിലേക്കുള്ള യാത്രയില്‍ ആദ്യ ചിത്രങ്ങള്‍ പുറത്ത്, ദൗത്യത്തിന്റെ നിലവിലെ അവസ്ഥ ഇങ്ങനെ.

വാഷിങ്ടൺ: ഭൂമിയില്‍ നിന്ന് വിക്ഷേപിച്ച്‌ ഒന്നര ദിവസത്തിന് ശേഷം ശനിയാഴ്ച ആണ് ദൗത്യ സംഘം പകർത്തിയ ഭൂമിയുടെ മനോഹരമായ ചിത്രങ്ങള്‍ നാസ പങ്കുവെച്ചത്.

നീല ഗ്രഹത്തിന്റെ തിളക്കവും വെളുത്ത മേഘക്കൂട്ടങ്ങളും സമുദ്രങ്ങളും വ്യക്തമായി കാണാവുന്ന ചിത്രങ്ങളാണ് ഇവ. ദൗത്യത്തിന്റെ കമാൻഡർ റീഡ് വൈസ്മാൻ പകർത്തിയ ചിത്രങ്ങളില്‍ ഒറിയോണ്‍ ക്യാപ്‌സ്യൂളിന്റെ ജനാലയിലൂടെ ഭൂമിയുടെ ഒരു ഭാഗം കാണാം. മറ്റൊരു ചിത്രത്തില്‍ ഭൂമി പൂർണ്ണരൂപത്തില്‍ ദൃശ്യമാണ്. ഭൂമിയിലെ വടക്കൻ പ്രകാശമായ ‘ഓറോറ’യുടെ (Aurora) പച്ചനിറത്തിലുള്ള തിളക്കവും ചിത്രത്തില്‍ കാണാമെന്ന് നാസ അറിയിച്ചു.

“ഈ ചിത്രത്തിലുള്ള നാല് സുഹൃത്തുക്കള്‍ ഒഴികെ ബാക്കിയെല്ലാ മനുഷ്യരും ഈ ഒരു ഫ്രെയിമിലുണ്ട് എന്നത് ചിന്തിക്കുമ്പോള്‍ അത്ഭുതം തോന്നുന്നു,” എന്നാണ് നാസയുടെ എക്സ്പ്ലോറേഷൻ സിസ്റ്റംസ് നേതാവ് ലാകിഷ ഹോക്കിൻസ് പറഞ്ഞത്.

ദൗത്യത്തിന്റെ നിലവിലെ അവസ്ഥ

ശനിയാഴ്ച പുലർച്ചെയുള്ള കണക്കനുസരിച്ച്‌, സംഘം ഭൂമിയില്‍ നിന്ന് ഏകദേശം 1,80,000 കിലോമീറ്റർ അകലെയാണ്. ഇനി 2,40,000 കിലോമീറ്റർ കൂടി സഞ്ചരിച്ചാല്‍ ചന്ദ്രന്റെ ഭ്രമണപഥത്തില്‍ എത്തും.

തിങ്കളാഴ്ചയോടെ സംഘം ചന്ദ്രന്റെ സമീപത്തെത്തുമെന്നാണ് പ്രതീക്ഷിക്കുന്നത്. മൂന്ന് അമേരിക്കക്കാരും ഒരു കാനഡക്കാരനുമടങ്ങുന്ന സംഘം ചന്ദ്രനെ ചുറ്റി യു-ടേണ്‍ എടുത്ത് തിരികെ ഭൂമിയിലേക്ക് മടങ്ങും.

1972-ലെ അപ്പോളോ 17 ദൗത്യത്തിന് ശേഷം ചന്ദ്രനിലേക്ക് യാത്ര ചെയ്യുന്ന ആദ്യ സംഘമാണിത്. വ്യാഴാഴ്ച രാത്രി ഒറിയോണിന്റെ പ്രധാന എഞ്ചിൻ ജ്വലിപ്പിച്ചതോടെയാണ് ചന്ദ്രനിലേക്കുള്ള കൃത്യമായ പാതയിലേക്ക് പേടകം പ്രവേശിച്ചത്. നിലവില്‍ ദൗത്യം വിജയകരമായി മുന്നേറുകയാണെന്ന് നാസ അറിയിച്ചു.