,അമിത ലാഭം മോഹിച്ച് 'പുള്ളിമുറി ചൂതാട്ടം: 10 പേര്‍ പിടിയില്‍, പിടിച്ചെടുത്തത് ആയിരകണക്കിന് രൂപ,

കുമ്പള : കാസർകോട് കുമ്പള കണ്ണൂർ ഗ്രാമത്തിലെ സിദ്ധിവയലില്‍ പരസ്യമായി പണം വെച്ച്‌ ചീട്ടുകളിച്ച പത്തംഗ സംഘത്തെ പൊലീസ് പിടികൂടി.

അയ്യപ്പ ഭജന മന്ദിരത്തിന് സമീപമുള്ള പൊതുസ്ഥലത്ത് നടത്തിയ റെയ്ഡിലാണ് സംഘം കുടുങ്ങിയത്. പ്രതികളില്‍ നിന്ന് 13,270 രൂപയും ചീട്ടുകളും പൊലീസ് പിടിച്ചെടുത്തു. അമിത ലാഭത്തിനായി 'പുള്ളിമുറി' എന്ന പേരില്‍ പണം പന്തയം വെച്ച്‌ ചീട്ടുകളിക്കുന്നതായി പൊലീസിന് ലഭിച്ച രഹസ്യ വിവരത്തെത്തുടർന്നായിരുന്നു പരിശോധന.

സംഭവസ്ഥലത്ത് വെച്ച്‌ തന്നെ 10 പ്രതികളെയും പൊലീസ് കസ്റ്റഡിയിലെടുത്തു. കേരള ഗെയിമിംഗ് ആക്‌ട് സെക്ഷൻ 15 പ്രകാരം കുമ്പള പൊലീസ് കേസ് രജിസ്റ്റർ ചെയ്തു. പിടിച്ചെടുത്ത പണവും മറ്റ് തൊണ്ടിമുതലുകളും കോടതിയില്‍ ഹാജരാക്കും. പ്രദേശത്ത് ഇത്തരം നിയമ വിരുദ്ധ പ്രവർത്തനങ്ങള്‍ തടയുന്നതിനായി പരിശോധന ശക്തമാക്കുമെന്ന് പൊലീസ് അറിയിച്ചു.