ചൊവ്വാഴ്ച നടക്കുന്ന ഇന്ത്യ–ഹോങ്കോംഗ് എ.എഫ്.സി ഏഷ്യൻ കപ്പ് യോഗ്യതാ മത്സരത്തോടനുബന്ധിച്ച് കൂടുതൽ സർവീസുകൾ പ്രഖ്യാപിച്ച് കൊച്ചി മെട്രോ;

കൊച്ചി: കൊച്ചി ജവഹർലാൽ നെഹ്റു ഇന്റർനാഷണൽ സ്റ്റേഡിയത്തിൽ ചൊവ്വാഴ്ച നടക്കുന്ന ഇന്ത്യ–ഹോങ്കോംഗ് എ.എഫ്.സി ഏഷ്യൻ കപ്പ് യോഗ്യതാ മത്സരത്തോടനുബന്ധിച്ച് കൊച്ചി മെട്രോ കൂടുതൽ സർവീസുകൾ പ്രഖ്യാപിച്ചു. 

അന്താരാഷ്ട്ര ഫുട്ബോൾ മത്സരത്തിന്റെ ആവേശത്തിലെത്തുന്ന ആയിരക്കണക്കിന് ആരാധകർക്ക് സുഗമമായ യാത്ര ഉറപ്പാക്കുകയാണ് ലക്ഷ്യം. യാത്രക്കാരുടെ തിരക്ക് കണക്കിലെടുത്ത് സാധാരണ സമയത്തേക്കാൾ കുറഞ്ഞ ഇടവേളകളിൽ കൂടുതൽ ട്രെയിനുകൾ ഓടിക്കാനാണ് മെട്രോ അധികൃതരുടെ തീരുമാനം.

മത്സരശേഷം ആരാധകർക്ക് മടങ്ങുന്നതിനായി വൈകിട്ട് 7 മണി മുതൽ ജെ.എൽ.എൻ സ്റ്റേഡിയം സ്റ്റേഷനിൽ നിന്ന് ആലുവയിലേക്കും തൃപ്പൂണിത്തുറയിലേക്കും നിശ്ചിത ഇടവേളകളിൽ പ്രത്യേക സർവീസുകൾ ഉണ്ടാകും. 

സ്റ്റേഡിയം മെട്രോ സ്റ്റേഷനിൽ തിരക്ക് നിയന്ത്രിക്കുന്നതിനായി പ്രത്യേക സുരക്ഷാ ക്രമീകരണങ്ങളും സജ്ജീകരണങ്ങളും ഏർപ്പെടുത്തിയിട്ടുണ്ട്. ടിക്കറ്റ് കൗണ്ടറുകളിലെ തിരക്ക് ഒഴിവാക്കാൻ ഡിജിറ്റൽ ടിക്കറ്റിംഗ് സംവിധാനങ്ങൾ ഉപയോഗപ്പെടുത്തണമെന്നും മെട്രോ അധികൃതർ അറിയിച്ചു.