സമാധാന ശ്രമങ്ങളുമായി പാകിസ്ഥാൻ സജീവമാകുന്നു; പാക് പ്രധാനമന്ത്രി ഷെഹ്ബാസ് ഷെരീഫ് ഇറാൻ പ്രസിഡന്റ് മസൂദ് പെസെഷ്കിയാനുമായി ഒരു മണിക്കൂർ ഫോണിൽ ചർച്ച നടത്തി

മിഡിൽ ഈസ്റ്റിൽ വർദ്ധിച്ചുവരുന്ന യുദ്ധഭീതിയ്ക്കിടയിൽ സമാധാന ശ്രമങ്ങളുമായി പാകിസ്ഥാൻ സജീവമാകുന്നു. സംഘർഷങ്ങൾ ലഘൂകരിക്കുന്നതിന്റെ ഭാഗമായി പാക് പ്രധാനമന്ത്രി ഷെഹ്ബാസ് ഷെരീഫ് ഇറാൻ പ്രസിഡന്റ് മസൂദ് പെസെഷ്കിയാനുമായി ഒരു മണിക്കൂർ നീണ്ട നിർണ്ണായകമായ ടെലിഫോൺ സംഭാഷണം നടത്തി. 

തുർക്കി, ഈജിപ്ത്, സൗദി അറേബ്യ എന്നീ രാജ്യങ്ങളിലെ വിദേശകാര്യ മന്ത്രിമാർ ഇസ്ലാമാബാദിൽ ഉച്ചകോടിക്കായി ഒത്തുചേരുന്നതിന് തൊട്ടുമുന്നേയായിരുന്നു ഈ ചർച്ച നടന്നതെന്ന് പാകിസ്ഥാൻ വിദേശകാര്യ മന്ത്രാലയം വ്യക്തമാക്കി.

ഇറാനുനേരെയുള്ള ഇസ്രയേൽ ആക്രമണങ്ങളെ ശക്തമായി അപലപിച്ച ഷെഹ്ബാസ് ഷെരീഫ്, ഈ പ്രതിസന്ധി ഘട്ടത്തിൽ പാകിസ്ഥാന്റെ പൂർണ്ണ പിന്തുണയും ഐക്യദാർഢ്യവും ഇറാനെ അറിയിച്ചു. 

മേഖലയിൽ സമാധാനം പുനഃസ്ഥാപിക്കുന്നതിനായി പാകിസ്ഥാൻ നടത്തിവരുന്ന നയതന്ത്ര ഇടപെടലുകളെക്കുറിച്ച് അദ്ദേഹം പെസെഷ്കിയാനോട് വിശദീകരിച്ചു. ചർച്ചകളിലൂടെയും മധ്യസ്ഥതയിലൂടെയും പ്രശ്നപരിഹാരം കണ്ടെത്താൻ പാകിസ്ഥാൻ മുൻകൈ എടുക്കുമെന്നും അദ്ദേഹം ഉറപ്പുനൽകി.

പാകിസ്ഥാന്റെ സമാധാന ശ്രമങ്ങളെ അഭിനന്ദിച്ച ഇറാൻ പ്രസിഡന്റ് മസൂദ് പെസെഷ്കിയാൻ, നയതന്ത്രപരമായ നീക്കങ്ങൾക്ക് വലിയ പ്രാധാന്യമുണ്ടെന്ന് വ്യക്തമാക്കി. എന്നാൽ ചർച്ചകൾക്കും മധ്യസ്ഥതയ്ക്കും വഴിതുറക്കുന്നതിന് രാജ്യങ്ങൾക്കിടയിൽ പരസ്പര വിശ്വാസം കെട്ടിപ്പടുക്കേണ്ടത് അത്യന്താപേക്ഷിതമാണെന്ന് അദ്ദേഹം ഓർമ്മിപ്പിച്ചു. മേഖലയിലെ പ്രമുഖ രാജ്യങ്ങൾ പങ്കെടുക്കുന്ന ഇസ്ലാമാബാദിലെ യോഗം വലിയ പ്രതീക്ഷയോടെയാണ് അന്താരാഷ്ട്ര സമൂഹം നോക്കിക്കാണുന്നത്. യുദ്ധം ഒഴിവാക്കാനും സമാധാനം ഉറപ്പാക്കാനും പാകിസ്ഥാൻ നടത്തുന്ന ഈ നീക്കങ്ങൾ ഇതിനോടകം തന്നെ ആഗോള ശ്രദ്ധ നേടിക്കഴിഞ്ഞു.