ഗാസിയാബാദ് കേന്ദ്രീകരിച്ച് വൻ ചാരശൃംഖല; തന്ത്രപ്രധാനമായ ഇടങ്ങളിലെ സിസിടിവി തത്സമയ ദൃശ്യങ്ങൾ പാകിസ്ഥാനിലേക്ക് എത്തിച്ച എട്ട് പേർ കൂടി അറസ്റ്റിൽ

ഉത്തർപ്രദേശ്: ഗാസിയാബാദ് കേന്ദ്രീകരിച്ച് പ്രവർത്തിച്ചിരുന്ന അതിർത്തി കടന്നുള്ള വൻ ചാരശൃംഖലയെ പോലീസ് തകർത്തു. രാജ്യസുരക്ഷയെ ബാധിക്കുന്ന ഗൂഢാലോചനയുമായി ബന്ധപ്പെട്ട് എട്ട് പേരെ കൂടി അറസ്റ്റ് ചെയ്തതോടെ ആകെ പിടിയിലായവരുടെ എണ്ണം 22 ആയി.

ശൃംഖലയുടെ മുഖ്യസൂത്രധാരന്മാരിൽ ഒരാളായ നൗഷാദ് അലിയെ ഫരീദാബാദിൽ നിന്നാണ് പോലീസ് പിടികൂടിയത്. ഒരു പെട്രോൾ പമ്പിന് സമീപം ടയർ പഞ്ചർ ഒട്ടിക്കുന്ന കടയുടെ മറവിലായിരുന്നു ഇയാൾ ഒളിവിൽ കഴിഞ്ഞിരുന്നത്.

സാങ്കേതിക വിദ്യയിൽ അറിവുള്ള യുവാക്കളെ ചാരപ്രവർത്തനത്തിനായി റിക്രൂട്ട് ചെയ്യുകയായിരുന്നു നൗഷാദ് അലിയുടെ പ്രധാന ചുമതല. മൊബൈൽ റിപ്പയറിംഗ്, സിസിടിവി ഇൻസ്റ്റാളേഷൻ തുടങ്ങിയ ജോലികളിൽ വൈദഗ്ധ്യമുള്ളവരെ കണ്ടെത്തി പണം നൽകി പ്രലോഭിപ്പിച്ചാണ് ഇയാൾ സംഘത്തിലേക്ക് എത്തിച്ചിരുന്നത്. 

സാമ്പത്തികമായി പിന്നോക്കം നിൽക്കുന്നവരെ ലക്ഷ്യം വച്ചുള്ള ഈ നീക്കത്തിൽ സംശയം ഒഴിവാക്കാൻ സ്ത്രീകളെയും സംഘത്തിൽ ഉൾപ്പെടുത്തിയിരുന്നു. മാർച്ച് 14-ന് ആറ് പേരെ അറസ്റ്റ് ചെയ്തതോടെയാണ് ഈ വൻ ഗൂഢാലോചനയുടെ വിവരങ്ങൾ പുറത്തുവന്നത്.

തന്ത്രപ്രധാനമായ ഇടങ്ങളിൽ സ്വന്തമായി സിസിടിവി ക്യാമറകൾ സ്ഥാപിച്ച് അതിന്റെ തത്സമയ ദൃശ്യങ്ങൾ പാകിസ്ഥാനിലേക്ക് എത്തിക്കുക എന്നതായിരുന്നു ഇവരുടെ പ്രധാന രീതി. ഡൽഹി കന്റോൺമെന്റ് റെയിൽവേ സ്റ്റേഷൻ ഉൾപ്പെടെയുള്ള സ്ഥലങ്ങളിൽ ഇത്തരത്തിൽ ക്യാമറകൾ സ്ഥാപിച്ചിരുന്നതായി അന്വേഷണസംഘം കണ്ടെത്തി. റെയിൽവേ സ്റ്റേഷനുകൾ, സൈനിക കേന്ദ്രങ്ങൾ എന്നിവയുടെ ചിത്രങ്ങളും വീഡിയോകളും മെസേജിംഗ് ആപ്പുകൾ വഴി അതിർത്തി കടത്തി അയച്ചിരുന്ന ഇവർക്ക് ഓരോ ദൃശ്യത്തിനും നിശ്ചിത തുക പ്രതിഫലമായി ലഭിച്ചിരുന്നു.

ഡൽഹി മുതൽ കാശ്മീർ വരെയുള്ള വിവിധയിടങ്ങളിലേക്ക് ഈ ശൃംഖല വ്യാപിപ്പിക്കാൻ ഇവർക്ക് പദ്ധതിയുണ്ടായിരുന്നു. ഒരു പോലീസ് കോൺസ്റ്റബിളിന് തോന്നിയ സംശയമാണ് രാജ്യത്തെ ഞെട്ടിച്ച ഈ വലിയ ചാരസംഘത്തെ വെളിച്ചത്തുകൊണ്ടുവന്നത്. പ്രതികളിൽ നിന്ന് പിടിച്ചെടുത്ത ലാപ്ടോപ്പുകൾ, മൊബൈൽ ഫോണുകൾ എന്നിവ ശാസ്ത്രീയ പരിശോധനയ്ക്കായി അയച്ചിട്ടുണ്ട്. കൂടുതൽ വിവരങ്ങൾ പുറത്തുകൊണ്ടുവരാൻ ഉന്നതതല അന്വേഷണം തുടരുകയാണ്.