മാന്തടം ആര്യങ്കാവ് ഭഗവതി ക്ഷേത്രത്തിൽ ദേശഗുരുതിയും നാട്ടുതാലവും ഭക്തിസാന്ദ്രമായി

 മാന്തടം: ആലങ്കോട് ആര്യങ്കാവ് ഭഗവതി ക്ഷേത്രത്തിൽ ഭക്തിനിർഭരമായ ചടങ്ങുകളോടെ ഈ വർഷത്തെ ദേശഗുരുതിയും നാട്ടുതാലവും നടന്നു. നാടിന്റെ ഐശ്വര്യത്തിനായുള്ള സവിശേഷ പൂജകളിലും ആഘോഷങ്ങളിലും പങ്കുചേരാൻ നൂറുകണക്കിന് ഭക്തജനങ്ങളാണ് ക്ഷേത്രസന്നിധിയിൽ എത്തിയത്.

ശബരിമല മുൻ മേൽശാന്തി തെക്കിനിയേടത്ത് കൃഷ്ണൻ നമ്പൂതിരിയുടെ മുഖ്യകാർമികത്വത്തിലാണ് ഇത്തവണത്തെ ഗുരുതി പൂജ നടന്നത്. ദീപാരാധനയ്ക്ക് ശേഷം നടന്ന ചുറ്റുവിളക്ക്, വർണ്ണാഭമായ എഴുന്നള്ളിപ്പ് എന്നിവ ചടങ്ങുകൾക്ക് മാറ്റ് കൂട്ടി. ക്ഷേത്രത്തിലെ നിത്യനിദാന പൂജകൾക്ക് മേൽശാന്തി അർജുനൻ തിരുമേനി നേതൃത്വം നൽകി.

ആഘോഷങ്ങളുടെ ഭാഗമായി തച്ചുപറമ്പിൽ നിന്നാരംഭിച്ച നാട്ടുതാലം ഭക്തിസാന്ദ്രമായ അനുഭവമായി മാറി. വാദ്യമേളങ്ങളുടെ അകമ്പടിയോടെ നടന്ന താലപ്പൊലിയിൽ സ്ത്രീകളും കുട്ടികളുമടക്കം നിരവധി വിശ്വാസികൾ പങ്കാളികളായി. നാടിന്റെ പാരമ്പര്യവും ഒരുമയും വിളിച്ചോതുന്ന ചടങ്ങുകളോടെയാണ് ഇത്തവണത്തെ ക്ഷേത്രാഘോഷങ്ങൾ പൂർത്തിയായത്.