ഫരീദാബാദ് സൂരജ്കുണ്ഡ് മേളയിൽ വൻ അപകടം: ഊഞ്ഞാൽ തകർന്നു വീണ് പോലീസ് ഇൻസ്‌പെക്ടർ മരിച്ചു; 13 പേർക്ക് പരിക്ക്

 ഫരീദാബാദ്: ഹരിയാനയിലെ പ്രശസ്തമായ സൂരജ്കുണ്ഡ് കരകൗശല മേളയ്ക്കിടെയുണ്ടായ ദാരുണമായ അപകടത്തിൽ പോലീസ് ഇൻസ്‌പെക്ടർ കൊല്ലപ്പെട്ടു.

മേളയിലെ പ്രധാന ആകർഷണമായ 'സുനാമി സ്വിംഗ്' തകർന്നു വീണാണ് അപകടമുണ്ടായത്. ഡ്യൂട്ടിയിലുണ്ടായിരുന്ന പോലീസ് ഇൻസ്‌പെക്ടർ ജഗദീഷ് പ്രസാദാണ് മരണപ്പെട്ടത്. അപകടത്തിൽ 13 പേർക്ക് പരിക്കേറ്റു. ശനിയാഴ്ച വൈകുന്നേരം 6:15-ഓടെയായിരുന്നു നാടിനെ നടുക്കിയ സംഭവം.

പൂർണ്ണ ശേഷിയിൽ പ്രവർത്തിച്ചുകൊണ്ടിരുന്ന ഊഞ്ഞാൽ പെട്ടെന്ന് നിയന്ത്രണം വിട്ട് താഴേക്ക് പതിക്കുകയായിരുന്നു. അപകടമുണ്ടായ ഉടൻ കുടുങ്ങിക്കിടക്കുന്നവരെ രക്ഷിക്കാനായി ഓടിയെത്തിയ ഇൻസ്‌പെക്ടർ ജഗദീഷ് പ്രസാദിന് മേൽ തകർന്ന യന്ത്രഭാഗങ്ങൾ പതിച്ചതാണ് മരണകാരണമായതെന്ന് ദൃക്‌സാക്ഷികൾ പറയുന്നു. പരിക്കേറ്റവരെ ഉടൻ തന്നെ അടുത്തുള്ള ആശുപത്രികളിൽ പ്രവേശിപ്പിച്ചു. അപകടത്തിന്റെ ഭീതിപ്പെടുത്തുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.

#Surajkund Mela Tragedy | Faridabad
A tsunami swing collapse at the Surajkund Fair claimed the life of Police Inspector Jagdish Prasad and injured 13 others. The officer died while rescuing visitors. CM Nayab Saini expressed grief and assured immediate medical aid and support. pic.twitter.com/bAjBwmhCF2

— Rareshares (@unnikutan77) February 8, 2026

സംഭവത്തിൽ ഹരിയാന മുഖ്യമന്ത്രി നായബ് സിംഗ് സൈനി അതിയായ ദുഃഖം രേഖപ്പെടുത്തി. ജീവൻ നഷ്ടപ്പെട്ട ഉദ്യോഗസ്ഥന്റെ കുടുംബത്തെ അനുശോചനം അറിയിച്ച മുഖ്യമന്ത്രി, പരിക്കേറ്റവർക്ക് അടിയന്തരവും മികച്ചതുമായ ചികിത്സ ഉറപ്പാക്കാൻ അധികൃതർക്ക് നിർദ്ദേശം നൽകി. ദുരിതബാധിതരായ കുടുംബങ്ങൾക്ക് ആവശ്യമായ എല്ലാ സഹായങ്ങളും സർക്കാർ നൽകുമെന്നും അദ്ദേഹം ഉറപ്പുനൽകി.

രാജ്യത്തെ ഏറ്റവും വലിയ സാംസ്കാരിക മേളകളിലൊന്നായ സൂരജ്കുണ്ഡ് മേളയിൽ ആയിരക്കണക്കിന് ആളുകളാണ് പ്രതിദിനം എത്താറുള്ളത്. ശനിയാഴ്ച വീശിയടിച്ച ശക്തമായ കാറ്റിൽ മേളയിലെ ഫുഡ് കോർട്ടിന്റെ കവാടം തകർന്നു വീണതായും റിപ്പോർട്ടുകളുണ്ട്. സുരക്ഷാ ക്രമീകരണങ്ങളിലെ വീഴ്ചയാണോ അപകടത്തിന് കാരണമായതെന്ന് പോലീസ് അന്വേഷിച്ചു വരികയാണ്.