പതിനഞ്ചാം നിയമസഭ: സഭാനടപടികളിൽ തിളങ്ങി കോഴിക്കോട്ടെ എം.എൽ.എമാർ; ഹാജരിൽ സച്ചിൻ ദേവ് മുന്നിൽ

 കോഴിക്കോട്: പതിനഞ്ചാം നിയമസഭയുടെ കാലാവധി അവസാന ഘട്ടത്തിലേക്ക് കടക്കുമ്പോൾ, ജില്ലയിൽ നിന്നുള്ള ജനപ്രതിനിധികളുടെ നിയമസഭയിലെ ഇടപെടലുകളെക്കുറിച്ചുള്ള റിപ്പോർട്ടുകൾ പുറത്തുവന്നു.

നിയമസഭയുടെ ഔദ്യോഗിക വെബ്സൈറ്റ്, അസറ്റ് ഡിവലപ്മെന്റ് സ്കീ പോർട്ടൽ എന്നിവയിലെ വിവരങ്ങൾ ആധാരമാക്കി 'അത്യോതി റിസർച്ച്', 'സഹ്യ ഡിജിറ്റൽ കൺസർവേഷൻ ഫൗണ്ടേഷൻ' എന്നിവർ ചേർന്ന് തയ്യാറാക്കിയ mlatrack.com എന്ന വെബ്സൈറ്റിലെ കണക്കുകൾ പ്രകാരമാണിത്.

ഹാജർ നില: സച്ചിൻ ദേവ് ഒന്നാമത്

സഭയിലെ സാന്നിധ്യത്തിന്റെ കാര്യത്തിൽ ബാലുശ്ശേരി എം.എൽ.എ സച്ചിൻ ദേവാണ് ജില്ലയിൽ ഒന്നാമത്. 99.4 ശതമാനം ഹാജറാണ് അദ്ദേഹത്തിനുള്ളത്. മറ്റ് പ്രമുഖരുടെ ഹാജർ നില താഴെ പറയുന്ന പ്രകാരമാണ്:

• കെ.കെ. രമ (വടകര): 98.1%

• കെ.പി. കുഞ്ഞഹമ്മദ് കുട്ടി (കുറ്റ്യാടി): 96.2%

• ലിന്റോ ജോസഫ് (തിരുവമ്പാടി): 96.2%

• പി.ടി.എ. റഹീം (കുന്നമംഗലം): 88.6%

• എം.കെ. മുനീർ (കോഴിക്കോട് സൗത്ത്): 61.4% (ഹാജറിൽ പിന്നിൽ)

ചോദ്യങ്ങളും ഇടപെടലുകളും

നിയമസഭയിൽ ചോദ്യങ്ങൾ ഉന്നയിക്കുന്നതിലും സജീവമായ ഇടപെടലുകൾ നടത്തുന്നതിലും വടകര, കുറ്റ്യാടി എം.എൽ.എമാർ മികച്ചുനിന്നു.

ഏറ്റവും കൂടുതൽ ചോദ്യങ്ങൾ: കുറ്റ്യാടി എം.എൽ.എ കെ.പി. കുഞ്ഞഹമ്മദ് കുട്ടിയാണ് ഏറ്റവും കൂടുതൽ ചോദ്യങ്ങൾ ഉന്നയിച്ചത് (1080 എണ്ണം). തൊട്ടുപിന്നിൽ കെ.കെ. രമയും (1065), പി.ടി.എ. റഹീമും (1003) ഉണ്ട്.

സഭയിലെ ഇടപെടലുകൾ: ബില്ലുകൾ, ചർച്ചകൾ, സബ്മിഷനുകൾ എന്നിവയുൾപ്പെടെയുള്ള സഭാനടപടികളിൽ ഏറ്റവും കൂടുതൽ പങ്കെടുത്തത് കെ.കെ. രമയാണ് (173 തവണ). ഇ.കെ. വിജയൻ (52), കെ.പി. കുഞ്ഞഹമ്മദ് കുട്ടി (49) എന്നിവരും സജീവമായിരുന്നു.

സ്വകാര്യ ബില്ലുകൾ

ജില്ലയിൽ നിന്നുള്ള രണ്ട് എം.എൽ.എമാർ മാത്രമാണ് നിയമസഭയിൽ സ്വകാര്യ ബില്ലുകൾ അവതരിപ്പിച്ചത്. കെ.പി. കുഞ്ഞഹമ്മദ് കുട്ടിയും നാദാപുരം എം.എ.എൽ.എ ഇ.കെ. വിജയനും ഓരോ ബില്ലുകൾ വീതം അവതരിപ്പിച്ചു.

മറ്റ് വിവരങ്ങൾ

മന്ത്രിമാരായ പി.എ. മുഹമ്മദ് റിയാസ് (ബേപ്പൂർ), എ.കെ. ശശീന്ദ്രൻ (എലത്തൂർ) എന്നിവരുടെ പ്രവർത്തനങ്ങൾ ഈ കണക്കുകളിൽ ഉൾപ്പെടുന്നില്ല. ചട്ടപ്രകാരം മന്ത്രിമാർ, പ്രതിപക്ഷ നേതാവ്, ചീഫ് വിപ്പ് എന്നിവരുടെ വിവരങ്ങൾ ഇത്തരം ട്രാക്കിംഗ് സൈറ്റുകളിൽ ലഭ്യമാകാറില്ല. 2025 നവംബറിൽ അന്തരിച്ച കൊയിലാണ്ടി എം.എൽ.എ കാനത്തിൽ ജമീലയുടെ വിവരങ്ങളും പൂർണ്ണമല്ല.

കുറിപ്പ്: മണ്ഡലങ്ങളിലെ വികസന പ്രവർത്തനങ്ങൾക്കായി അനുവദിച്ച തുകയുടെ വിവരങ്ങൾ ഔദ്യോഗിക വെബ്സൈറ്റിലെ കണക്കുകൾ പ്രകാരമാണ്. ഇതിൽ ചില സാങ്കേതിക അപ്‌ഡേഷനുകൾ പൂർത്തിയാവാത്തതിനാൽ മാറ്റങ്ങൾ ഉണ്ടാകാൻ സാധ്യതയുണ്ട്.