കൗണ്ടി ലൗത്തിൽ വാഹനാപകടം: കാറിടിച്ച് കാൽനടയാത്രക്കാരന് ഗുരുതര പരിക്ക്; നില അതീവ സങ്കീർണ്ണം

 ലൗത്ത്: അയർലൻഡിലെ കൗണ്ടി ലൗത്തിൽ ശനിയാഴ്ച പുലർച്ചെയുണ്ടായ വാഹനാപകടത്തിൽ മധ്യവയസ്കനായ കാൽനടയാത്രക്കാരന് ഗുരുതരമായി പരിക്കേറ്റു.

ഫെബ്രുവരി 7-ന് പുലർച്ചെ മൂന്ന് മണിയോടെ കൊല്ലനിലെ (Collon) ഫൺഷോഗിന് (Funshog) സമീപം എൻ2 (N2) പാതയിലാണ് അപകടമുണ്ടായത്. പരിക്കേറ്റ നാൽപ്പതുകാരന്റെ നില നിലവിൽ അതീവ ഗുരുതരമായി തുടരുകയാണ്.

അപകടസ്ഥലത്ത് വെച്ച് പ്രാഥമിക ശുശ്രൂഷ നൽകിയ ശേഷം ഇദ്ദേഹത്തെ ഉടൻ തന്നെ ഡ്രോഗെഡയിലെ ഔർ ലേഡി ഓഫ് ലൂർദ് ആശുപത്രിയിലേക്ക് മാറ്റിയിരുന്നു. എന്നാൽ ആരോഗ്യനില വഷളായതിനെ തുടർന്ന് പിന്നീട് ഡബ്ലിനിലെ ബ്യൂമോണ്ട് ആശുപത്രിയിലേക്ക് (Beaumont Hospital) മാറ്റി. കാർ ഓടിച്ചിരുന്ന ഇരുപതുകാരി പരിക്കേൽക്കാതെ രക്ഷപെട്ടു.

അപകടത്തെത്തുടർന്ന് ലൗത്ത് ഗാർഡാ (Gardai) ഫോറൻസിക് വിദഗ്ധർ സ്ഥലത്തെത്തി വിശദമായ പരിശോധനകൾ നടത്തി. ശനിയാഴ്ച പകൽ മുഴുവൻ അടച്ചിട്ടിരുന്ന പാത വൈകുന്നേരത്തോടെ ഗതാഗതത്തിനായി തുറന്നു നൽകി. സംഭവത്തിൽ ഗാർഡാ ഉദ്യോഗസ്ഥർ അന്വേഷണം ആരംഭിച്ചിട്ടുണ്ട്.

 അപകടം നടന്ന സമയത്ത് ആ പ്രദേശത്തുണ്ടായിരുന്നവരോ അല്ലെങ്കിൽ സ്ഫോടനം നേരിട്ട് കണ്ടവരോ വിവരങ്ങൾ കൈമാറണമെന്ന് അധികൃതർ അഭ്യർത്ഥിച്ചു. പ്രത്യേകിച്ച്, പുലർച്ചെ 2:40-നും 3:20-നും ഇടയിൽ ഈ പാതയിലൂടെ കടന്നുപോയ വാഹനങ്ങളിലെ ഡാഷ്-ക്യാം (Dash-cam) ദൃശ്യങ്ങൾ ഉണ്ടെങ്കിൽ അവ അന്വേഷണ സംഘത്തിന് ലഭ്യമാക്കണമെന്ന് ഗാർഡാ വക്താവ് അറിയിച്ചു.

വിവരങ്ങൾ അറിയുന്നവർ അർഡി (Ardee) ഗാർഡാ സ്റ്റേഷനിലോ (041 6853222), ഡ്രോഗെഡ (Drogheda) ഗാർഡാ സ്റ്റേഷനിലോ (041 9874200) അല്ലെങ്കിൽ ഗാർഡാ കോൺഫിഡൻഷ്യൽ ലൈനിലോ (1800 666 111) ബന്ധപ്പെടുക.