ഗാർഹിക പീഡനത്തിന് ലിംഗഭേദമില്ല; മധ്യപ്രദേശിൽ നിന്നുള്ള ദൃശ്യങ്ങൾ കണ്ട് നടുങ്ങി സോഷ്യൽ മീഡിയ

 സത്ന (മധ്യപ്രദേശ്): സ്ത്രീധന പീഡനങ്ങളും സ്ത്രീകൾക്കെതിരെയുള്ള അതിക്രമങ്ങളും നിത്യവാർത്തകളാകുന്ന ഇന്ത്യയിൽ, ഗാർഹിക പീഡനത്തിന്റെ മറുവശം തുറന്നുകാണിക്കുന്ന ഒരു വീഡിയോ ഇപ്പോൾ ഇന്റർനെറ്റിൽ ചർച്ചയാകുന്നു.

മധ്യപ്രദേശിലെ സത്നയിൽ നിന്നുള്ള ഒരു യുവാവ്, തന്റെ ഭാര്യയിൽ നിന്ന് നേരിടുന്ന അതിക്രമങ്ങൾ ഒളിക്യാമറയിൽ പകർത്തി പുറത്തുവിട്ടതോടെയാണ് ഈ വിഷയം പൊതുശ്രദ്ധയിൽ എത്തിയത്. പുരുഷൻ വേട്ടക്കാരനായും സ്ത്രീ ഇരയായും മാത്രം ചിത്രീകരിക്കപ്പെടുന്ന പൊതുബോധത്തിന് നേരെ വലിയൊരു ചോദ്യചിഹ്നമാവുകയാണ് ഈ ദൃശ്യങ്ങൾ.

മൗനസാക്ഷിയായി വീട്ടുകാർ; ക്രൂരമർദ്ദനം സോഷ്യൽ മീഡിയയിൽ പ്രചരിക്കുന്ന ദൃശ്യങ്ങളിൽ, കിടക്കയിൽ നിസ്സഹായനായി കിടക്കുന്ന യുവാവിനെ ഭാര്യ ക്രൂരമായി മർദ്ദിക്കുന്നത് കാണാം. തന്റെ കൈയിലുള്ള മുഴുവൻ കരുത്തും ഉപയോഗിച്ച് ആ സ്ത്രീ യുവാവിന്റെ മുഖത്ത് തുടർച്ചയായി പ്രഹരിക്കുന്നു. മർദ്ദനത്തിന്റെ തീവ്രതയിൽ യുവാവ് ബോധരഹിതനാകുന്നത് പോലെ തോന്നിപ്പിച്ചിട്ടും അവർ മർദ്ദനം നിർത്താൻ തയ്യാറാകുന്നില്ല. ഈ സമയമത്രയും ഇതേ മുറിയിൽ മറ്റ് കുടുംബാംഗങ്ങൾ ഉണ്ടായിരുന്നിട്ടും ആരും തന്നെ തടയാൻ മുന്നോട്ടുവന്നില്ല എന്നത് ഞെട്ടിക്കുന്ന വസ്തുതയാണ്. ഒരു സ്ത്രീ തടയാൻ ശ്രമിച്ചെങ്കിലും പെട്ടെന്ന് തന്നെ പിന്മാറി. മുറിയിലേക്ക് വന്ന മറ്റൊരു പുരുഷനാകട്ടെ, ഈ ക്രൂരത കണ്ടുനിൽക്കുകയല്ലാതെ ഇടപെടാൻ തയ്യാറായില്ല.

Enduring constant wife abuse, an Indian man hid a camera at home to record it. After sharing the viral footage online, netizens flooded calls urging police to protect him and extend support.pic.twitter.com/3FcgkVLIYt

— Ghar Ke Kalesh (@gharkekalesh) February 2, 2026

വ്യാജക്കേസ് ഭീഷണി; യുവാവിന്റെ വെളിപ്പെടുത്തൽ താൻ നേരിടുന്ന നിരന്തരമായ ശാരീരിക-മാനസിക പീഡനങ്ങൾ ലോകത്തെ അറിയിക്കാനാണ് ഒളിക്യാമറ സ്ഥാപിച്ചതെന്ന് യുവാവ് പറയുന്നു. പുറത്ത് ആരോടെങ്കിലും ഈ വിവരം പറഞ്ഞാൽ കള്ളക്കേസിൽ കുടുക്കി ജയിലിലയ്ക്കുമെന്ന് ഭാര്യ തന്നെ ഭീഷണിപ്പെടുത്തുന്നതായും ഇദ്ദേഹം ആരോപിക്കുന്നു. നിയമം സ്ത്രീകൾക്ക് നൽകുന്ന പരിരക്ഷയെ ആയുധമാക്കി പുരുഷന്മാരെ നിശബ്ദരാക്കുന്ന പ്രവണതയുടെ ഇരയാണിദ്ദേഹമെന്ന് സോഷ്യൽ മീഡിയയിൽ പലരും അഭിപ്രായപ്പെട്ടു.

പ്രതികരണങ്ങളുമായി നെറ്റിസൺസ് വീഡിയോ വൈറലായതോടെ ഈ വിഷയത്തിൽ നിയമനടപടികൾ ആവശ്യപ്പെട്ട് ആയിരക്കണക്കിന് ആളുകളാണ് രംഗത്തെത്തിയത്. "അതിക്രമത്തിന് ലിംഗഭേദമില്ല, അത് ഏത് രൂപത്തിലായാലും ക്രൂരമാണ്" എന്ന് ഒരാൾ കുറിച്ചപ്പോൾ, "ഇവിടെ പുരുഷനും സ്ത്രീയും തമ്മിൽ റോളുകൾ മാറിവന്നിരുന്നെങ്കിൽ ഈ നിശബ്ദത ഉണ്ടാകുമായിരുന്നോ?" എന്ന് മറ്റൊരു ഉപയോക്താവ് ചോദിക്കുന്നു. സമത്വം എന്നത് തിരഞ്ഞെടുത്ത കേസുകളിൽ മാത്രമാകരുത് എന്ന വിമർശനവും ഉയരുന്നുണ്ട്.

പുരുഷൻ ഇരയാകുമ്പോൾ സമൂഹം അത് തമാശയായി കാണുകയോ കണ്ടില്ലെന്ന് നടിക്കുകയോ ചെയ്യുന്ന അവസ്ഥയ്ക്ക് മാറ്റം വരണമെന്നാണ് ഈ ദൃശ്യങ്ങൾ നൽകുന്ന സന്ദേശം. ഗാർഹിക പീഡന നിയമങ്ങൾ കൂടുതൽ ലിംഗനിഷ്പക്ഷമായി (Gender Neutral) മാറേണ്ടതിന്റെ ആവശ്യകതയിലേക്കാണ് ഈ സംഭവം വിരൽ ചൂണ്ടുന്നത്.