സമൂഹ മാധ്യമം : സമൂഹമാധ്യമങ്ങളിൽ ശ്രദ്ധ നേടാനായി പലതരത്തിലുള്ള റീൽസുകൾ നാം കാണാറുണ്ട്. എന്നാൽ ഇപ്പോൾ ഇന്റർനെറ്റിൽ തരംഗമാകുന്നത് കാണുന്നവരുടെ കണ്ണ് തള്ളിക്കുന്ന ഒരു നൃത്ത വീഡിയോയാണ്. വീടിന്റെ തുറസ്സായ മുറ്റത്ത് സിനിമാ ഗാനത്തിന് നൃത്തം ചെയ്യുന്ന യുവതിയുടെ അടുത്തേക്ക് ഒരു കൂട്ടം ലംഗൂറുകൾ (ഹനുമാൻ കുരങ്ങ്) എത്തുന്നതും തുടർന്നുണ്ടാകുന്ന അപ്രതീക്ഷിത സംഭവങ്ങളുമാണ് വീഡിയോയുടെ ഉള്ളടക്കം.
'തേരി പായൽ ബജി ജഹാം...' എന്ന പ്രശസ്ത ഗാനത്തിനൊപ്പമാണ് യുവതി നൃത്തം ചെയ്യുന്നത്. റീൽസ് ചിത്രീകരിക്കുന്നതിനിടെ ഒരു കൂട്ടം ലംഗൂറുകൾ അവിടേക്ക് ഓടിയെത്തുകയായിരുന്നു. സാധാരണഗതിയിൽ വന്യമൃഗങ്ങളെ കാണുമ്പോൾ ഭയന്ന് ഓടാറാണ് പതിവെങ്കിലും, ഈ യുവതി സധൈര്യം തന്റെ നൃത്തം തുടരുകയാണ് ചെയ്തത്. യുവതിയുടെ അരികിലെത്തിയ ലംഗൂറുകൾ അവർക്ക് ചുറ്റും ചാടുകയും കളിക്കുകയും ചെയ്യുന്നത് വീഡിയോയിൽ വ്യക്തമായി കാണാം.
വീഡിയോയിലെ ഏറ്റവും ഞെട്ടിക്കുന്ന ഭാഗം, നൃത്തത്തിനിടയിൽ ഒരു ലംഗൂർ യുവതിയുടെ കഴുത്തിലേക്ക് ചാടിക്കയറുന്നതാണ്. എന്നാൽ ഒട്ടും പതറാതെ ആ ലംഗൂറിനെ തലയിലേറ്റി യുവതി വട്ടം കറങ്ങി നൃത്തം തുടരുകയായിരുന്നു. മൃഗങ്ങളുമായുള്ള ഈ അസാധാരണ ആത്മബന്ധം കണ്ട് അവിശ്വസനീയതയോടെയാണ് സോഷ്യൽ മീഡിയ പ്രതികരിക്കുന്നത്. സത്യവതി ചൗഹാൻ (satywatichauhan) എന്ന ഇൻസ്റ്റാഗ്രാം അക്കൗണ്ടിലൂടെയാണ് ഈ വീഡിയോ പങ്കുവെച്ചിരിക്കുന്നത്.
വീഡിയോ പുറത്തുവന്നതോടെ നിരവധിപ്പേർ കമന്റുകളുമായി രംഗത്തെത്തി. ഇത്രയും മനോധൈര്യം കാണിച്ച യുവതിയെ ചിലർ അഭിനന്ദിക്കുമ്പോൾ, വന്യമൃഗങ്ങളിൽ നിന്ന് അകലം പാലിക്കുന്നതാണ് സുരക്ഷിതമെന്ന് മറ്റു ചിലർ ഓർമ്മിപ്പിക്കുന്നു. ഈ ലംഗൂറുകളെ യുവതി നേരത്തെ വളർത്തിയതാകാം എന്ന നിഗമനത്തിലാണ് ഭൂരിഭാഗം പ്രേക്ഷകരും. എന്തായാലും മൃഗങ്ങളും മനുഷ്യരും തമ്മിലുള്ള ഈ അപൂർവ്വ നൃത്ത വീഡിയോ സൈബർ ലോകത്ത് വലിയ ചർച്ചയായിക്കഴിഞ്ഞു.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.