തിരഞ്ഞെടുപ്പ് ഗോദയിൽ കോൺഗ്രസ്; നാല് സംസ്ഥാനങ്ങളിൽ കടുത്ത ആഭ്യന്തര കലഹം

 ന്യൂഡൽഹി: വരാനിരിക്കുന്ന നിയമസഭാ തിരഞ്ഞെടുപ്പുകൾക്ക് മുന്നോടിയായി നാല് പ്രധാന സംസ്ഥാനങ്ങളിൽ കോൺഗ്രസ് വലിയ ആഭ്യന്തര പ്രതിസന്ധിയെ നേരിടുന്നതായി റിപ്പോർട്ടുകൾ.

കേരളം, അസം, തമിഴ്‌നാട്, ബംഗാൾ എന്നീ സംസ്ഥാനങ്ങളിലെ പാർട്ടി ഘടകങ്ങളിൽ ഉയർന്നുവന്ന അഭിപ്രായവ്യത്യാസങ്ങൾ കേന്ദ്ര നേതൃത്വത്തെ പ്രതിരോധത്തിലാക്കിയിരിക്കുകയാണ്.

കേരളം: മണിശങ്കർ അയ്യരുടെ പ്രസ്താവന വിവാദത്തിൽ

കേരളത്തിൽ യു.ഡി.എഫ് അധികാരം പിടിച്ചെടുക്കാൻ ശ്രമിക്കുമ്പോൾ, മുതിർന്ന നേതാവ് മണിശങ്കർ അയ്യർ മുഖ്യമന്ത്രി പിണറായി വിജയനെ പുകഴ്ത്തി രംഗത്തെത്തിയത് പാർട്ടിക്ക് കടുത്ത തിരിച്ചടിയായി. പിണറായി വിജയൻ മൂന്നാം തവണയും അധികാരത്തിൽ വരുമെന്നും കേരളത്തിലെ പഞ്ചായത്തീരാജ് മോഡൽ മാതൃകാപരമാണെന്നുമുള്ള അയ്യരുടെ വാക്കുകൾ രാഷ്ട്രീയ വിവാദത്തിന് തിരികൊളുത്തി.

താൻ രാഹുൽ ഗാന്ധിയേക്കാൾ രാജീവ് ഗാന്ധിയുടെ ആശയങ്ങളെയാണ് പിന്തുടരുന്നതെന്ന അയ്യരുടെ പരാമർശത്തെ ബിജെപി ദേശീയ വക്താവ് പ്രദീപ് ഭണ്ഡാരി രൂക്ഷമായി പരിഹസിച്ചു. അയ്യരുടെ പ്രസ്താവന വ്യക്തിപരമാണെന്നും പാർട്ടിയുമായി അദ്ദേഹത്തിന് നിലവിൽ ബന്ധമില്ലെന്നും പവൻ ഖേരയും ജയറാം രമേശും വ്യക്തമാക്കി.

അസം: ഭൂപൻ കുമാർ ബോറയുടെ രാജി നാടകം

അസമിൽ വരാനിരിക്കുന്ന തിരഞ്ഞെടുപ്പിന് മുന്നോടിയായി സംസ്ഥാന അധ്യക്ഷൻ ഭൂപൻ കുമാർ ബോറ രാജി സമർപ്പിച്ചത് ഹൈക്കമാൻഡിനെ ഞെട്ടിച്ചു. പാർട്ടി എംപി ഗൗരവ് ഗോഗോയിയുടെ ഏകപക്ഷീയമായ തീരുമാനങ്ങളിൽ പ്രതിഷേധിച്ചാണ് രാജിയെന്ന് അദ്ദേഹം വ്യക്തമാക്കി. 32 വർഷത്തെ തന്റെ രാഷ്ട്രീയ ജീവിതത്തിലെ അന്തസ്സ് പണയപ്പെടുത്തി മുന്നോട്ട് പോകാനാവില്ലെന്ന് ബോറ അറിയിച്ചെങ്കിലും, മണിക്കൂറുകൾക്ക് ശേഷം അദ്ദേഹം രാജി പിൻവലിച്ചതായി പാർട്ടി വൃത്തങ്ങൾ അറിയിച്ചു.

തമിഴ്‌നാട്: ഡി.എം.കെ-കോൺഗ്രസ് ഭിന്നത

തമിഴ്‌നാട്ടിൽ ഭരണകക്ഷിയായ ഡി.എം.കെയുമായി അധികാരം പങ്കിടുന്നതുമായി ബന്ധപ്പെട്ട് കോൺഗ്രസ് അസംതൃപ്തിയിലാണ്. വരാനിരിക്കുന്ന തിരഞ്ഞെടുപ്പിൽ നടൻ വിജയിയുടെ പാർട്ടിയായ ടി.വി.കെ (TVK) യുമായി സഖ്യമുണ്ടാക്കുന്നതിനെക്കുറിച്ച് കോൺഗ്രസിലെ ഒരു വിഭാഗം ആലോചിക്കുന്നുണ്ട്. അധികാരം പങ്കിടില്ലെന്ന മുഖ്യമന്ത്രി എം.കെ. സ്റ്റാലിന്റെ ഉറച്ച നിലപാട് സഖ്യത്തിൽ വലിയ വിള്ളലുകൾ വീഴ്ത്തിയിരിക്കുകയാണ്.

ബംഗാൾ: തൃണമൂലുമായി സഖ്യമില്ല

പശ്ചിമ ബംഗാളിൽ മമതാ ബാനർജിയുടെ തൃണമൂൽ കോൺഗ്രസ് ഒറ്റയ്ക്ക് മത്സരിക്കുമെന്ന് പ്രഖ്യാപിച്ചതോടെ കോൺഗ്രസും നിലപാട് കടുപ്പിച്ചു. സംസ്ഥാനത്തെ 294 സീറ്റുകളിലും ഒറ്റയ്ക്ക് മത്സരിക്കാനാണ് കോൺഗ്രസ് ഹൈക്കമാൻഡ് നിലവിൽ തീരുമാനിച്ചിരിക്കുന്നത്. ദേശീയ തലത്തിൽ 'ഇന്ത്യ' സഖ്യത്തിന്റെ ഭാഗമാണെങ്കിലും സംസ്ഥാന തിരഞ്ഞെടുപ്പിൽ ഈ ഐക്യം പ്രതിഫലിക്കില്ലെന്ന് ഉറപ്പായി.