കാനഡയിൽ ആരോഗ്യപരിചരണ ചെലവ് കുതിക്കുന്നു; സേവനങ്ങൾ കിട്ടാക്കനിയെന്ന് റിപ്പോർട്ട്

 ഒട്ടാവ: പൊതുജനാരോഗ്യ മേഖലയ്ക്കായി കാനഡ സർക്കാർ ചിലവഴിക്കുന്ന തുകയിൽ റെക്കോർഡ് വർദ്ധനവ് രേഖപ്പെടുത്തുമ്പോഴും, സാധാരണക്കാർക്ക് ചികിത്സാ സൗകര്യങ്ങൾ ലഭിക്കുന്നതിൽ വൻ പ്രതിസന്ധി നേരിടുന്നതായി പുതിയ റിപ്പോർട്ട്.

രാജ്യത്തെ ആരോഗ്യ പരിരക്ഷാ സംവിധാനത്തിന്റെ സുസ്ഥിരതയെത്തന്നെ ചോദ്യം ചെയ്യുന്ന ഗൗരവകരമായ കണ്ടെത്തലുകളാണ് പുറത്തുവന്നിരിക്കുന്നത്.

ചെലവ് ഇരട്ടിയായിട്ടും ഫലമില്ല അംഗസ് റീഡ് ഇൻസ്റ്റിറ്റ്യൂട്ട് (Angus Reid Institute) പുറത്തുവിട്ട കണക്കുകൾ പ്രകാരം, കാനഡയിലെ പകുതിയോളം ജനങ്ങളും ഒരു ഫാമിലി ഡോക്ടറെ കണ്ടെത്താനോ അല്ലെങ്കിൽ നിലവിലുള്ള ഡോക്ടറുടെ അപ്പോയിന്റ്മെന്റ് കൃത്യസമയത്ത് ലഭിക്കാനോ പ്രയാസപ്പെടുകയാണ്. പത്ത് വർഷം മുമ്പ് ഏകദേശം 219 ബില്യൺ കനേഡിയൻ ഡോളർ ആയിരുന്ന ആരോഗ്യ മേഖലയിലെ ദേശീയ ചെലവ് നിലവിൽ 400 ബില്യൺ ഡോളറിലേക്ക് ഉയർന്നിട്ടുണ്ട്. എന്നാൽ, ഈ സാമ്പത്തിക വർദ്ധനവ് സേവന നിലവാരത്തിൽ പ്രതിഫലിക്കുന്നില്ലെന്നതാണ് പൊതുജനങ്ങളുടെ പ്രധാന പരാതി.

ഫാമിലി ഡോക്ടർമാരുടെ കുറവ് രൂക്ഷം രാജ്യത്തെ എട്ടിലൊരാൾ വീതം ഒരു വർഷത്തിലേറെയായി ഫാമിലി ഡോക്ടറെ തേടിക്കൊണ്ടിരിക്കുകയോ അല്ലെങ്കിൽ നിരാശയോടെ ആ ശ്രമം ഉപേക്ഷിക്കുകയോ ചെയ്തവരാണ്. 2015-ൽ 40 ശതമാനം ആളുകൾ മാത്രമാണ് പ്രാഥമിക ചികിത്സാ സൗകര്യങ്ങൾ ലഭിക്കാൻ ബുദ്ധിമുട്ടിയിരുന്നതെങ്കിൽ, 2025-ഓടെ ഇത് 50 ശതമാനമായി ഉയർന്നു. ഡോക്ടർമാരുടെ എണ്ണത്തിൽ നേരിയ വർദ്ധനവ് ഉണ്ടായെങ്കിലും, വർദ്ധിച്ചുവരുന്ന വയോജന ജനസംഖ്യയും സങ്കീർണ്ണമായ ആരോഗ്യപ്രശ്നങ്ങളും നിലവിലെ സംവിധാനത്തെ സമ്മർദ്ദത്തിലാക്കുന്നു. ആവശ്യമുള്ളപ്പോൾ ഒന്നോ രണ്ടോ ദിവസത്തിനുള്ളിൽ ഡോക്ടറെ കാണാൻ സാധിക്കുന്നത് കേവലം 15 ശതമാനം കനേഡിയൻമാർക്ക് മാത്രമാണ്.

അടിയന്തര ചികിത്സാ വിഭാഗങ്ങളിലും പ്രതിസന്ധി സ്പെഷ്യലിസ്റ്റ് ഡോക്ടർമാരുടെ സേവനം തേടുന്ന പകുതിയിലേറെ പേരും വലിയ താമസം നേരിടുന്നുണ്ട്. ശസ്ത്രക്രിയകൾക്കും ഡയഗ്നോസ്റ്റിക് പരിശോധനകൾക്കുമായുള്ള കാത്തിരിപ്പ് കാലാവസ്ഥ മാസങ്ങളോളം നീളുന്നത് പതിവായിരിക്കുകയാണ്. അടിയന്തര സാഹചര്യങ്ങളിൽ പോലും കൃത്യസമയത്ത് ചികിത്സ ലഭിക്കുമെന്ന് 60 ശതമാനം പേർക്കും ഇപ്പോൾ വിശ്വാസമില്ല. പ്രവിശ്യാ ഗവൺമെന്റുകൾ ഈ മേഖല കൈകാര്യം ചെയ്യുന്ന രീതിയിൽ 70 ശതമാനം ജനങ്ങളും അതൃപ്തി രേഖപ്പെടുത്തിയിട്ടുണ്ട്. സസ്‌കാച്ചവൻ, ക്യൂബെക് തുടങ്ങിയ പ്രവിശ്യകളിലാണ് സ്ഥിതി ഏറ്റവും മോശമായി തുടരുന്നത്.

അഭൂതപൂർവമായ ഫണ്ടിംഗ് ലഭ്യമായിട്ടും രോഗീ പരിചരണത്തിൽ പുരോഗതിയില്ലാത്തത് രാജ്യത്ത് വലിയ രാഷ്ട്രീയ സമ്മർദ്ദത്തിന് കാരണമായിട്ടുണ്ട്. മുടക്കുന്ന പണത്തിന് അനുസരിച്ചുള്ള മൂല്യം ആരോഗ്യ സംവിധാനത്തിൽ നിന്ന് ലഭിക്കുന്നുണ്ടോ എന്ന ചോദ്യമാണ് കനേഡിയൻ പൗരന്മാർക്കിടയിൽ ഇപ്പോൾ ഉയരുന്നത്.