അധ്യാപകരുടെ വംശീയ അധിക്ഷേപം: ബെംഗളൂരുവിൽ ഡെന്റൽ വിദ്യാർത്ഥിനി ആത്മഹത്യ ചെയ്തു

 ബെംഗളൂരു: വസ്ത്രധാരണത്തെയും ചർമ്മത്തിന്റെ നിറത്തെയും ചൊല്ലിയുള്ള അധ്യാപകരുടെ നിരന്തരമായ അധിക്ഷേപത്തെത്തുടർന്ന് ബെംഗളൂരുവിൽ 23 വയസ്സുള്ള ഡെന്റൽ വിദ്യാർത്ഥിനി ആത്മഹത്യ ചെയ്തു.

സംഭവത്തിൽ പ്രഥമദൃഷ്ട്യാ കുറ്റക്കാരെന്ന് കണ്ടെത്തിയ ആറ് അധ്യാപകരെ കോളേജ് മാനേജ്‌മെന്റ് സസ്‌പെൻഡ് ചെയ്തു. മൂന്നാം വർഷ ബി.ഡി.എസ് വിദ്യാർത്ഥിനിയെയാണ് കഴിഞ്ഞ വെള്ളിയാഴ്ച (ജനുവരി 9) വീടിനുള്ളിൽ മരിച്ച നിലയിൽ കണ്ടെത്തിയത്.

കുടുംബത്തിന്റെ ആരോപണങ്ങൾ

വിദ്യാർത്ഥിനിയെ അധ്യാപകർ മാനസികമായി പീഡിപ്പിച്ചിരുന്നതായി കുടുംബം ആരോപിച്ചു. കണ്ണിന് അസുഖം ബാധിച്ചതിനെത്തുടർന്ന് ഒരു ദിവസം കോളേജിൽ നിന്ന് അവധിയെടുത്തതാണ് പ്രകോപനത്തിന് കാരണമായതെന്ന് പെൺകുട്ടിയുടെ അമ്മ പറയുന്നു. അന്ന് നടക്കേണ്ടിയിരുന്ന സെമിനാറിൽ പങ്കെടുക്കാൻ കഴിയാതിരുന്ന വിദ്യാർത്ഥിനി പിറ്റേന്ന് കോളേജിലെത്തിയപ്പോൾ മറ്റ് വിദ്യാർത്ഥികളുടെ മുന്നിൽ വെച്ച് അധ്യാപകർ പരസ്യമായി അപമാനിച്ചു.

പെൺകുട്ടിയുടെ ചർമ്മത്തിന്റെ നിറത്തെയും വസ്ത്രധാരണത്തെയും ഭാഷയെയും പരിഹസിച്ച അധ്യാപകർ, ഡോക്ടറാകാൻ അവൾക്ക് യോഗ്യതയില്ലെന്ന് പറഞ്ഞ് അധിക്ഷേപിച്ചതായും അമ്മ പോലീസിന് നൽകിയ പരാതിയിൽ വ്യക്തമാക്കുന്നു. മാതാപിതാക്കളുടെ ഏക മകളായിരുന്നു മരിച്ച പെൺകുട്ടി.

പ്രതിഷേധവുമായി വിദ്യാർത്ഥികൾ

വിദ്യാർത്ഥിനിയുടെ മരണത്തിന് ഉത്തരവാദികളായ അധ്യാപകർക്കെതിരെ കർശന നടപടി വേണമെന്നാവശ്യപ്പെട്ട് കോളേജിൽ വൻ വിദ്യാർത്ഥി പ്രതിഷേധം അരങ്ങേറി. കുത്തിയിരിപ്പ് സമരം ശക്തമായതോടെയാണ് കുറ്റാരോപിതരായ ആറ് പ്രൊഫസർമാരെയും ജനുവരി 12-ന് കോളേജ് ഭരണകൂടം സസ്‌പെൻഡ് ചെയ്തത്. സംഭവത്തിൽ പോലീസ് കേസെടുത്ത് വിശദമായ അന്വേഷണം ആരംഭിച്ചു.

അക്കാദമിക് സമ്മർദ്ദങ്ങൾക്കും അധിക്ഷേപങ്ങൾക്കും എതിരെ കർശന നടപടി സ്വീകരിക്കുമെന്ന് കോളേജ് അധികൃതർ അറിയിച്ചെങ്കിലും, വംശീയമായ അധിക്ഷേപങ്ങൾ മെഡിക്കൽ ക്യാമ്പസുകളിൽ ഇപ്പോഴും തുടരുന്നത് വലിയ ചർച്ചകൾക്ക് വഴിവെച്ചിരിക്കുകയാണ്.