മടങ്ങിവരവ് കണ്ണീർക്കടലായി, ഗന്തൂര്‍ അപകടത്തിൽ നാലാമത്തെ കുട്ടിയും വിടവാങ്ങി, വിങ്ങലടക്കാനാവാതെ പ്രവാസി ലോകം...

അബുദാബി: ദുബായ് റോഡിൽ ഗന്തൂത്തിന് സമീപമുണ്ടായ വാഹനാപകടത്തിൽ മരിച്ച മലയാളി കുടുംബത്തിലെ കുട്ടികളെ ഇന്ന് ദുബായിൽ കബറടക്കും.

അതേസമയം, അപകടത്തിൽ മരിച്ച ബുഷ്റയുടെ മയ്യിത്ത് ഇന്ന് നാട്ടിലേയ്ക്ക് കൊണ്ടു പോകാനുള്ള നടപടികൾ പൂർത്തിയായി വരുന്നതായും ബന്ധുക്കൾ പറഞ്ഞു.. ഇന്ന് ഉച്ചയ്ക്ക് ശേഷം മുഹൈസിനയിലെ (സോണാപൂർ) ദുബായ് മെഡിക്കൽ ഫിറ്റ്നസ് സെന്ററിൽ എംബാം ചെയ്യും. തുടർന്ന് മയ്യിത്ത് നമസ്കാരവും നടക്കും..

തിരൂർ തൃപ്പനച്ചി കിഴശ്ശേരി സ്വദേശി അബ്ദുൽ ലത്തീഫിന്റെയും റുക്സാന അബ്ദുൽ റസാഖിന്റെയും മക്കളായ അഷാസ് (14), അമ്മാർ (12), അയാഷ് (5) എന്നിവരും വീട്ടുജോലിക്കാരി മലപ്പുറം ചമ്രവട്ടം സ്വദേശിനി ബുഷ്റ (48)യുമാണ് ഇന്നലെ പുലർച്ചെയുണ്ടായ അപകടത്തിൽ മരണപ്പെട്ടത്.

ദുബായിൽ റിയൽ എസ്റ്റേറ്റ് രംഗത്ത് പ്രവർത്തിക്കുന്ന അബ്ദുൽ ലത്തീഫും, കുടുംബവും ലിവ ഫെസ്റ്റിവൽ സന്ദർശിച്ചശേഷം മടങ്ങുമ്പോഴായിരുന്നു ദാരുണ സംഭവം. ബിസിനസ് ആവശ്യാർഥം ലണ്ടനിലായിരുന്ന റുക്‌സാനയുടെ സഹോദരൻ ദുബായിൽ തിരിച്ചെത്തിയിട്ടുണ്ട്.