മടങ്ങി വരേണ്ടവർക്ക് മടങ്ങി വരാം,രാജ്യാന്തര വിമാനങ്ങൾ സർവീസ് നിർത്തുകയാണെങ്കിൽ മാത്രമേ പ്രത്യേക രക്ഷാദൗത്യം ആരംഭിക്കൂയെന്ന് വിദേശകാര്യ മന്ത്രാലയം

ന്യൂഡൽഹി ;ഇറാനിൽ നിന്നുള്ള രാജ്യാന്തര വിമാനങ്ങൾ സർവീസ് നിർത്തുകയാണെങ്കിൽ മാത്രമേ ഇന്ത്യക്കാരെ ഒഴിപ്പിക്കാൻ പ്രത്യേക രക്ഷാദൗത്യം ആരംഭിക്കൂയെന്ന് വിദേശകാര്യ മന്ത്രാലയം വ്യക്തമാക്കി.

ഇറാനിലെ സംഘർഷ സാഹചര്യത്തിൽ അവിടെയുള്ള ഇന്ത്യക്കാരെ ഒഴിപ്പിക്കാൻ പോകുന്നുവെന്നു കഴിഞ്ഞദിവസം മന്ത്രാലയം വ്യക്തമാക്കിയിരുന്നു.വിമാനസർവീസുകൾ ഉണ്ടെന്നും ഇറാനിൽ നിന്നു മടങ്ങാൻ ആഗ്രഹിക്കന്നവർക്ക് ഈ സൗകര്യം പ്രയോജനപ്പെടുത്താമെന്നും മന്ത്രാലയം അറിയിച്ചു.

ഏകദേശം 9,000 ഇന്ത്യക്കാരാണു നിലവിൽ ഇറാനിലുള്ളത്. ഇതിൽ ഏറെയും വിദ്യാർഥികളാണെന്നും മന്ത്രാലയം വക്താവ് രൺധീർ ജയ്സ്വാൾ പറഞ്ഞു.

ഇന്ത്യ ഏറ്റെടുത്ത ഇറാനിലെ ചാബഹാർ തുറമുഖ വികസനത്തിന് യുഎസ് നൽകിയ ഇളവുകൾ ഏപ്രിൽ 26 വരെയുണ്ടെന്നും വിഷയത്തിൽ യുഎസ് അധികൃതരുമായി ചർച്ച നടക്കുന്നുണ്ടെന്നും വിദേശകാര്യ മന്ത്രാലയം വിശദീകരിച്ചു.