വീടുകൾ കൂടുതൽ ഊർജ്ജക്ഷമമാക്കുന്നതിനും ചെലവ് കുറയ്ക്കുന്നതിനും പുതിയ പദ്ധതി പ്രഖ്യാപിച്ച് ഐറിഷ് സർക്കാർ

ഡബ്ലിൻ ;അയർലൻഡിലെ വീടുകൾ കൂടുതൽ ഊർജ്ജക്ഷമമാക്കുന്നതിനും (Energy Efficiency) ചൂടാക്കാനുള്ള ചെലവ് കുറയ്ക്കുന്നതിനുമായി സർക്കാർ വിപ്ലവകരമായ പുതിയ ഗ്രാന്റ് പദ്ധതി പ്രഖ്യാപിച്ചു.

2026 മാർച്ച് 2 മുതൽ പ്രാബല്യത്തിൽ വരുന്ന ഈ പദ്ധതി പ്രകാരം, പഴയ ജനലുകളും (Windows) വാതിലുകളും (Doors) മാറ്റി സ്ഥാപിക്കുന്നതിന് വീട്ടുടമകൾക്ക് 4,000 യൂറോ വരെ സാമ്പത്തിക സഹായം ലഭിക്കും.

എന്താണ് ഈ മാറ്റത്തിന്റെ പ്രത്യേകത?

മുമ്പ്, ജനലുകളും വാതിലുകളും മാറ്റാനുള്ള ഗ്രാന്റ് ലഭിക്കണമെങ്കിൽ വീട് മൊത്തമായി നവീകരിക്കുന്ന ‘വൺ സ്റ്റോപ്പ് ഷോപ്പ്’ (One Stop Shop) എന്ന വലിയ പദ്ധതിയുടെ ഭാഗമാകണമായിരുന്നു. ഇതിന് പതിനായിരക്കണക്കിന് യൂറോ മുൻകൂട്ടി ചെലവാക്കേണ്ടി വന്നിരുന്നു. എന്നാൽ പുതിയ നിയമപ്രകാരം, മറ്റ് വലിയ നവീകരണങ്ങൾക്കൊപ്പമല്ലാതെ തന്നെ ‘സിംഗിൾ മെഷർ’ (Standalone measure) ആയി ജനലുകളും വാതിലുകളും മാത്രം മാറ്റാൻ അപേക്ഷിക്കാം. ഇടത്തരക്കാർക്കും സാധാരണക്കാർക്കും ഇത് വലിയ ആശ്വാസമാകും.

ഗ്രാന്റ് തുകയുടെ വിശദാംശങ്ങൾ:

വീടിന്റെ വലിപ്പവും തരവും അനുസരിച്ചാണ് ഗ്രാന്റ് തുക നിശ്ചയിച്ചിരിക്കുന്നത്:

ഡിറ്റാച്ച്ഡ് വീടുകൾ (Detached Houses): 4,000 യൂറോ വരെ.

സെമി-ഡിറ്റാച്ച്ഡ് / എൻഡ്-ഓഫ്-ടെറസ് വീടുകൾ: 3,000 യൂറോ വരെ.

മിഡ്-ടെറസ് വീടുകൾ (Mid-terrace): 1,800 യൂറോ വരെ.

അപ്പാർട്ടുമെന്റുകൾ / ഡ്യൂപ്ലക്സ്: 1,500 യൂറോ വരെ.

പുറത്തെ വാതിലുകൾ (External Doors): ഓരോ വാതിലിനും 800 യൂറോ വീതം ഗ്രാന്റ് ലഭിക്കും. ഒരു വീട്ടിൽ പരമാവധി രണ്ട് വാതിലുകൾക്ക് (മൊത്തം 1,600 യൂറോ) വരെ ഈ ആനുകൂല്യം ലഭിക്കുന്നതാണ്.

പ്രധാന യോഗ്യതകളും നിബന്ധനകളും:

ഈ ഗ്രാന്റ് എല്ലാവർക്കും ലഭ്യമാകില്ല. അതിന് ചില സാങ്കേതിക മാനദണ്ഡങ്ങൾ പാലിക്കേണ്ടതുണ്ട്:

വീടിന്റെ പഴക്കം: 2011-ന് മുമ്പ് നിർമ്മിച്ചതും ആളുകൾ താമസിക്കുന്നതുമായ വീടുകൾക്കായിരിക്കണം ഈ ഗ്രാന്റ്.

ഹീറ്റ് പമ്പ് റെഡി (Heat Pump Ready): വീടിന്റെ ഭിത്തികളും (Walls) മേൽക്കൂരയും (Attic) കൃത്യമായി ഇൻസുലേഷൻ ചെയ്തതായിരിക്കണം. ചുവരിലൂടെ ചൂട് പുറത്തുപോകുന്ന അവസ്ഥയിലാണെങ്കിൽ വിൻഡോ ഗ്രാന്റ് ലഭിക്കില്ല. ഇൻസുലേഷൻ ഇല്ലാത്തവർക്ക് അത് ചെയ്യുന്നതിനോടൊപ്പം തന്നെ വിൻഡോ ഗ്രാന്റിനും അപേക്ഷിക്കാം.

BER റേറ്റിംഗ്: നിലവിൽ വീടിന്റെ ഊർജ്ജക്ഷമത റേറ്റിംഗ് (BER) B3-യോ അതിൽ താഴെയോ ആയിരിക്കണം. നവീകരണത്തിന് ശേഷം ഇത് B2 റേറ്റിംഗിൽ എത്തണം എന്നതാണ് ലക്ഷ്യം.

അനുമതിക്ക് മുമ്പ് പണി തുടങ്ങരുത്: SEAI-യിൽ നിന്ന് ഗ്രാന്റ് അനുമതി (Grant Approval) ലഭിക്കുന്നതിന് മുമ്പ് പണി ആരംഭിക്കാൻ പാടില്ല. അങ്ങനെ ചെയ്താൽ ഗ്രാന്റ് തുക ലഭിക്കില്ല.

രജിസ്റ്റർ ചെയ്ത കോൺട്രാക്ടർ: പണികൾ നടത്തുന്നത് നിർബന്ധമായും SEAI-യിൽ രജിസ്റ്റർ ചെയ്തിട്ടുള്ള അംഗീകൃത കോൺട്രാക്ടർമാർ വഴിയായിരിക്കണം.

എങ്ങനെ അപേക്ഷിക്കണം?

സസ്റ്റൈനബിൾ എനർജി അതോറിറ്റി ഓഫ് അയർലൻഡ് (SEAI) വഴിയാണ് അപേക്ഷ സമർപ്പിക്കേണ്ടത്. മാർച്ച് 2 മുതൽ ഓൺലൈൻ പോർട്ടൽ വഴി അപേക്ഷകൾ സ്വീകരിക്കും. അപേക്ഷിക്കുമ്പോൾ നിങ്ങളുടെ ഇലക്ട്രിസിറ്റി ബില്ലിലെ MPRN നമ്പർ കയ്യിൽ കരുതുക