ആഞ്ഞടിച്ച്, ‘ഗോറെറ്റി’ കൊടുങ്കാറ്റ് പിന്നാലെ മഴയും മഞ്ഞു വീഴ്ചയും...!

യുകെ ; ബ്രിട്ടനിൽ ആഞ്ഞടിച്ച ‘ഗോറെറ്റി’ കൊടുങ്കാറ്റും പിന്നാലെയുണ്ടായ കനത്ത മഞ്ഞുവീഴ്ചയും രാജ്യത്തെ റെയിൽ ഗതാഗതത്തെ പൂർണ്ണമായും സ്തംഭിപ്പിച്ചു.

അതിശക്തമായ കാറ്റിൽ ട്രാക്കുകളിലേക്ക് മരങ്ങൾ കടപുഴകിവീണതും കനത്ത മഞ്ഞുവീഴ്ചയും കാരണം ട്രെയിൻ സർവീസുകൾ താറുമാറായി. റെയിൽവേ ട്രാക്കുകൾ വൃത്തിയാക്കി ഗതാഗതം പുനഃസ്ഥാപിക്കുന്നതിനായി അത്യാധുനിക യന്ത്രങ്ങളുമായി പ്രത്യേക ദൗത്യസംഘത്തെ വിന്യസിച്ചിരിക്കുകയാണ്.മിഡ്‌ലാൻഡ്‌സ് ഉൾപ്പെടെയുള്ള പ്രദേശങ്ങളിൽ രാത്രിയിലുണ്ടായ അതിശക്തമായ മഞ്ഞുവീഴ്ച റെയിൽവേ ട്രാക്കുകളെ സാരമായി ബാധിച്ചിട്ടുണ്ട്.

ട്രാക്കുകളിൽ ഉറച്ചുകിടക്കുന്ന മഞ്ഞും മരങ്ങളും നീക്കം ചെയ്യുന്നതിനായി ‘ചെയിൻസോ’ ഉൾപ്പെടെയുള്ള ഉപകരണങ്ങളുമായി ആയിരക്കണക്കിന് ജീവനക്കാരാണ് പ്രതികൂല കാലാവസ്ഥയിലും രാപ്പകൽ പണിയെടുക്കുന്നത്. പലയിടങ്ങളിലും വൈദ്യുതി ലൈനുകൾ തകരാറിലായതും ജോലികളെ ബാധിക്കുന്നുണ്ട്. തകരാറുകൾ പരിഹരിക്കാൻ കൂടുതൽ സമയം വേണ്ടിവരുന്നതിനാൽ ചില പ്രധാന റൂട്ടുകളിൽ ശനിയാഴ്ച വരെ ട്രെയിൻ സർവീസുകൾ പുനരാരംഭിക്കാൻ കഴിയില്ലെന്ന് നെറ്റ്‌വർക്ക് റെയിൽ ഔദ്യോഗികമായി അറിയിച്ചു.

ഷെഫീൽഡ്, സൗത്ത് യോർക്ഷയർ, മാഞ്ചസ്റ്റർ റൂട്ടുകളിലും മാഞ്ചസ്റ്ററിൽ നിന്ന് പീക്ക് ഡിസ്ട്രിക്റ്റിലേക്കുള്ള ലൈനുകളിലുമാണ് നിലവിൽ സർവീസുകൾ പൂർണ്ണമായും മുടങ്ങിയിരിക്കുന്നത്. സുരക്ഷാ മുൻകരുതലിന്റെ ഭാഗമായി യാത്രക്കാർ അനാവശ്യ യാത്രകൾ ഒഴിവാക്കണമെന്നും അധികൃതർ ആവശ്യപ്പെട്ടു.

യാത്രക്കാർ ജാഗ്രത പാലിക്കണം യാത്രക്കാർ സ്റ്റേഷനുകളിലേക്ക് തിരിക്കും മുൻപ് തങ്ങളുടെ യാത്രാ വിവരങ്ങൾ വെബ്സൈറ്റ് വഴിയോ ആപ്പുകൾ വഴിയോ കൃത്യമായി പരിശോധിക്കണമെന്ന് നെറ്റ്‌വർക്ക് റെയിൽ റീജനൽ ഡയറക്ടർ ജേക്ക് കെല്ലി നിർദ്ദേശിച്ചു. സർവീസുകൾ എത്രയും വേഗം പുനഃസ്ഥാപിക്കാൻ ജീവനക്കാർ പരമാവധി ശ്രമിക്കുന്നുണ്ടെങ്കിലും കാലാവസ്ഥാ വെല്ലുവിളികൾ ഇപ്പോഴും തുടരുകയാണെന്ന് അദ്ദേഹം കൂട്ടിച്ചേർത്തു. 

ശക്തമായ കാറ്റിനെത്തുടർന്ന് റോഡ് ഗതാഗതത്തിനും തടസ്സങ്ങൾ നേരിടുന്നുണ്ട്. വരും മണിക്കൂറുകളിൽ കൂടുതൽ മഞ്ഞുവീഴ്ചയ്ക്ക് സാധ്യതയുള്ളതിനാൽ യുകെ കാലാവസ്ഥാ നിരീക്ഷണ കേന്ദ്രം വിവിധയിടങ്ങളിൽ യെല്ലോ അലർട്ട് പുറപ്പെടുവിച്ചിട്ടുണ്ട്.റെയിൽ ഗതാഗതത്തിന് പിന്നാലെ രാജ്യത്തെ പ്രധാന വിമാനത്താവളങ്ങളുടെ പ്രവർത്തനവും തടസ്സപ്പെട്ടതോടെ ആയിരക്കണക്കിന് യാത്രക്കാരാണ് വിവിധയിടങ്ങളിൽ കുടുങ്ങിക്കിടക്കുന്നത്. കാലാവസ്ഥാ പ്രവചനം കണക്കിലെടുത്ത് യുകെയിലെ മലയാളി സംഘടനകൾ പ്രവാസികൾക്കായി ജാഗ്രതാ നിർദ്ദേശങ്ങൾ പുറപ്പെടുവിച്ചു.‌

ലണ്ടനിലെ ഹീത്രോ, ഗാറ്റ്‌വിക്, മാഞ്ചസ്റ്റർ, ബർമിങ്ങാം വിമാനത്താവളങ്ങളെ കൊടുങ്കാറ്റ് സാരമായി ബാധിച്ചു. റൺവേകളിൽ മഞ്ഞ് കട്ടപിടിച്ചതും ശക്തമായ കാറ്റും കാരണം നൂറുകണക്കിന് സർവീസുകളാണ് റദ്ദാക്കിയത്. ഹീത്രോവിൽ മാത്രം അമ്പതിലധികം വിമാനങ്ങൾ റദ്ദാക്കി. വിമാനങ്ങൾ ലാൻഡ് ചെയ്യുന്നതിന് മുൻപായി മഞ്ഞ് നീക്കം ചെയ്യുന്ന ‘ഡി-ഐസിങ്’ നടപടികൾക്ക് കൂടുതൽ സമയമെടുക്കുന്നത് മൂലം മിക്ക സർവീസുകളും മണിക്കൂറുകളോളം വൈകുകയാണ്. യാത്രക്കാർ വിമാനത്താവളത്തിലേക്ക് തിരിക്കുന്നതിന് മുൻപ് അതത് എയർലൈനുകളുമായി ബന്ധപ്പെട്ട് വിവരങ്ങൾ ഉറപ്പുവരുത്തണമെന്ന് അധികൃതർ അറിയിച്ചു.

പ്രതികൂല കാലാവസ്ഥയുടെ പശ്ചാത്തലത്തിൽ യുക്മ ഉൾപ്പെടെയുള്ള പ്രവാസി മലയാളി സംഘടനകൾ മലയാളികൾക്ക് ജാഗ്രതാ നിർദ്ദേശം നൽകി. അത്യാവശ്യ കാര്യങ്ങൾക്കല്ലാതെ വീടിന് പുറത്തിറങ്ങുന്നത് ഒഴിവാക്കണമെന്ന് സംഘടനകൾ അഭ്യർത്ഥിച്ചു. ലണ്ടൻ, മാഞ്ചസ്റ്റർ തുടങ്ങിയ നഗരങ്ങളിലെ മലയാളി അസോസിയേഷനുകൾ അടിയന്തര സഹായത്തിനായി ഹെൽപ്പ് ലൈനുകൾ ആരംഭിച്ചിട്ടുണ്ട്. വാഹനവുമായി പുറത്തിറങ്ങുന്നവർ ഐസ് വീണ റോഡുകളിൽ ‘ബ്ലാക്ക് ഐസ്’ ഭീഷണി നിലനിൽക്കുന്നതിനാൽ അതീവ ജാഗ്രത പാലിക്കണമെന്നും, വാഹനങ്ങളിൽ കമ്പിളി വസ്ത്രങ്ങളും ചാർജറുകളും കരുതണമെന്നും നിർദ്ദേശമുണ്ട്. 

കൊടുങ്കാറ്റിൽ മരങ്ങൾ കടപുഴകിവീണതിനെത്തുടർന്ന് മിഡ്‌ലാൻഡ്‌സിലെയും നോർത്തേൺ ഇംഗ്ലണ്ടിലെയും ആയിരക്കണക്കിന് വീടുകളിൽ വൈദ്യുതി ബന്ധം നിലച്ചു. വൈദ്യുതി പുനഃസ്ഥാപിക്കാനുള്ള ശ്രമങ്ങൾ തുടരുകയാണെങ്കിലും കനത്ത മഞ്ഞുവീഴ്ച ജീവനക്കാർക്ക് തടസ്സമാകുന്നുണ്ട്. വരും ദിവസങ്ങളിലും താപനില പൂജ്യം ഡിഗ്രിയിൽ താഴെ തുടരാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് മെറ്റ് ഓഫിസ് അറിയിച്ചു.