ഉനകോട്ടിയിൽ വർഗീയ സംഘർഷം: പത്തുപേർ അറസ്റ്റിൽ; നിരോധനാജ്ഞ തുടരുന്നു

 അഗർത്തല/ഉനകോട്ടി: ത്രിപുരയിലെ ഉനകോട്ടി ജില്ലയിലുള്ള കുമാർഘട്ട് സബ്ഡിവിഷനിലെ സെയ്ദർപാർ മേഖലയിൽ വർഗീയ സംഘർഷം പൊട്ടിപ്പുറപ്പെട്ടതിനെ തുടർന്ന് പത്തുപേരെ പൊലീസ് അറസ്റ്റ് ചെയ്തു.

ജനുവരി 10-ന് പ്രാദേശിക ക്ഷേത്രത്തിലേക്കുള്ള ചന്ദ (പിരിവ്) ശേഖരിക്കുന്നതുമായി ബന്ധപ്പെട്ട തർക്കമാണ് അക്രമാസക്തമായ സംഘർഷത്തിൽ കലാശിച്ചതെന്ന് ഔദ്യോഗിക വൃത്തങ്ങൾ അറിയിച്ചു.

സ്ഥിതിഗതികൾ നിയന്ത്രിക്കുന്നതിന്റെ ഭാഗമായി ഭാരതീയ നാഗരിക് സുരക്ഷാ സൻഹിതയിലെ (BNSS) സെക്ഷൻ 163 പ്രകാരം പ്രദേശത്ത് നിരോധനാജ്ഞ ഏർപ്പെടുത്തി. തെറ്റായ വിവരങ്ങൾ പ്രചരിക്കുന്നത് തടയാൻ മൊബൈൽ ഇന്റർനെറ്റ് സേവനങ്ങൾ താൽക്കാലികമായി നിർത്തിവച്ചിരിക്കുകയാണ്. സംസ്ഥാന പൊലീസും അർദ്ധസൈനിക വിഭാഗവും പ്രദേശത്ത് കനത്ത ജാഗ്രത തുടരുന്നു.

സംഘർഷത്തിൽ നാല് പൊലീസ് ഉദ്യോഗസ്ഥർക്കും ആറ് സാധാരണക്കാർക്കും പരിക്കേറ്റതായി ഉനകോട്ടി എസ്.പി അവിനാഷ് കുമാർ റായ് അറിയിച്ചു. ശനിയാഴ്ചയ്ക്ക് ശേഷം പുതിയ അക്രമ സംഭവങ്ങളൊന്നും റിപ്പോർട്ട് ചെയ്തിട്ടില്ലെന്നും സ്ഥിതിഗതികൾ നിലവിൽ നിയന്ത്രണവിധേയമാണെന്നും അദ്ദേഹം കൂട്ടിച്ചേർത്തു.

സംഘർഷത്തിന്റെ പശ്ചാത്തലം

സെയ്ദർപാർ-ഷിമുൽതല മേഖലയിൽ ക്ഷേത്ര ഫണ്ട് ശേഖരണത്തെ ചൊല്ലിയുണ്ടായ തർക്കമാണ് വലിയ സംഘർഷത്തിലേക്ക് വഴിമാറിയത്. വ്യത്യസ്ത വിഭാഗങ്ങൾ തമ്മിലുണ്ടായ വാക്കേറ്റം കയ്യാങ്കളിയിലേക്ക് നീങ്ങിയതോടെ സ്ഥിതി വഷളാവുകയായിരുന്നു. നിലവിൽ പൊതുയോഗങ്ങൾക്കും വലിയ ഒത്തുചേരലുകൾക്കും കർശന നിയന്ത്രണമുണ്ട്. വരും ദിവസങ്ങളിലെ സാഹചര്യം വിലയിരുത്തിയ ശേഷം മാത്രമേ നിയന്ത്രണങ്ങളിൽ ഇളവ് വരുത്തുകയുള്ളൂ എന്ന് അധികൃതർ വ്യക്തമാക്കി.

രാഷ്ട്രീയ പ്രതികരണങ്ങൾ

സംസ്ഥാന സർക്കാരിന്റെ വീഴ്ചയാണ് സംഘർഷത്തിന് കാരണമെന്ന് ആരോപിച്ച് പ്രതിപക്ഷം രംഗത്തെത്തിയിട്ടുണ്ട്. സുരക്ഷാ കാരണങ്ങൾ ചൂണ്ടിക്കാട്ടി പൊലീസ് തന്നെ സംഘർഷബാധിത പ്രദേശങ്ങൾ സന്ദർശിക്കുന്നതിൽ നിന്നും തടഞ്ഞതായി കോൺഗ്രസ് നിയമസഭാ കക്ഷി നേതാവ് ബിരാജിത് സിൻഹ ആരോപിച്ചു.

ന്യൂനപക്ഷങ്ങളുടെ ജീവനും സ്വത്തും സംരക്ഷിക്കുന്നതിൽ ബിജെപി സർക്കാർ പരാജയപ്പെട്ടുവെന്ന് പ്രതിപക്ഷ നേതാവ് ജിതേന്ദ്ര ചൗധരി കുറ്റപ്പെടുത്തി. മുഖ്യമന്ത്രി വിഷയത്തിൽ കൃത്യസമയത്ത് പ്രതികരിച്ചില്ലെന്നും അദ്ദേഹം പറഞ്ഞു. എന്നാൽ, അക്രമത്തെ അപലപിച്ച സംസ്ഥാന ബിജെപി അധ്യക്ഷൻ രാജിബ് ഭട്ടാചാർജി, കുറ്റക്കാർക്കെതിരെ ഉടനടി നടപടിയെടുത്ത പൊലീസിനെ അഭിനന്ദിച്ചു.

സമാധാനം പൂർണ്ണമായും പുനഃസ്ഥാപിക്കുന്നത് വരെ ഇന്റർനെറ്റ് നിയന്ത്രണവും സുരക്ഷാ സേനയുടെ പട്രോളിംഗും തുടരാനാണ് ഭരണകൂടത്തിന്റെ തീരുമാനം.