ശബരിമലയിൽ അമ്പലപ്പുഴ പേട്ട സംഘത്തിന് നേരെ പോലീസ് അതിക്രമമെന്ന് പരാതി; പെരിയോൻ പടിക്കെട്ടിൽ വീണു

 ശബരിമല: ശബരിമല ദർശനത്തിനെത്തിയ അമ്പലപ്പുഴ പേട്ട സംഘത്തോട് പോലീസ് മോശമായി പെരുമാറിയതായി പരാതി.

പോലീസുകാർ തള്ളിയതിനെത്തുടർന്ന് സംഘം പെരിയോൻ ഗോപാലകൃഷ്ണപിള്ള പതിനെട്ടാംപടിയിൽ മുട്ടിടിച്ച് വീണു. ശബരിമലയുമായി ആഴത്തിലുള്ള ആചാരബന്ധമുള്ള അമ്പലപ്പുഴ സംഘത്തോടുള്ള പോലീസിന്റെ പരിധിവിട്ട പെരുമാറ്റത്തിനെതിരെ ഭക്തർക്കിടയിൽ വ്യാപക പ്രതിഷേധമുയർന്നിട്ടുണ്ട്.

ആചാരങ്ങൾ തടഞ്ഞതായി ആക്ഷേപം

എരുമേലി പേട്ട തുള്ളലിന് ശേഷം സന്നിധാനത്തെത്തിയ അമ്പലപ്പുഴ സംഘം, ആചാരപ്രകാരം എല്ലാവരും ഒത്തുചേർന്നാണ് പതിനെട്ടാംപടി കയറുന്നത്. ഇതിനായി പടിക്ക് താഴെ ബാക്കിയുള്ളവർക്കായി കാത്തുനിന്ന പെരിയോനെയും സംഘത്തെയും ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥൻ അസഭ്യം പറയുകയും പടികയറാൻ നിർബന്ധിക്കുകയും ചെയ്തെന്നാണ് ആരോപണം.

തർക്കത്തിന് നിൽക്കാതെ പടികയറാൻ ശ്രമിച്ച പെരിയോനെയും കൂടെയുള്ളവരെയും പോലീസുകാർ ബലം പ്രയോഗിച്ച് തള്ളുകയും മർദിക്കുകയും ചെയ്തുവെന്ന് സംഘാംഗങ്ങൾ പറഞ്ഞു. ചില ഭക്തരുടെ വയറ്റിൽ പോലീസുകാർ കുത്തിയതായും പരാതിയുണ്ട്. "എടാ, പോടാ" എന്ന് വിളിച്ചായിരുന്നു പോലീസുകാർ സംസാരിച്ചതെന്നും, ചോദ്യം ചെയ്തപ്പോൾ പ്രകോപനപരമായി പ്രതികരിച്ചതായും പേട്ട സംഘം ആരോപിച്ചു.

എഡിജിപിക്ക് പരാതി നൽകി

സംഭവത്തിൽ ശബരിമല സ്പെഷ്യൽ ഓഫീസർ എഡിജിപി എസ്. ശ്രീജിത്തിന് അമ്പലപ്പുഴ സംഘം നേരിട്ട് പരാതി നൽകി. പടി ചവിട്ടുന്ന സമയത്തെ സിസിടിവി ദൃശ്യങ്ങൾ പരിശോധിച്ച് കുറ്റക്കാരായ പോലീസുകാർക്കെതിരെ കർശന നടപടിയെടുക്കുമെന്ന് എഡിജിപി ഉറപ്പുനൽകിയതായി സംഘം വ്യക്തമാക്കി.

അമ്പലപ്പുഴ സംഘത്തിന് ശബരിമലയിൽ ലഭിക്കേണ്ട പ്രത്യേക പരിഗണനയും ആചാരപരമായ പ്രാധാന്യവും കണക്കിലെടുക്കാതെയുള്ള പോലീസിന്റെ നടപടി വലിയ വിവാദങ്ങൾക്കാണ് വഴിതെളിച്ചിരിക്കുന്നത്.