മഹാമാഘ മഹോത്സവം: തിരക്ക് നിയന്ത്രിക്കാൻ പ്രത്യേക ട്രെയിനുകൾ; കുറ്റിപ്പുറത്ത് കൂടുതൽ സ്റ്റോപ്പുകൾ അനുവദിച്ചു

തിരുനാവായ: ഭാരതപ്പുഴയുടെ തീരത്ത് നടക്കുന്ന മഹാമാഘ ഉത്സവത്തിന് എത്തുന്ന തീർത്ഥാടകരുടെ തിരക്ക് പരിഗണിച്ച് റെയിൽവേ പ്രത്യേക ട്രെയിനുകൾ അനുവദിച്ചു.

ഉത്തരേന്ത്യയിൽ നിന്നുള്ള ഭക്തർക്കായി വാരണാസി, യോഗ് നാഗരി ഹൃഷികേശ് എന്നിവിടങ്ങളിൽ നിന്നാണ് സ്പെഷ്യൽ ട്രെയിനുകൾ സർവീസ് നടത്തുന്നത്. ഇതിന് പുറമെ, ഉത്സവകാലത്തെ തിരക്ക് കണക്കിലെടുത്ത് കുറ്റിപ്പുറം സ്റ്റേഷനിൽ വിവിധ ട്രെയിനുകൾക്ക് താൽക്കാലിക സ്റ്റോപ്പുകളും അനുവദിച്ചിട്ടുണ്ട്.

പ്രത്യേക ട്രെയിനുകളുടെ സമയക്രമം

1. വാരണാസി - എറണാകുളം സ്പെഷൽ (04358):

പുറപ്പെടുന്നത്: ജനുവരി 30-ന് വൈകിട്ട് 4:30-ന് വാരണാസി ജങ്ഷനിൽ നിന്ന്.

റൂട്ട്: ജബൽപൂർ, നാഗ്‌പൂർ, തിരുപ്പൂർ, കോയമ്പത്തൂർ വഴി പാലക്കാട് (വൈകിട്ട് 5:43), തൃശൂർ (7:03), ആലുവ (8:23) എത്തും. രാത്രി 10-ന് എറണാകുളം ജങ്ഷനിൽ സർവീസ് അവസാനിക്കും.

മടക്കയാത്ര: ഫെബ്രുവരി 3-ന് രാത്രി 8-ന് എറണാകുളത്ത് നിന്ന് പുറപ്പെടും.

2. ഹൃഷികേശ് - എറണാകുളം സ്പെഷൽ:

പുറപ്പെടുന്നത്: ജനുവരി 30-ന് രാവിലെ 7-ന് യോഗ് നാഗരി ഹൃഷികേശിൽ നിന്ന്.

റൂട്ട്: ഫെബ്രുവരി 1-ന് ഉച്ചയ്ക്ക് 12:50-ന് മംഗലാപുരത്തെത്തും. തുടർന്ന് കണ്ണൂർ (2:23 PM), കോഴിക്കോട് (5:08 PM), തിരൂർ (5:44 PM), കുറ്റിപ്പുറം (6:00 PM), ഷൊർണൂർ (6:30 PM) എന്നിവിടങ്ങളിൽ സ്റ്റോപ്പുണ്ടാകും. രാത്രി 11:30-ന് എറണാകുളത്തെത്തും.

മടക്കയാത്ര: ഫെബ്രുവരി 3-ന് രാത്രി 11-ന് എറണാകുളത്ത് നിന്ന് പുറപ്പെട്ട് പുലർച്ചെ 2:45-ന് കുറ്റിപ്പുറത്തെത്തും.

കുറ്റിപ്പുറം സ്റ്റേഷനിൽ താൽക്കാലിക സ്റ്റോപ്പുകൾ

തീർത്ഥാടകരുടെ സൗകര്യാർത്ഥം താഴെ പറയുന്ന ട്രെയിനുകൾക്ക് ദക്ഷിണ റെയിൽവേ കുറ്റിപ്പുറത്ത് സ്റ്റോപ്പ് അനുവദിച്ചു:

തിരുവനന്തപുരം - മംഗലാപുരം അന്ത്യോദയ എക്സ്പ്രസ് (16355): ജനുവരി 30-ന് കുറ്റിപ്പുറത്ത് സ്റ്റോപ്പ് അനുവദിച്ചു.

തിരുവനന്തപുരം സെൻട്രൽ ജനശതാബ്ദി എക്സ്പ്രസ് (12081): ജനുവരി 31-നും കുറ്റിപ്പുറത്ത് നിർത്തും.

മംഗളൂരു സെൻട്രൽ സൂപ്പർഫാസ്‌റ്റ്‌ എക്‌സ്പ്രസ് (12685): ജനുവരി 30, 31 തീയതികളിൽ കുറ്റിപ്പുറത്ത് സ്റ്റോപ്പുണ്ടാകും.

ഉത്സവത്തിനെത്തുന്ന ഭക്തർക്ക് ഈ സേവനങ്ങൾ വലിയ ആശ്വാസമാകുമെന്ന് റെയിൽവേ അറിയിച്ചു.