'ആദ്യം വെടിവെക്കുക, ചോദ്യങ്ങൾ പിന്നീട്; ഡെന്മാർക്ക് ; ഗ്രീൻലാൻഡിനെ ലക്ഷ്യമിട്ട് ഡൊണാൾഡ് ട്രംപ്

 കോപ്പൻഹേഗൻ: ഗ്രീൻലാൻഡ് പിടിച്ചെടുക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ ആവർത്തിച്ചുള്ള ഭീഷണികൾക്ക് പിന്നാലെ, പ്രതിരോധ നടപടികൾ ശക്തമാക്കി ഡെന്മാർക്കും ഗ്രീൻലാൻഡും.

വിദേശ അധിനിവേശം ഉണ്ടായാൽ ഒട്ടും വൈകാതെ തിരിച്ചടിക്കാനാണ് സൈന്യത്തിന് ലഭിച്ചിരിക്കുന്ന കർശന നിർദ്ദേശം.

'ആദ്യം വെടിവെക്കുക, ചോദ്യങ്ങൾ പിന്നീട്' അമേരിക്ക ഗ്രീൻലാൻഡ് ആക്രമിക്കുകയാണെങ്കിൽ, മേലധികാരികളുടെ ഉത്തരവിനായി കാത്തുനിൽക്കാതെ തന്നെ പ്രത്യാക്രമണം നടത്താൻ സൈനികർക്ക് നിർദ്ദേശം നൽകിയതായി ഡാനിഷ് പ്രതിരോധ മന്ത്രാലയം വ്യക്തമാക്കി. 1952-ലെ സൈനിക നിയമങ്ങൾ ഉദ്ധരിച്ചുകൊണ്ട്, യുദ്ധപ്രഖ്യാപനം ഉണ്ടായാലും ഇല്ലെങ്കിലും ശത്രുരാജ്യത്തിന്റെ കടന്നുകയറ്റത്തെ തൽക്ഷണം പ്രതിരോധിക്കാനാണ് നിർദ്ദേശിച്ചിരിക്കുന്നത്. വെനിസ്വേലയിലെ സൈനിക നടപടികൾക്ക് പിന്നാലെ ട്രംപ് ഗ്രീൻലാൻഡിൽ കണ്ണുവെക്കുന്നത് ഡെന്മാർക്കിനെ കടുത്ത ആശങ്കയിലാക്കിയിട്ടുണ്ട്.

ദേശീയ സുരക്ഷാ മുൻഗണനയെന്ന് വൈറ്റ് ഹൗസ് ഗ്രീൻലാൻഡ് ഏറ്റെടുക്കുക എന്നത് അമേരിക്കയുടെ ദേശീയ സുരക്ഷാ മുൻഗണനയാണെന്ന് വൈറ്റ് ഹൗസ് പ്രസ് സെക്രട്ടറി കരോളിൻ ലീവിറ്റ് വ്യക്തമാക്കി. ആർട്ടിക് മേഖലയിലെ ശത്രുക്കളെ പ്രതിരോധിക്കാൻ ഗ്രീൻലാൻഡ് അത്യാവശ്യമാണെന്നും ഇതിനായി സൈനിക നീക്കം ഉൾപ്പെടെയുള്ള എല്ലാ സാധ്യതകളും പരിഗണനയിലാണെന്നും അവർ കൂട്ടിച്ചേർത്തു.

നയതന്ത്ര ചർച്ചകൾ പരാജയപ്പെടുന്നു ഗ്രീൻലാൻഡ് വില്പനയ്ക്കുള്ളതല്ലെന്ന് ഡെന്മാർക്കും ഗ്രീൻലാൻഡും ആവർത്തിച്ച് വ്യക്തമാക്കുന്നുണ്ടെങ്കിലും യുഎസ് സമ്മർദ്ദം തുടരുകയാണ്. ഇതിന്റെ ഭാഗമായി ഡെന്മാർക്ക് അംബാസഡർ ജെസ്പർ മുള്ളർ സോറൻസണും ഗ്രീൻലാൻഡ് പ്രതിനിധി ജേക്കബ് ഇസ്‌ബോസെത്സനും കഴിഞ്ഞ ദിവസം വൈറ്റ് ഹൗസ് ഉദ്യോഗസ്ഥരുമായി കൂടിക്കാഴ്ച നടത്തി. എന്നാൽ വാങ്ങാനുള്ള നീക്കത്തിൽ നിന്ന് പിന്നോട്ടില്ലെന്നാണ് ട്രംപ് ഭരണകൂടത്തിന്റെ നിലപാട്.

നാറ്റോ സഖ്യം അപകടത്തിലെന്ന് ഡെന്മാർക്ക് ഗ്രീൻലാൻഡിനെതിരായ ഏതൊരു നീക്കവും നാറ്റോ (NATO) സഖ്യത്തിന്റെ തകർച്ചയ്ക്ക് കാരണമാകുമെന്ന് ഡാനിഷ് പ്രധാനമന്ത്രി മെറ്റ് ഫ്രെഡറിക്സൺ മുന്നറിയിപ്പ് നൽകി. രണ്ടാം ലോകമഹായുദ്ധത്തിന് ശേഷം നിലനിൽക്കുന്ന ആഗോള സുരക്ഷാ ക്രമത്തെ തകർക്കുന്ന നീക്കമാണിതെന്നും അവർ ട്രംപിനെ ഓർമ്മിപ്പിച്ചു. 2019 മുതൽ ഗ്രീൻലാൻഡ് വാങ്ങാനുള്ള താല്പര്യം ട്രംപ് പ്രകടിപ്പിക്കുന്നുണ്ടെങ്കിലും, ഈ നീക്കം വലിയ രാജ്യാന്തര സംഘർഷങ്ങളിലേക്കാണ് വിരൽ ചൂണ്ടുന്നത്.