പരപുരുഷ ബന്ധം കണ്ടുപിടിച്ച അഞ്ചുവയസ്സുകാരനെ കെട്ടിടത്തിന് മുകളിൽ നിന്ന് തള്ളിയിട്ടു കൊന്നു; അമ്മയ്ക്ക് ജീവപര്യന്തം തടവ്

 ഗ്വാളിയോർ: അവിഹിത ബന്ധത്തിന് തടസ്സമാകുമെന്ന് ഭയന്ന് അഞ്ചുവയസ്സുകാരനായ മകനെ കെട്ടിടത്തിന് മുകളിൽ നിന്ന് തള്ളിയിട്ടു കൊലപ്പെടുത്തിയ കേസിൽ അമ്മയ്ക്ക് ജീവപര്യന്തം തടവ് ശിക്ഷ.

മധ്യപ്രദേശിലെ ഗ്വാളിയോറിലാണ് നാടിനെ നടുക്കിയ ഈ ക്രൂരകൃത്യം നടന്നത്. പോലീസ് കോൺസ്റ്റബിളായ ധ്യാൻ സിങ് റാത്തോഡിന്റെ ഭാര്യ ജ്യോതി റാത്തോഡിനെയാണ് കോടതി ശിക്ഷിച്ചത്. അയൽവാസിയുമായുള്ള തന്റെ രഹസ്യബന്ധം കുട്ടി അച്ഛനോട് പറയുമെന്ന് ഭയന്നാണ് ജ്യോതി മകനെ കൊലപ്പെടുത്തിയതെന്ന് കോടതി കണ്ടെത്തി.

2023 ഏപ്രിൽ 28-നായിരുന്നു കേസിനാസ്പദമായ സംഭവം. അയൽവാസിയായ ഉദയ് ഇൻഡോലിയ എന്ന യുവാവുമായി ജ്യോതി രഹസ്യബന്ധം പുലർത്തിയിരുന്നു. സംഭവദിവസം ഇരുവരും തമ്മിലുള്ള ലൈംഗികബന്ധം മകൻ ജതിൻ കാണാനിടയായി. ഇക്കാര്യം അച്ഛൻ വരുമ്പോൾ പറയുമെന്ന് കുട്ടി വിളിച്ചു പറഞ്ഞതോടെ പ്രകോപിതയായ ജ്യോതി, മകനെ വീടിന്റെ രണ്ടാം നിലയിലെ മേൽക്കൂരയിൽ നിന്ന് താഴേക്ക് തള്ളിയിടുകയായിരുന്നു. ഗുരുതരമായി പരിക്കേറ്റ ജതിൻ ചികിത്സയിലിരിക്കെ 24 മണിക്കൂറിനുള്ളിൽ മരണത്തിന് കീഴടങ്ങി.

ആദ്യം ഒരു അപകടമരണമെന്ന നിലയിലാണ് കേസ് കണക്കാക്കപ്പെട്ടിരുന്നത്. എന്നാൽ മകന്റെ മരണത്തിന് രണ്ടാഴ്ചയ്ക്ക് ശേഷം ജ്യോതി ഭർത്താവിനോട് കുറ്റം സമ്മതിച്ചതോടെയാണ് കൊലപാതക വിവരം പുറംലോകമറിയുന്നത്. ഭാര്യയുടെ കുറ്റസമ്മതം ധ്യാൻ സിങ് റാത്തോഡ് രഹസ്യമായി മൊബൈലിൽ റെക്കോർഡ് ചെയ്യുകയും വീടിനുള്ളിലെ സിസിടിവി ദൃശ്യങ്ങൾ സഹിതം പോലീസിൽ പരാതി നൽകുകയുമായിരുന്നു. സ്വന്തം മകനോട് കാട്ടിയ ക്രൂരത പുറത്തുകൊണ്ടുവരാൻ പിതാവ് കാണിച്ച മനക്കരുത്താണ് കേസിൽ നിർണ്ണായകമായത്.

വിചാരണ വേളയിൽ ജ്യോതിയുടെ കാമുകൻ ഉദയ് ഇൻഡോലിയയെയും പ്രതിയാക്കിയിരുന്നുവെങ്കിലും ഇയാൾക്കെതിരെ വ്യക്തമായ തെളിവുകൾ ഹാജരാക്കാൻ പ്രോസിക്യൂഷന് സാധിച്ചില്ല. ഇതോടെ കോടതി ഇയാളെ വെറുതെ വിട്ടു. എന്നാൽ ജ്യോതിക്കെതിരെയുള്ള ഡിജിറ്റൽ തെളിവുകളും സാക്ഷിമൊഴികളും കണക്കിലെടുത്ത കോടതി, അവർ കുറ്റക്കാരിയാണെന്ന് വിധിക്കുകയും ജീവപര്യന്തം തടവിന് ശിക്ഷിക്കുകയുമായിരുന്നു.