"റഹ്മാൻ കാരണം വാദ്യകലാകാരന്മാർ പട്ടിണിയിൽ"; രൂക്ഷമായ ആരോപണങ്ങളുമായി ഗായകൻ അഭിജിത് ഭട്ടാചാര്യ

 മുംബൈ: പ്രശസ്ത സംഗീത സംവിധായകൻ എ.ആർ. റഹ്മാനെതിരെ ഗുരുതരമായ ആരോപണങ്ങളുമായി പിന്നണി ഗായകൻ അഭിജിത് ഭട്ടാചാര്യ.

സിനിമയിലെ വാദ്യകലാകാരന്മാർക്ക് ജോലി നഷ്ടപ്പെടാൻ കാരണം റഹ്മാന്റെ പ്രവർത്തനരീതിയാണെന്ന് അഭിജിത് ആരോപിച്ചു. അടുത്തിടെ നൽകിയ ഒരു പോഡ്‌കാസ്റ്റ് അഭിമുഖത്തിലാണ് റഹ്മാനെ ലക്ഷ്യം വെച്ച് അദ്ദേഹം വിവാദ പരാമർശങ്ങൾ നടത്തിയത്.

​സാങ്കേതികവിദ്യയുടെ അതിപ്രസരം തൊഴിൽ നഷ്ടപ്പെടുത്തി

​സിനിമയിൽ തത്സമയം സംഗീതം വായിച്ചിരുന്ന നൂറുകണക്കിന് കലാകാരന്മാർ ഇന്ന് തൊഴിലില്ലാതെ വീട്ടിലിരിക്കുകയാണെന്ന് അഭിജിത് പറഞ്ഞു. "എല്ലാം ലാപ്‌ടോപ്പിലൂടെ ചെയ്യാമെന്നും സംഗീതജ്ഞരുടെ ആവശ്യമില്ലെന്നും റഹ്മാൻ എല്ലാവരോടും പറഞ്ഞു. അദ്ദേഹം വലിയ സാമ്പത്തിക നേട്ടമുണ്ടാക്കിയപ്പോൾ പാവപ്പെട്ട വാദ്യകലാകാരന്മാർ വഴിയാധാരമായി. മുൻപ് റെക്കോർഡിംഗുകളിൽ 50-ഉം 100-ഉം വയലിനിസ്റ്റുകൾ ഒരുമിച്ച് ഇരിക്കുമായിരുന്നു. ഇന്ന് അവരെല്ലാം പ്രോഗ്രാമിംഗിലേക്ക് ഒതുക്കപ്പെട്ടു," അഭിജിത് കുറ്റപ്പെടുത്തി.

​മുതിർന്ന കലാകാരന്മാരോടുള്ള റഹ്മാന്റെ സമീപനത്തെയും അദ്ദേഹം വിമർശിച്ചു. പത്മഭൂഷൺ, പത്മശ്രീ പുരസ്കാരങ്ങൾ ലഭിച്ച മുതിർന്ന സംഗീതജ്ഞർ റഹ്മാന്റെ സ്റ്റുഡിയോയിൽ അദ്ദേഹത്തെ കാണാൻ മണിക്കൂറുകളോളം കാത്തുനിൽക്കേണ്ടി വന്നിട്ടുണ്ടെന്നും അദ്ദേഹം കൂട്ടിച്ചേർത്തു.

​വിവാദങ്ങൾക്കും വിശദീകരണങ്ങൾക്കുമിടയിൽ റഹ്മാൻ

​ബോളിവുഡിൽ തനിക്ക് അവസരങ്ങൾ കുറയുകയാണെന്നും ഇതിന് പിന്നിൽ ചില നിക്ഷിപ്ത താൽപ്പര്യങ്ങളുണ്ടെന്നും റഹ്മാൻ നേരത്തെ ബിബിസിക്ക് നൽകിയ അഭിമുഖത്തിൽ പറഞ്ഞിരുന്നു. ഇത് വലിയ രാഷ്ട്രീയ വിവാദങ്ങൾക്ക് കാരണമായതോടെ വിശദീകരണവുമായി റഹ്മാൻ തന്നെ നേരിട്ട് രംഗത്തെത്തി.

​ആരെയും വേദനിപ്പിക്കാൻ താൻ ഉദ്ദേശിച്ചിട്ടില്ലെന്നും സംഗീതത്തിലൂടെ രാജ്യത്തെ സേവിക്കുക മാത്രമാണ് തന്റെ ലക്ഷ്യമെന്നും റഹ്മാൻ വീഡിയോ സന്ദേശത്തിലൂടെ വ്യക്തമാക്കി. ഇന്ത്യയാണ് തന്റെ പ്രചോദനമെന്നും ചിലപ്പോൾ തന്റെ വാക്കുകൾ തെറ്റായി വ്യാഖ്യാനിക്കപ്പെടുകയാണെന്നും അദ്ദേഹം പറഞ്ഞു. ജാവേദ് അക്തർ, ഷാൻ തുടങ്ങിയ പ്രമുഖരും റഹ്മാന്റെ മുൻ പ്രസ്താവനകളിൽ അഭിപ്രായപ്രകടനങ്ങളുമായി രംഗത്തെത്തിയിട്ടുണ്ട്.