മുംബൈയിൽ അർബൻ കമ്പനി ജീവനക്കാരിയും വീട്ടമ്മയും തമ്മിൽ കൈയാങ്കളി: ദൃശ്യങ്ങൾ പുറത്ത്; കേസെടുത്തു

മുംബൈ: ഓൺലൈൻ സേവനദാതാക്കളായ അർബൻ കമ്പനിയിലെ (Urban Company) മസാജ് തെറാപ്പിസ്റ്റും ഉപഭോക്താവും തമ്മിൽ മുംബൈയിൽ നടുറോഡിലും വീട്ടിലുമായി നടന്ന കയ്യാങ്കളിയുടെ ദൃശ്യങ്ങൾ പുറത്ത്.

വടാല ഈസ്റ്റിലെ ഭക്തി പാർക്കിൽ താമസിക്കുന്ന 46-കാരിയായ പി.ആർ. പ്രൊഫഷണൽ ഷെഹ്നാസ് വാഹിദ് സയ്യിദും തെറാപ്പിസ്റ്റ് അശ്വിനി ശിവനാഥ് വർതാപിയും (32) തമ്മിലാണ് സംഘർഷമുണ്ടായത്. സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.

ബുക്കിംഗ് റദ്ദാക്കിയതിനെച്ചൊല്ലി തർക്കം

കഴിഞ്ഞ ബുധനാഴ്ചയാണ് കേസിനാസ്പദമായ സംഭവം നടന്നത്. തോളിലെ വേദനയ്ക്ക് (Frozen Shoulder) ആശ്വാസം തേടിയാണ് ഷെഹ്നാസ് അർബൻ കമ്പനി വഴി മസാജ് ബുക്ക് ചെയ്തത്. എന്നാൽ, തെറാപ്പിസ്റ്റ് കൊണ്ടുവന്ന മസാജ് ബെഡ് വൃത്തിഹീനമാണെന്നും ഉപയോഗിക്കാൻ അനുയോജ്യമല്ലെന്നും ചൂണ്ടിക്കാട്ടി ഷെഹ്നാസ് സേവനം റദ്ദാക്കി. ഇതോടെ ഇരുവരും തമ്മിൽ തർക്കം ആരംഭിക്കുകയായിരുന്നു.

📍#Mumbai Wadala: A therapist from #Urban Company, a home-based service platform, had arrived to perform a massage. However, when the therapist arrived, the woman canceled her session.

1/2 pic.twitter.com/3k9Lg5ByCg

— Siraj Noorani (@sirajnoorani) January 23, 2026

പരസ്പരം മർദ്ദനം; ദൃശ്യങ്ങൾ പകർത്തി വീട്ടുകാർ

തർക്കം മൂർച്ഛിച്ചതോടെ ജീവനക്കാരി മൊബൈൽ ഫോണിൽ ദൃശ്യങ്ങൾ പകർത്താൻ ശ്രമിച്ചു. ഇത് തടയാൻ ഷെഹ്നാസ് ശ്രമിച്ചതോടെയാണ് രംഗം വഷളായത്. വൈറലായ വീഡിയോയിൽ ഇരുവരും പരസ്പരം മുടിക്ക് കുത്തിപ്പിടിക്കുകയും അടിക്കുകയും ചെയ്യുന്നത് കാണാം. ജീവനക്കാരിയെ ഷെഹ്നാസ് കട്ടിലിലേക്ക് തള്ളിയിടുന്നതും ജീവനക്കാരി തിരിച്ച് ഷെഹ്നാസിനെ ആക്രമിക്കുന്നതും വീഡിയോയിലുണ്ട്. ഷെഹ്നാസിന്റെ മകൻ പകർത്തിയ ദൃശ്യങ്ങളിൽ "ഇതൊരു ഭ്രാന്തിയൊരു സ്ത്രീയാണെന്നും തന്റെ അമ്മയെ വീട്ടിൽ കയറി അടിക്കുകയാണെന്നും" അവൻ പറയുന്നത് കേൾക്കാം. പോലീസിനെ വിളിക്കുമെന്നും നിന്റെ കരിയർ തീർക്കുമെന്നും മകൻ വീഡിയോയിൽ മുന്നറിയിപ്പ് നൽകുന്നുണ്ട്.

പരിക്കേറ്റെന്ന് പരാതി; പോലീസ് കേസ്

സംഭവത്തിന് പിന്നാലെ ഷെഹ്നാസ് വടാല പോലീസിനെ സമീപിച്ചു. ജീവനക്കാരി തന്റെ മുടിക്ക് പിടിച്ചു വലിച്ചെന്നും കണ്ണിന് പരിക്കേൽപ്പിച്ചെന്നും നിലത്തേക്ക് തള്ളിയിട്ടെന്നും ഷെഹ്നാസ് പരാതിയിൽ ആരോപിക്കുന്നു. സംഭവത്തിൽ അശ്വിനി ശിവനാഥിനെതിരെ ഭാരതീയ ന്യായ സംഹിത (BNS) സെക്ഷൻ 115(2) പ്രകാരം നോൺ-കോഗ്നിസിബിൾ (NC) കുറ്റം ചുമത്തി പോലീസ് കേസെടുത്തു. സംഭവത്തിൽ കൂടുതൽ അന്വേഷണം നടന്നു വരികയാണ്.