കുടിയേറ്റക്കാരെ കൊള്ളയടിച്ച് ഇമിഗ്രേഷൻ ഉദ്യോഗസ്ഥർ,ഈ അഴിമതിയിൽ നിരവധിപേർ പിടിയിൽ

യുകെ ; ബ്രിട്ടനിലെത്തുന്ന കുടിയേറ്റക്കാരെ സഹായിക്കേണ്ടതിന് പകരം അവരിൽ നിന്ന് പണം മോഷ്ടിക്കുകയും അത് വെളുപ്പിക്കാൻ ശ്രമിക്കുകയും ചെയ്ത ആറ് ഇമിഗ്രേഷൻ ഉദ്യോഗസ്ഥർ പിടിയിൽ.

ഹോം ഓഫീസും ക്രൗൺ പ്രോസിക്യൂഷൻ സർവീസും (CPS) നടത്തിയ ദീർഘകാല അന്വേഷണത്തിനൊടുവിലാണ് ഈ അഴിമതി പുറത്തുവന്നത്.കുറ്റകൃത്യം നടന്നത് പദവി ദുരുപയോഗം ചെയ്ത് സറേ, കെന്റ്, ബെർക്ഷയർ, ലണ്ടൻ എന്നിവിടങ്ങളിൽ നിന്നുള്ള ഉദ്യോഗസ്ഥരാണ് പിടിയിലായത്.

2021 ഓഗസ്റ്റ് മുതൽ 2022 നവംബർ വരെയുള്ള കാലയളവിലാണ് ഇവർ കുടിയേറ്റക്കാരെ ലക്ഷ്യമിട്ട് കൊള്ള നടത്തിയത്. ഔദ്യോഗിക പദവി ദുരുപയോഗം ചെയ്യൽ, മോഷണത്തിനുള്ള ഗൂഢാലോചന, കള്ളപ്പണം വെളുപ്പിക്കൽ തുടങ്ങിയ ഗുരുതരമായ വകുപ്പുകളാണ് ഇവർക്കെതിരെ ചുമത്തിയിരിക്കുന്നത്.

ബെസ്മിർ മാറ്റേര (36, സറേ): ഇയാൾക്കെതിരെ മോഷണ ഗൂഢാലോചനയ്ക്കും കള്ളപ്പണം വെളുപ്പിക്കലിനും പുറമെ, വ്യാജരേഖ ചമയ്ക്കൽ, വഞ്ചനയിലൂടെ യുകെയിൽ പ്രവേശിക്കാൻ ശ്രമിക്കൽ തുടങ്ങിയ കുറ്റങ്ങളും ചുമത്തിയിട്ടുണ്ട്. ജാക്ക് മിച്ചൽ (33, കെന്റ്): ഔദ്യോഗിക പദവി ദുരുപയോഗം ചെയ്തതിനും മോഷണത്തിനും പ്രതി. ലീ-ആൻ ഇവാൻസൺ (42, ബെർക്ഷയർ): മോഷണ ഗൂഢാലോചനയിൽ പങ്കാളി. ജോൺ ബെർന്താൾ (53, ലണ്ടൻ): ഔദ്യോഗിക പദവി ദുരുപയോഗം ചെയ്തതിന് കുറ്റം ചുമത്തി. ബെൻ എഡ്വേർഡ്സ് (45, ലണ്ടൻ): മോഷണക്കേസിലെ മറ്റൊരു പ്രതി. ഡേവിഡ് ഗ്രണ്ടി (43, ലണ്ടൻ): കള്ളപ്പണം വെളുപ്പിക്കലുമായി ബന്ധപ്പെട്ട കുറ്റങ്ങൾ.

ഹോം ഓഫീസിലെ ഉന്നതതല സംഘമാണ് ഈ ഉദ്യോഗസ്ഥരുടെ സാമ്പത്തിക ഇടപാടുകളെക്കുറിച്ച് അന്വേഷണം നടത്തിയത്. പ്രതികൾക്കെതിരെ വിചാരണ തുടങ്ങാൻ ആവശ്യമായ തെളിവുകൾ ഉണ്ടെന്നും ഇത് പൊതുതാൽപ്പര്യമുള്ള കേസാണെന്നും സി.പി.എസ് സ്പെഷ്യൽ ക്രൈം ഡിവിഷൻ മേധാവി മാൽക്കം മക്ഹാഫി പറഞ്ഞു. 

പിടിയിലായ ആറ് പേരും ജനുവരി 29-ന് വെസ്റ്റ്മിനിസ്റ്റർ മജിസ്‌ട്രേറ്റ് കോടതിയിൽ ഹാജരാകണം. കുടിയേറ്റക്കാർക്കെതിരെയുള്ള അതിക്രമങ്ങളും സർക്കാർ ഉദ്യോഗസ്ഥരുടെ അഴിമതിയും യുകെയിൽ വലിയ ചർച്ചയായിരിക്കുന്ന സാഹചര്യത്തിൽ ഈ കേസ് അതീവ ഗൗരവത്തോടെയാണ് രാജ്യം നോക്കിക്കാണുന്നത്.