മുഴങ്ങുന്ന കൂട്ടൻ മണികളുടെ പേടിപ്പിക്കുന്ന ശബ്ദം.... ചങ്ങലകൾ തമ്മിൽ ഇടിക്കുന്ന ഭീകര മുദ്രാവാക്യങ്ങൾ..മ്യൂണിക്കിലെ ‘ക്രാമ്പസ് റൺ'' ഭയന്നും ആസ്വദിച്ചും ജനങ്ങൾ

യുകെ;അപ്രതീക്ഷിതമായി മുഴങ്ങുന്ന കൂട്ടൻ മണികളുടെ പേടിപ്പിക്കുന്ന ശബ്ദം.... ചങ്ങലകൾ തമ്മിൽ ഇടിക്കുന്ന ഭീകര മുദ്രാവാക്യങ്ങൾ.... ഭയാനകമായ അന്തരീക്ഷത്തെ കീറിമുറിച്ച് ഭീകരരൂപിയായ സത്വം നഗരവീഥികളിലൂടെ മുന്നേറുന്നു. ചുറ്റും മുഖംമൂടി ധരിച്ച ഭീകരന്മാർ വേറെയും.

പേടിച്ചരണ്ടു കുട്ടികൾ വീട്ടിലൊളിക്കുന്നു. ധൈര്യശാലികളായ കുട്ടികൾ ആസ്വദിക്കുന്നു. മ്യൂണിക്കിലെ ‘ക്രാമ്പസ് റൺ’ കാണുമ്പോൾ ആദ്യം ഭയക്കുമെങ്കിലും ഇത് ആചാരത്തിന്റെ ഭാഗമായി കാണുമ്പോൾ ജർമൻ ജനത ഇതിനെ ആഘോഷമാക്കുകയാണ്.ജർമൻ നഗരവീഥികളെ ആവേശമാക്കി ക്രാമ്പസ് റൺ ആഘോഷം പൂർത്തിയായതോടെ ക്രിസ്മസ് ആഘോഷങ്ങൾക്കും ആരവങ്ങൾക്കും ജർമനിയിൽ വേദിയുണരുകയാണ്. 

ഡിസംബർ 5ന് നടന്ന ക്രാമ്പസ് റൺ ആഘോഷത്തെ ജർമൻ ജനതയും മറ്റു രാജ്യത്തുനിന്നുള്ളവരും ഉത്സവമാക്കുകയായിരുന്നു. ഇപ്പോൾ ക്രിസ്മസ് ആഘോഷങ്ങളിൽ മുഴുകിയിരിക്കുകയാണ് നഗരവും വിപണികളും. ക്രിസ്മസ് വിശേഷങ്ങൾ പങ്കുവയ്ക്കുകയാണ് ജർമനിയിൽ വിദ്യാർഥിയായ പത്തനംതിട്ട സ്വദേശി ലിബിൻ തങ്കച്ചൻ.

ക്രാമ്പസ് റൺ: ശീതകാലത്തിന്റെ ആഘോഷം യൂറോപ്പിലെ ശീതകാല ആഘോഷങ്ങളിൽ ഏറ്റവും വ്യത്യസ്തവും ശ്രദ്ധേയവുമായ ഒന്നാണ് ക്രാമ്പസ് റൺ (Krampus Run / Krampuslauf). ജർമനിയിലെ മ്യൂണിക് ഉൾപ്പെടെയുള്ള ആൽപൈൻ മേഖലകളിൽ വർഷംതോറും ഡിസംബർ ആദ്യവാരമാണ് ഈ അപൂർവമായ ആഘോഷം നടക്കുന്നത്. ഭീതിയുണർത്തുന്ന മുഖാവരണങ്ങളും കൊമ്പുകളും രോമവേഷങ്ങളുമണിഞ്ഞ് തെരുവുകളിലൂടെ മാർച്ച് ചെയ്യുന്ന ഈ ചടങ്ങ്, നൂറ്റാണ്ടുകൾ പഴക്കമുള്ള യൂറോപ്യൻ ജനവിശ്വാസങ്ങളുടെ ജീവനുള്ള രൂപമാണ്.

എന്താണ് ക്രാമ്പസ് റൺ? ക്രാമ്പസ് എന്ന ഭീകര കഥാപാത്രത്തെ ആസ്പദമാക്കിയുള്ള പരമ്പരാഗത പ്രകടനാഘോഷമാണ് ക്രാമ്പസ് റൺ. ക്രാമ്പസ് എന്നത് പാതി മനുഷ്യനും പാതി ആടും ചേർന്ന രൂപത്തിലുള്ള ഒരു കഥാപാത്രമായി യൂറോപ്യൻ ഫോക്‌ലോറിൽ അറിയപ്പെടുന്നു. കൊമ്പുകൾ, മൂർച്ചയുള്ള പല്ലുകൾ, നീണ്ട നാവ്, രോമവേഷം, കയ്യിൽ വടികളും ചങ്ങലകളും– ഇവയൊക്കെയാണ് ക്രാമ്പസിന്റെ പരമ്പരാഗത രൂപം.

ക്രിസ്തീയ വിശ്വാസപ്രകാരം, നല്ല കുട്ടികളെ സമ്മാനങ്ങളോടെ അനുഗ്രഹിക്കുന്ന സെന്റ് നിക്കോളാസിന്റെ ശിക്ഷാവാഹകനാണ് ക്രാമ്പസ്. അച്ചടക്കമില്ലാത്ത കുട്ടികളെ ശിക്ഷിക്കുന്നതിന്റെ പ്രതീകമായാണ് ഈ കഥാപാത്രത്തെ കാണുന്നത്. ഈ ആശയത്തിന്റെ നാടകീയ അവതരണമാണ് ക്രാമ്പസ് റൺ. മ്യൂണിക്കിൽ ക്രാമ്പസ് റൺ സാധാരണയായി ഡിസംബർ 5ന് (ഡിസംബർ 6 സെന്റ് നിക്കോളാസ് ദിനത്തിനു മുൻപുള്ള ദിവസം) ആണ് സംഘടിപ്പിക്കുന്നത്. 

നഗരത്തിന്റെ ചില ഭാഗങ്ങളിലൂടെ നൂറുകണക്കിന് ആളുകൾ ക്രാമ്പസ് വേഷം ധരിച്ച് കൂട്ടമായി മാർച്ച് ചെയ്യുന്നു.ക്രാമ്പസ് റണ്ണിന്റെ ചരിത്രം ചരിത്രകാരന്മാരുടെ അഭിപ്രായത്തിൽ, ക്രാമ്പസ് റണ്ണിന്റെ വേരുകൾ ക്രിസ്തുമതത്തിന് മുൻപ് നിലനിന്നിരുന്ന പേഗൻ (Pagan) ശീതകാല ആചാരങ്ങളിലേക്കാണ് വിരൽ ചൂണ്ടുന്നത്. ശീതകാലത്തെ നീണ്ട ഇരുട്ടിനെയും ദുർശക്തികളെയും തുരത്തുന്നതിനായി ഭീകര മുഖാവരണങ്ങളും ശബ്ദങ്ങളും ഉപയോഗിച്ചിരുന്ന ആചാരങ്ങളാണ് പിന്നീട് ക്രാമ്പസ് രൂപത്തിലേക്ക് മാറിയത്.

ക്രിസ്തീയ വിശ്വാസം യൂറോപ്പിൽ വ്യാപിച്ചതോടെ, ഈ പൗരാണിക ആചാരങ്ങൾ പൂർണമായി ഇല്ലാതാക്കാതെ, സെന്റ് നിക്കോളാസ് ദിനവുമായി ബന്ധിപ്പിച്ചു. 19-ാം നൂറ്റാണ്ടിലും 20-ാം നൂറ്റാണ്ടിന്റെ തുടക്കത്തിലും ഈ ആഘോഷങ്ങൾ ‘അശ്ലീലവും ഭീകരവുമാണ്’ എന്ന കാരണം ചൂണ്ടിക്കാട്ടി ചില പ്രദേശങ്ങളിൽ നിരോധിച്ചിരുന്നു. എന്നാൽ കഴിഞ്ഞ ഏതാനും ദശകങ്ങളായി ഈ പാരമ്പര്യം ശക്തമായി തിരിച്ചുവന്നു. ഇന്ന് ക്രാമ്പസ് റൺ ഒരു സാംസ്കാരിക ഉത്സവവും ടൂറിസം ആകർഷണവും ആണ്. യൂറോപ്യൻ ഫോക്‌ലോറിന്റെ സംരക്ഷണം എന്ന നിലയിലുമാണ് ഇത് ആഘോഷിക്കപ്പെടുന്നത്. കൈകൊണ്ട് മരത്തിൽ കൊത്തിയെടുത്ത ഭീകരരൂപികളായ മുഖാവരണങ്ങളാണ് പൊതുവെ ഉപയോഗിക്കാറുള്ളത്. യഥാർഥ മൃഗങ്ങളുടെ രോമങ്ങൾ ഉപയോഗിച്ചാണ് വേഷങ്ങൾ നിർമിക്കുന്നത്. 

വലിയ മണികൾ, ചങ്ങലകൾ, തീക്കൊളുത്തുകൾ, കാണികളെ പേടിപ്പിക്കുന്ന തരത്തിലുള്ള നാടകീയ ചലനങ്ങളും ശബ്ദങ്ങളും എന്നിവ ക്രാമ്പസ് റണ്ണിന്റെ പ്രത്യേകതകളാണ്. കാണികൾക്ക് ഭയം തോന്നുന്നുവെങ്കിലും, ഇന്നത്തെ കാലത്ത് ഈ പരിപാടി വിനോദപരമായും നിയന്ത്രിതമായും നടത്തപ്പെടുന്നു. കുടുംബങ്ങളെയും കുട്ടികളെയും പരിഗണിച്ച് സുരക്ഷാ ക്രമീകരണങ്ങളും പൊലീസ് മേൽനോട്ടവുമുണ്ട്.സജീവമായി ക്രിസ്മസ് മാർക്കറ്റുകൾ ക്രാമ്പസ് റണ്ണിനുശേഷമാണ് മ്യൂണിക്കിലെ ക്രിസ്മസ് ആഘോഷങ്ങൾ ആരംഭിക്കുന്നത്. 

ക്രാമ്പസ് റൺ അവസാനിക്കുന്നതോടെ മ്യൂണിക് നഗരം പൂർണമായും ക്രിസ്മസ്-പുതുവത്സര ആഘോഷാന്തരീക്ഷത്തിലേക്ക് കടക്കുന്നു. മ്യൂണിക്കിലെ ഏറ്റവും പ്രശസ്തമായ മാരിയൻ പ്ലാറ്റ്സിലെ ക്രിസ്റ്റ്കിൻഡൽമാർക്കറ്റ് ഡിസംബർ 24 വരെ പ്രവർത്തിക്കും. ക്രിസ്മസ് അലങ്കാരങ്ങൾ, കൈത്തറി ഉൽപ്പന്നങ്ങൾ, ചൂടുള്ള ഗ്ലൂവൈൻ, 

പരമ്പരാഗത ജർമൻ ഭക്ഷണങ്ങൾ എന്നിവയാണ് ഇവിടത്തെ പ്രധാന ആകർഷകങ്ങൾ. ഇതോടൊപ്പം ടോൾവുഡ് വിന്റർ ഫെസ്റ്റിവൽ (Theresienwiese), പിങ്ക് ക്രിസ്മസ് മാർക്കറ്റ് (Stephansplatz), ഷ്വാബിംഗ്, മൂസാഖ് തുടങ്ങിയ പ്രദേശങ്ങളിലെ പ്രാദേശിക മാർക്കറ്റുകൾ എന്നിവയും നഗരത്തിൽ സജീവമാകും. ഡിസംബർ മാസം മുഴുവൻ ക്രിസ്മസ് കോൺസർട്ടുകൾ, തിയേറ്റർ പ്രകടനങ്ങൾ, ചർച്ച് കൊയറുകൾ, സംഗീത സന്ധ്യകൾ തുടങ്ങിയവയും ക്രിസ്മസ് ആഘോഷങ്ങളെ വർണാഭമാക്കും. മ്യൂസിയങ്ങളും കലാഗാലറികളും പ്രത്യേക ശീതകാല പ്രദർശനങ്ങളും ഒരുക്കാറുണ്ട്.

ഡിസംബർ 31ന് നടക്കുന്ന സിൽവസ്റ്റർ (New Year’s Eve) ആഘോഷങ്ങളോടെയാണ് മ്യൂണിക്കിലെ ശീതകാല ഉത്സവങ്ങൾ സമാപിക്കുന്നത്. ലൈവ് മ്യൂസിക്, ലൈറ്റ് ഷോകൾ, ജനകീയ പരിപാടികൾ എന്നിവയോടെ നഗരം പുതുവത്സരത്തെ വരവേൽക്കും. ഭീതിയും പാരമ്പര്യവും ചരിത്രവും ആഘോഷവും ഒരുമിച്ച് ലയിക്കുന്ന ക്രാമ്പസ് റൺ, മ്യൂണിക്കിലെ ശീതകാല ഉത്സവങ്ങളുടെ തുടക്കസൂചനയാണ്. അതിന് പിന്നാലെ നടക്കുന്ന ക്രിസ്മസ് മാർക്കറ്റുകളും സാംസ്കാരിക പരിപാടികളും ചേർന്ന്, മ്യൂണിക് നഗരത്തെ ഡിസംബർ മാസത്തിൽ യൂറോപ്പിലെ ഏറ്റവും സജീവമായ ആഘോഷ കേന്ദ്രങ്ങളിലൊന്നാക്കി മാറ്റുന്നു.