മെയ്തെയ്, കുക്കി വിഭാഗങ്ങളിൽ നിന്നുള്ള ബിജെപി എംഎൽഎമാരെ ഒരുമിച്ചിരുത്തി ചർച്ച നടത്തി ബിജെപി,സർക്കാർ രൂപീകരണത്തിന് തയ്യാറെടുക്കുന്നതായി സൂചന

ന്യൂഡൽഹി; മണിപ്പുരിൽ നീണ്ടുനിന്ന അശാന്തിയുടെ നാളുകൾക്കൊടുവിൽ സംസ്ഥാനത്തെ മെയ്തെയ്, കുക്കി വിഭാഗങ്ങളിൽ നിന്നുള്ള ബിജെപി എംഎൽഎമാരെ ഒരുമിച്ചിരുത്തി ചർച്ച നടത്തി ബിജെപി കേന്ദ്ര നേതൃത്വം.

2023 മേയ് മാസത്തിനു ശേഷം ഇതാദ്യമായാണ് ഇരുവിഭാഗങ്ങളിൽ നിന്നുള്ളവരും ഒരുമിച്ച് ഒരു യോഗത്തിൽ പങ്കെടുക്കുന്നത്. ഇതോടെ രാഷ്ട്രപതി ഭരണത്തിൽ തുടരുന്ന സംസ്ഥാനത്ത് സർക്കാർ രൂപീകരണത്തെക്കുറിച്ചുള്ള ചർച്ചകൾക്ക് വഴിയൊരുങ്ങുന്നതായി സൂചനകൾ പുറത്തുവന്നു.

ഡൽഹിയിൽ വച്ചായിരുന്നു കൂടിക്കാഴ്ച.ഡിസംബർ 12ന് രാഷ്ട്രപതി ദ്രൗപദി മുർമു മണിപ്പുരിൽ സന്ദർശനം നടത്തിയിരുന്നു. പിന്നാലെയാണ് എംഎൽഎമാരെ ഒരുമിച്ചിരുത്തി ബിജെപി ചർച്ച നടത്തിയത്.

മണിപ്പുരിലെ രാഷ്ട്രപതി ഭരണം 2026 ഫെബ്രുവരി വരെയാക്കി നേരത്തെ നീട്ടിയിരുന്നു. രാഷ്ട്രപതി ഭരണത്തിന്റെ കാലാവധി ഇനിയും നീട്ടുന്നതിന് പാർലമെന്റിന്റെയോ തിരഞ്ഞെടുപ്പ് കമ്മീഷന്റെയോ അനുമതി ആവശ്യമാണ്. ഇതോടെയാണ് സർക്കാർ രൂപീകരണ ചർച്ചകളിലേക്ക് ബിജെപി കടന്നത്.