‘ഇന്ത്യയിൽനിന്നുള്ള വമ്പൻ പിടികിട്ടാപ്പുള്ളികളാണ് ഞങ്ങൾ’ പരിഹാസവുമായി ലളിത് മോദിയും മല്യയും

ലണ്ടൻ ;സാമ്പത്തിക കുറ്റകൃത്യങ്ങളിൽപ്പെട്ട ശേഷം വിദേശത്തേക്കു കടന്നുകളഞ്ഞവരെ തിരിച്ചുകൊണ്ടുവരാനുള്ള എല്ലാ നടപടിയും കേന്ദ്രസർക്കാരിന്റെ ഭാഗത്തുനിന്നുണ്ടാകുമെന്ന് വിദേശകാര്യമന്ത്രാലയം വക്താവ് രൺധീർ ജയ്‌സ്‌വാൾ പറഞ്ഞു.

ഇതുസംബന്ധിച്ച് വിവിധ രാജ്യങ്ങളുമായി ചർച്ചകൾ നടന്നുകൊണ്ടിരിക്കുകയാണെന്നും അദ്ദേഹം പറഞ്ഞു.ഇന്ത്യ വിട്ട് ലണ്ടനിൽ ആഡംബര ജീവിതം നയിക്കുന്ന ലളിത് മോദിയും വിജയ് മല്യയും ചേർന്നുള്ള വിഡിയോ ശ്രദ്ധ നേടിയതിനു പിന്നാലെയാണ് വിദേശകാര്യ മന്ത്രാലയത്തിന്റെ പ്രതികരണം.

ഐപിഎൽ സ്ഥാപകൻ ലളിത് മോദിയാണ് മല്യയുടെ ജന്മദിന പാർട്ടിയിൽ പങ്കെടുത്തപ്പോഴത്തെ വിഡിയോ പോസ്റ്റ് ചെയ്തത്. ‘ഇന്ത്യയിൽനിന്നുള്ള വമ്പൻ പിടികിട്ടാപ്പുള്ളികളാണ് ഞങ്ങൾ’ എന്നാണ് ലളിത് മോദി ചിരിച്ചുകൊണ്ട് ക്യാമറയെ നോക്കി പറയുന്നത്.