പത്തനംതിട്ടയിൽ കിണറ്റിൽ വീണ കടുവയെ മയക്കുവെടി വെച്ച് പിടികൂടി

 സീതത്തോട്: ചിറ്റാർ വില്ലുന്നിപ്പാറയിൽ ജനവാസമേഖലയിലെ കിണറ്റിൽ വീണ കടുവയെ വനംവകുപ്പ് മയക്കുവെടി വെച്ച് പിടികൂടി കാട്ടിൽ തുറന്നുവിട്ടു.

ബുധനാഴ്ച പുലർച്ചെ അഞ്ച് മണിയോടെ വടശേരിക്കര വനമേഖലയിലെ കൊല്ലംപറമ്പിൽ സദാശിവന്റെ വീട്ടുമുറ്റത്തെ ആൾമറയില്ലാത്ത കിണറ്റിലാണ് എട്ട് വയസ്സ് പ്രായമുള്ള ആൺകടുവ വീണത്. പത്ത് മണിക്കൂർ നീണ്ട അനിശ്ചിതത്വങ്ങൾക്കൊടുവിൽ വൈകുന്നേരം മൂന്നരയോടെയാണ് കടുവയെ പുറത്തെത്തിച്ചത്.

നാടകീയമായ രക്ഷാപ്രവർത്തനം: പുലർച്ചെ കിണറ്റിൽ നിന്ന് ഭയാനകമായ അലർച്ച കേട്ടതോടെയാണ് വീട്ടുകാർ വിവരം അറിയുന്നത്. തണ്ണിത്തോട് ഫോറസ്റ്റ് സ്റ്റേഷനിലെ വനപാലകർ ഉടൻ സ്ഥലത്തെത്തി സുരക്ഷാക്രമീകരണങ്ങൾ ഒരുക്കി. കടുവ പുറത്തേക്ക് ചാടാതിരിക്കാൻ കിണർ വലയും ഷീറ്റും ഉപയോഗിച്ച് മൂടി. ഉച്ചയോടെ കോന്നിയിൽ നിന്നുള്ള വെറ്ററിനറി ഡോക്ടർമാരുടെ സംഘമെത്തി ക്യാമറയിലൂടെ കടുവയുടെ ആരോഗ്യസ്ഥിതി നിരീക്ഷിച്ചു. തുടർന്ന് മയക്കുവെടി വെച്ച ശേഷം ഭീമൻ വലയിൽ പൊതിഞ്ഞാണ് കടുവയെ 23 അടി താഴ്ചയുള്ള കിണറ്റിൽ നിന്നും കരയ്ക്കെത്തിച്ചത്.

ആരോഗ്യവാനായ കടുവ: പുറത്തെത്തിച്ച കടുവയെ വനംവകുപ്പിന്റെ പ്രത്യേക വാഹനത്തിലെ കൂടിലേക്ക് മാറ്റി ഗുഡിക്കൽ റേഞ്ച് ഓഫീസിലെത്തിച്ചു. പ്രാഥമിക പരിശോധനയിൽ കടുവ പൂർണ്ണ ആരോഗ്യവാനാണെന്നും പരിക്കുകൾ ഇല്ലെന്നും വ്യക്തമായതോടെ രാത്രിയോടെ ഗവി-കക്കി റൂട്ടിലെ ഉൾവനത്തിൽ തുറന്നുവിട്ടു. മ്ലാവിനെയോ മറ്റോ വേട്ടയാടുന്നതിനിടെ അബദ്ധത്തിൽ കിണറ്റിൽ വീണതാകാം എന്നാണ് വനംവകുപ്പിന്റെ നിഗമനം.

ഭീതിയിലായിരുന്ന മൺപിലാവ്: കടുവയുടെ അലർച്ച കേട്ട നടുക്കത്തിലാണ് മൺപിലാവ് നിവാസികൾ ഇന്നലെ ഉണർന്നത്. പ്രദേശത്ത് പുലിയുടെ ശല്യം പതിവാണെങ്കിലും ആദ്യമായാണ് ഒരു കടുവ ജനവാസമേഖലയിൽ എത്തുന്നത്. ഒരാഴ്ച മുൻപ് ഇവിടെ രണ്ട് വളർത്തുനായ്ക്കളെ പുലി പിടിച്ചിരുന്നു. 35 വർഷമായി വനാതിർത്തിയോട് ചേർന്ന് താമസിക്കുന്ന സദാശിവനും കുടുംബത്തിനും ഉണ്ടായ നാശനഷ്ടങ്ങൾ വലുതാണ്.

സഹായം കാത്ത് സദാശിവന്റെ കുടുംബം: കടുവ കിണറ്റിൽ വീണതിനെത്തുടർന്ന് സദാശിവന്റെ വീട്ടിലെ മോട്ടോറും പൈപ്പുകളും തകർന്നു. കിണർ മലിനമായതിനാൽ കുടിവെള്ളം പോലും ഇല്ലാത്ത അവസ്ഥയിലാണ് ഈ കുടുംബം. തകരാറിലായ മോട്ടോർ പുനഃസ്ഥാപിക്കാനോ നാശനഷ്ടങ്ങൾ പരിഹരിക്കാനോ ഉള്ള സാമ്പത്തിക ശേഷി 72 കാരനായ സദാശിവനും ഭാര്യ വത്സലയ്ക്കുമില്ല. അർഹമായ നഷ്ടപരിഹാരം ഉടൻ ലഭ്യമാക്കണമെന്ന ആവശ്യത്തിലാണ് നാട്ടുകാർ.