ചുന്നു താക്കൂറിന്റെ സാമ്രാജ്യം തകരുന്നു: ബിഹാറിലെ കുപ്രസിദ്ധ മാഫിയ തലവന്റെ സ്വത്തുക്കൾ കണ്ടുകെട്ടുന്നു

 ബിഹാറിന്റെ രാഷ്ട്രീയ-കുറ്റകൃത്യ ചരിത്രത്തിൽ ഭീതിയുടെ പര്യായമായിരുന്ന കുപ്രസിദ്ധ മാഫിയ തലവൻ ചുന്നു താക്കൂറിനെതിരെ ഭരണകൂടം പിടിമുറുക്കുന്നു.

നിയമത്തെയും ഭരണകൂടത്തെയും വെല്ലുവിളിച്ച് ഇയാൾ അനധികൃതമായി സമ്പാദിച്ചുകൂട്ടിയ സാമ്രാജ്യസമാനമായ സ്വത്തുക്കൾ കണ്ടുകെട്ടാനും പൊളിച്ചുമാറ്റാനുമാണ് അധികൃതരുടെ നീക്കം. കോടതി ഉത്തരവിനെത്തുടർന്ന് ആരംഭിച്ച ഈ നടപടി, ഒരു മാഫിയയും നിയമത്തിന് അതീതരല്ലെന്ന ബിഹാർ സർക്കാരിന്റെ വ്യക്തമായ പ്രഖ്യാപനമായി മാറിയിരിക്കുകയാണ്.

ഭൂമി കൈയേറ്റം, പിടിച്ചുപറി, ക്വട്ടേഷൻ പ്രവർത്തനങ്ങൾ എന്നിവയിലൂടെ കുറ്റകൃത്യങ്ങളുടെ ലോകത്ത് തന്റേതായ കറുത്ത മുദ്ര പതിപ്പിച്ചയാളാണ് ചുന്നു താക്കൂർ. കൊലപാതകം, തട്ടിക്കൊണ്ടുപോകൽ, വധശ്രമം, ആയുധ നിയമലംഘനം തുടങ്ങി അതിഗുരുതരമായ ഒട്ടനവധി കേസുകൾ ഇയാൾക്കെതിരെ പോലീസ് ഫയലുകളിലുണ്ട്. ഇയാളുടെ പേര് കേൾക്കുമ്പോൾ പോലും നാട്ടുകാർ ഭയന്നിരുന്നതിനാൽ പലപ്പോഴും സാക്ഷികളോ പരാതിക്കാരോ മുന്നോട്ടുവരാത്ത സാഹചര്യം നിലനിന്നിരുന്നു. പോലീസിന്റെ പിടിയിലായി ജയിലിലടയ്ക്കപ്പെട്ടപ്പോഴെല്ലാം തന്റെ സ്വാധീനമുപയോഗിച്ച് ജാമ്യത്തിലിറങ്ങി പഴയ രീതിയിൽത്തന്നെ കുറ്റകൃത്യങ്ങൾ തുടരുകയായിരുന്നു ഇയാളുടെ പതിവ്.

രാജ്യത്തെയാകെ പിടിച്ചുലച്ച 2005-ലെ കിസ്‌ലയ് കൗശൽ തട്ടിക്കൊണ്ടുപോകൽ കേസാണ് ചുന്നു താക്കൂറിന്റെ പേര് ചരിത്രത്തിൽ അടയാളപ്പെടുത്തിയത്. പട്‌ന ഡൽഹി പബ്ലിക് സ്കൂൾ വിദ്യാർത്ഥിയായിരുന്ന കിസ്‌ലയിനെ തട്ടിക്കൊണ്ടുപോയ സംഭവം ബീഹാറിനെ സ്തംഭിപ്പിച്ചു. അന്ന് ബിഹാർ സന്ദർശിക്കാനെത്തിയ മുൻ പ്രധാനമന്ത്രി അടൽ ബിഹാരി വാജ്‌പേയി പട്‌നയിലെ ഗാന്ധി മൈതാനത്ത് വെച്ച് "എന്റെ കിസ്‌ലയ് എവിടെ? അവനെ എനിക്ക് തിരികെ തരൂ" എന്ന് കണ്ണീരോടെ ചോദിച്ചത് ഇന്നും ഭാരതത്തിന്റെ നോവായി നിലനിൽക്കുന്നു. ഈ കേസിലെ മുഖ്യപ്രതിയായ ചുന്നു താക്കൂറിന് അന്ന് മൂന്ന് ലക്ഷം രൂപയാണ് സർക്കാർ പാരിതോഷികം പ്രഖ്യാപിച്ചിരുന്നത്.

വർഷങ്ങളോളം പോലീസിന്റെ കണ്ണുവെട്ടിച്ച് ഒളിവിൽ കഴിഞ്ഞിരുന്ന ചുന്നു താക്കൂറിനെ ഒടുവിൽ ഈ വർഷം ഏപ്രിലിലാണ് ബിഹാർ-നേപ്പാൾ അതിർത്തിയിൽ വെച്ച് പ്രത്യേക സംഘം പിടികൂടിയത്. അറസ്റ്റിന് പിന്നാലെ ഇയാളുടെ സാമ്പത്തിക സ്രോതസ്സുകളെക്കുറിച്ച് നടത്തിയ അന്വേഷണത്തിനൊടുവിലാണ് അനധികൃത സ്വത്തുക്കൾക്കെതിരെ നടപടി ആരംഭിച്ചത്. നിയമത്തെ ധിക്കരിച്ചിരുന്നവർ ഒടുവിൽ നീതിന്യായ വ്യവസ്ഥയ്ക്ക് മുന്നിൽ നിസ്സഹായരായി നിൽക്കുന്ന കാഴ്ചയാണിപ്പോൾ. ബിഹാറിലെ ഗുണ്ടാരാജിനെതിരെ സർക്കാർ നൽകുന്ന കർശനമായ മുന്നറിയിപ്പായി ഈ നീക്കം വിലയിരുത്തപ്പെടുന്നു.