ശ്രീരാമജന്മഭൂമി പ്രസ്ഥാനത്തിന്റെ പ്രധാന ശിൽപ്പി ഡോ. രാം വിലാസ് ദാസ് വേദാന്തി അന്തരിച്ചു

 അയോധ്യ: ശ്രീരാമജന്മഭൂമി പ്രസ്ഥാനത്തിന് നേതൃത്വം നൽകിയ പ്രധാന ശിൽപ്പികളിലൊരാളും, അയോധ്യയിൽ നിന്നുള്ള മുൻ പാർലമെന്റ് അംഗവുമായിരുന്ന ഡോ. രാം വിലാസ് ദാസ് വേദാന്തി (മഹാരാജ്) അന്തരിച്ചു.

മധ്യപ്രദേശിലെ രേവയിൽ ചികിത്സയിൽ കഴിഞ്ഞിരുന്നതിനിടെയായിരുന്നു അദ്ദേഹത്തിന്റെ അന്ത്യം. മുൻ എം.പി.യും ശ്രീരാമജന്മഭൂമി തീർത്ഥ ക്ഷേത്ര ട്രസ്റ്റ് അംഗവുമായിരുന്ന ഡോ. വേദാന്തിയുടെ നിര്യാണത്തിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ഉൾപ്പെടെയുള്ള പ്രമുഖർ അഗാധമായ ദുഃഖം രേഖപ്പെടുത്തി.

മുഖ്യമന്ത്രിയുടെ അനുശോചനം: സനാതന സംസ്കാരത്തിന് നികത്താനാകാത്ത നഷ്ടം

ഡോ. രാം വിലാസ് വേദാന്തിയുടെ വിയോഗം ആത്മീയ ലോകത്തിനും സനാതന സംസ്കാരത്തിനും വലിയ നഷ്ടമാണെന്ന് മുഖ്യമന്ത്രി യോഗി ആദിത്യനാഥ് പ്രസ്താവിച്ചു.

“ശ്രീരാമജന്മഭൂമി പ്രസ്ഥാനത്തിന്റെ പ്രധാന സ്തംഭവും, മുൻ പാർലമെന്റ് അംഗവും, ശ്രീ അയോധ്യാധാമിലെ വസിഷ്ടാശ്രമത്തിലെ ആദരണീയനുമായ ഡോ. രാം വിലാസ് വേദാന്തി ജി മഹാരാജിന്റെ വിയോഗം ആത്മീയ ലോകത്തിനും സനാതന സംസ്കാരത്തിനും നികത്താനാകാത്ത നഷ്ടമാണ്. അദ്ദേഹത്തിന്റെ വേർപാട് ഒരു യുഗത്തിന്റെ അവസാനം പോലെയാണ്. മതത്തിന്റെയും സമൂഹത്തിന്റെയും രാഷ്ട്രത്തിന്റെയും സേവനത്തിനായി സമർപ്പിച്ച അദ്ദേഹത്തിന്റെ ത്യാഗപൂർണ്ണമായ ജീവിതം നമുക്കെല്ലാവർക്കും പ്രചോദനമാണ്. ദുഃഖിതരായ ശിഷ്യന്മാർക്കും അനുയായികൾക്കും ഈ വലിയ വേദന സഹിക്കാൻ ശക്തി നൽകട്ടെയെന്ന് ഭഗവാൻ ശ്രീരാമനോട് പ്രാർത്ഥിക്കുന്നു. ഓം ശാന്തി,” മുഖ്യമന്ത്രി അനുശോചന സന്ദേശത്തിൽ പറഞ്ഞു.

രാമക്ഷേത്ര നിർമ്മാണത്തിൽ നിർണായക പങ്ക്

രാമജന്മഭൂമി പ്രസ്ഥാനത്തിലെ നിർണ്ണായക ശബ്ദമായിരുന്ന ഡോ. രാം വിലാസ് ദാസ് വേദാന്തി, അയോധ്യയിൽ നിന്നുള്ള പാർലമെന്റ് അംഗമായിരുന്ന കാലഘട്ടത്തിൽ രാമക്ഷേത്ര നിർമ്മാണത്തിനായി ശക്തമായ നിലപാട് സ്വീകരിച്ചു. പാർലമെൻ്റിനകത്തും പുറത്തും, നിയമസഭ മുതൽ തെരുവുകൾ വരെ നടത്തിയ അദ്ദേഹത്തിൻ്റെ പ്രക്ഷോഭപരമായ ഇടപെടലുകൾ പ്രസ്ഥാനത്തിൻ്റെ ദിശാസൂചിയായി കണക്കാക്കപ്പെടുന്നു.

ശ്രീരാമജന്മഭൂമി പ്രസ്ഥാനത്തിൻ്റെ ചരിത്രത്തിലെ ഒരു നിർണ്ണായക അധ്യായത്തിനാണ് ഡോ. രാം വിലാസ് ദാസ് വേദാന്തിയുടെ അന്ത്യത്തോടെ തിരശ്ശീല വീഴുന്നത്.