"അഫ്ഗാനിസ്ഥാനിൽ ആക്രമണം നടത്താമെങ്കിൽ ഇന്ത്യക്ക് ബഹാവൽപൂരിലും ആകാം"; പാക് സൈന്യത്തെ രൂക്ഷമായി വിമർശിച്ച് മൗലാനാ ഫസലൂർ റഹ്മാൻ

 ഇസ്ലാമാബാദ്: അതിർത്തി കടന്നുള്ള സൈനിക നടപടികളിൽ പാകിസ്ഥാൻ സ്വീകരിക്കുന്ന ഇരട്ടത്താപ്പിനെ ചോദ്യം ചെയ്ത് മുതിർന്ന പാക് രാഷ്ട്രീയ നേതാവും ജാമിയത്ത് ഉലമ-ഇ-ഇസ്ലാം-എഫ് (JUI-F) അധ്യക്ഷനുമായ മൗലാനാ ഫസലൂർ റഹ്മാൻ.

അഫ്ഗാനിസ്ഥാനിലെ പാക് സൈനിക നീക്കങ്ങളെ ഇന്ത്യയുടെ 'ഓപ്പറേഷൻ സിന്ദൂറുമായി' താരതമ്യം ചെയ്തുകൊണ്ടാണ് അദ്ദേഹം ജനറൽ ആസിം മുനീറിന്റെ നേതൃത്വത്തിലുള്ള പാക് സൈന്യത്തെ പ്രതിക്കൂട്ടിലാക്കിയത്.

ഇന്ത്യയുടെ നടപടിയെ എങ്ങനെ എതിർക്കും? അഫ്ഗാനിസ്ഥാനിലെ ശത്രുതാ കേന്ദ്രങ്ങളിൽ ആക്രമണം നടത്തുന്നത് പാകിസ്ഥാൻ ന്യായീകരിക്കുകയാണെങ്കിൽ, സമാനമായ രീതിയിൽ ഇന്ത്യ നടത്തുന്ന പ്രത്യാക്രമണങ്ങളെ എതിർക്കാൻ പാകിസ്ഥാന് അവകാശമില്ലെന്ന് അദ്ദേഹം ഓർമ്മിപ്പിച്ചു.

"നമ്മുടെ ശത്രുക്കളെ നേരിടാൻ അഫ്ഗാനിസ്ഥാനിൽ കയറി ആക്രമണം നടത്തുന്നത് ന്യായമാണെങ്കിൽ, കാശ്മീരിലെ ഭീകരാക്രമണങ്ങൾക്ക് ഉത്തരവാദികളായവരുടെ ആസ്ഥാനങ്ങളായ ബഹാവൽപൂരിലും മുരിദ്കെയിലും ആക്രമണം നടത്തുമെന്ന് ഇന്ത്യ പറയുന്നതിനെയും നമുക്ക് തള്ളിക്കളയാനാവില്ല. അഫ്ഗാനിസ്ഥാൻ ഇപ്പോൾ പാകിസ്ഥാനെതിരെ ഉന്നയിക്കുന്ന അതേ ആരോപണങ്ങൾ തന്നെയാണ് നമ്മൾ ഇന്ത്യക്കെതിരെയും ഉന്നയിക്കുന്നത്. ഈ രണ്ട് നിലപാടുകളെ എങ്ങനെയാണ് ഒരേസമയം ന്യായീകരിക്കാൻ കഴിയുക?"- ഫസലൂർ റഹ്മാൻ ചോദിച്ചു.

ഓപ്പറേഷൻ സിന്ദൂറും പശ്ചാത്തലവും ഏപ്രിൽ 22-ന് കാശ്മീരിലെ പഹൽഗാമിൽ 26 സാധാരണക്കാരുടെ മരണത്തിനിടയാക്കിയ ഭീകരാക്രമണത്തിന് മറുപടിയായി ഇന്ത്യ നടത്തിയ മിസൈൽ ആക്രമണമാണ് 'ഓപ്പറേഷൻ സിന്ദൂർ'. മെയ് 7-ന് പുലർച്ചെ ഇന്ത്യ നടത്തിയ പ്രത്യാക്രമണത്തിൽ പാകിസ്ഥാനിലെയും പാക് അധീന കാശ്മീരിലെയും (PoK) ഒമ്പതോളം ഭീകരതാവളങ്ങൾ തകർത്തു. ജെയ്‌ഷെ മുഹമ്മദിന്റെ ബഹാവൽപൂരിലെ കേന്ദ്രവും ലഷ്കർ-ഇ-ത്വയ്യിബയുടെ മുരിദ്കെയിലെ ആസ്ഥാനവും തകർക്കപ്പെട്ടവയിൽ ഉൾപ്പെടുന്നു.

അഫ്ഗാൻ അതിർത്തിയിലെ സംഘർഷം 2021-ൽ താലിബാൻ കാബൂളിൽ അധികാരം പിടിച്ചെടുത്തതിനുശേഷം പാകിസ്ഥാനും അഫ്ഗാനിസ്ഥാനും തമ്മിലുള്ള ബന്ധം വഷളായിരിക്കുകയാണ്. അഫ്ഗാൻ ഭരണകൂടം ഭീകരർക്ക് അഭയം നൽകുന്നുവെന്നാണ് ഇസ്ലാമാബാദിന്റെ ആരോപണം. എന്നാൽ ഇത് താലിബാൻ നിഷേധിക്കുന്നു. അതിനിടെ, അഫ്ഗാനിസ്ഥാനിലെ സാധാരണക്കാരുടെ മരണത്തിനിടയാക്കിയ പാകിസ്ഥാന്റെ സൈനിക നടപടിയെ ഇന്ത്യ ശക്തമായി അപലപിച്ചു. നിരപരാധികളായ അഫ്ഗാൻ ജനതയ്ക്ക് നേരെയുള്ള ഇത്തരം ആക്രമണങ്ങൾ അംഗീകരിക്കാനാവില്ലെന്ന് ഇന്ത്യൻ വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ പ്രസ്താവിച്ചു.

പാകിസ്ഥാന്റെ അഫ്ഗാൻ നയത്തിന്റെ കടുത്ത വിമർശകനായ മൗലാനാ ഫസലൂർ റഹ്മാൻ, ഇരുരാജ്യങ്ങൾക്കുമിടയിലെ സംഘർഷം ലഘൂകരിക്കാൻ നേരത്തെ മധ്യസ്ഥത വഹിക്കാനും സന്നദ്ധത പ്രകടിപ്പിച്ചിരുന്നു.