മുംബൈ രാഷ്ട്രീയത്തിൽ വഴിത്തിരിവ്: രണ്ട് പതിറ്റാണ്ടിന് ശേഷം കൈകോർത്ത് താക്കറെ സഹോദരങ്ങൾ

 മുംബൈ: മഹാരാഷ്ട്ര രാഷ്ട്രീയത്തിൽ പുതിയ ചലനങ്ങൾ സൃഷ്ടിച്ചുകൊണ്ട് ശിവസേന (യു.ബി.ടി) അധ്യക്ഷൻ ഉദ്ധവ് താക്കറെയും മഹാരാഷ്ട്ര നവനിർമ്മാൺ സേന (എം.എൻ.എസ്) തലവൻ രാജ് താക്കറെയും ഒന്നിക്കുന്നു.

നീണ്ട 20 വർഷത്തെ രാഷ്ട്രീയ വൈരത്തിന് വിരാമമിട്ടാണ് വരാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പിൽ സംയുക്തമായി മത്സരിക്കുമെന്ന് ഇരുവരും പ്രഖ്യാപിച്ചത്. മുംബൈയിൽ ബുധനാഴ്ച നടന്ന സംയുക്ത വാർത്താസമ്മേളനത്തിലാണ് നിർണ്ണായകമായ ഈ പ്രഖ്യാപനം ഉണ്ടായത്.

മറാത്താ സ്വത്വവും മുംബൈയുടെ രാഷ്ട്രീയ ഭാവിയും മുൻനിർത്തിയുള്ള ഈ സഖ്യം രാജ്യത്തിന്റെ സാമ്പത്തിക തലസ്ഥാനത്ത് പുതിയ പോർമുഖം തുറക്കുമെന്ന് ഉറപ്പായി.

"ഒന്നിക്കുന്നത് താക്കറെ സഹോദരങ്ങളായി"

കുടുംബാംഗങ്ങളുടെ സാന്നിധ്യത്തിൽ നടന്ന ചടങ്ങിൽ ഉദ്ധവ് താക്കറെ വികാരഭരിതനായാണ് സംസാരിച്ചത്. "ഞങ്ങൾ ഇന്ന് ഈ വേദിയിൽ നിൽക്കുന്നത് താക്കറെ സഹോദരങ്ങളായാണ്," അദ്ദേഹം പറഞ്ഞു. സംയുക്ത മഹാരാഷ്ട്ര പ്രസ്ഥാനത്തിന് നേതൃത്വം നൽകിയ മുത്തച്ഛൻ പ്രബോധങ്കർ താക്കറെയെയും ശിവസേന സ്ഥാപകൻ ബാലാസാഹേബ് താക്കറെയെയും അദ്ദേഹം അനുസ്മരിച്ചു. ശിവസേന രൂപീകരണത്തിന്റെ 60-ാം വാർഷികം അടുത്തിരിക്കെ, മുംബൈയെ തകർക്കാൻ ശ്രമിക്കുന്ന ശക്തികൾക്കെതിരെ ഒന്നിച്ച് നിൽക്കേണ്ടത് കാലഘട്ടത്തിന്റെ ആവശ്യമാണെന്ന് അദ്ദേഹം കൂട്ടിച്ചേർത്തു.

മഹാരാഷ്ട്ര രാഷ്ട്രീയത്തിൽ ചർച്ചയായ 'ബട്ടേംഗെ തോ കടേംഗെ' (വിഭജിക്കപ്പെട്ടാൽ നശിപ്പിക്കപ്പെടും) എന്ന മുദ്രാവാക്യത്തെ മുൻനിർത്തിയായിരുന്നു ഉദ്ധവിന്റെ താക്കീത്. മറാഠി മാനുഷുകൾ ഭിന്നിച്ചുനിന്നാൽ അത് നാശത്തിന് വഴിതെളിക്കുമെന്നും, രക്തസാക്ഷികളുടെ ത്യാഗത്തെ അപമാനിക്കുന്നതിന് തുല്യമായിരിക്കുമെന്നും അദ്ദേഹം ഓർമ്മിപ്പിച്ചു.

വിട്ടുവീഴ്ചകൾക്ക് തയ്യാറായി രാജ് താക്കറെ

ഉദ്ധവിന്റെ വാക്കുകളെ പിന്തുണച്ച രാജ് താക്കറെ, മുൻകാലത്തെ അസ്വാരസ്യങ്ങളേക്കാൾ വലുതാണ് മഹാരാഷ്ട്രയുടെ താല്പര്യമെന്ന് വ്യക്തമാക്കി. സീറ്റ് വിഭജനത്തെക്കുറിച്ചുള്ള തർക്കങ്ങൾക്കല്ല, മറിച്ച് വലിയൊരു ലക്ഷ്യത്തിനാണ് ഇപ്പോൾ മുൻഗണന നൽകുന്നതെന്ന് അദ്ദേഹം പറഞ്ഞു. മുംബൈയ്ക്ക് പുറമെ നാസിക് കോർപ്പറേഷനിലും ഇരുപാർട്ടികളും സഖ്യത്തിലായിരിക്കും മത്സരിക്കുക.മുംബൈയുടെ മേയർ ഒരു മറാഠിയായിരിക്കുമെന്നും അത് തങ്ങളുടെ സഖ്യത്തിൽ നിന്നായിരിക്കുമെന്നും രാജ് താക്കറെ തറപ്പിച്ചു പറഞ്ഞു.

വിമതർക്കായി വാതിൽ തുറന്ന് താക്കറെ സഖ്യം

ഏക്നാഥ് ഷിൻഡെയുടെ നേതൃത്വത്തിലുള്ള ശിവസേന വിഭാഗത്തിലും ബി.ജെ.പിയിലും അസംതൃപ്തരായവർക്ക് പുതിയ സഖ്യത്തിലേക്ക് അദ്ദേഹം സ്വാഗതമോതി. ബി.ജെ.പിയിലെ നിലവിലെ പോക്കിൽ അതൃപ്തിയുള്ളവർക്കും തങ്ങളോടൊപ്പം ചേരാമെന്ന് ഉദ്ധവ് താക്കറെ വ്യക്തമാക്കി.

ശിവസേനയിലെ പിളർപ്പിന് ശേഷം തകർന്നടിഞ്ഞ മറാത്താ വോട്ട് ബാങ്ക് തിരിച്ചുപിടിക്കാനുള്ള താക്കറെ കുടുംബത്തിന്റെ ഈ നീക്കം ബി.ജെ.പി-ഷിൻഡെ-പവാർ സഖ്യത്തിന് വലിയ വെല്ലുവിളിയാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.