ജാതിയുടെ പേരിൽ ദുരഭിമാനക്കൊല: കാമുകൻ്റെ മൃതദേഹത്തിൽ മാലയിട്ട് യുവതി

 നാന്ദേഡ് (മഹാരാഷ്ട്ര): ജാതി വ്യത്യാസത്തിൻ്റെ പേരിൽ ദുരഭിമാനക്കൊലയ്ക്ക് ഇരയായ കാമുകൻ്റെ മൃതദേഹത്തിൽ യുവതി സിന്ദൂരവും മഞ്ഞളുമണിഞ്ഞ് 'വിവാഹം' കഴിച്ചു. മഹാരാഷ്ട്രയിലെ നാന്ദേഡ് ജില്ലയിലാണ് രാജ്യത്തെ നടുക്കിയ സംഭവം. പ്രണയബന്ധത്തെ എതിർത്തതിനെ തുടർന്ന് യുവതിയുടെ പിതാവും സഹോദരങ്ങളും ചേർന്ന് കാമുകനെ വെടിവെച്ച് കൊലപ്പെടുത്തുകയായിരുന്നു.

കൊലപാതകത്തിൽ ദുരിതത്തിലായ 21-കാരിയായ അഞ്ചൽ മാമിദ്വാർ ആണ്, താൻ പ്രണയിച്ച സക്ഷം ടേറ്റുവിൻ്റെ (25) മൃതദേഹത്തിന് അരികിലെത്തി വിവാഹ ചടങ്ങുകൾ പൂർത്തിയാക്കിയത്.

 സംഭവം ഇങ്ങനെ

കുറച്ചുകാലമായി സക്ഷവും അഞ്ചലും പ്രണയത്തിലായിരുന്നു. ഒരു മാസം മുൻപ് ജാമ്യത്തിൽ ഇറങ്ങിയ സക്ഷം, അഞ്ചലിന്റെ സഹോദരൻ ഹിമേഷ് മാമിദ്വാറിൻ്റെ അടുത്ത സുഹൃത്തായിരുന്നതിനാൽ വീട്ടുകാർക്ക് പരിചിതനായിരുന്നു. സക്ഷമിനും ഹിമേഷിനും ക്രിമിനൽ പശ്ചാത്തലമുണ്ടായിരുന്നതായി പോലീസ് വൃത്തങ്ങൾ സ്ഥിരീകരിക്കുന്നു.

മകളുടെ പ്രണയം അറിഞ്ഞ പിതാവ് ഗജാനൻ മാമിദ്വാർ (ഗണേഷ്), ജാതിപരമായ വ്യത്യാസങ്ങൾ ചൂണ്ടിക്കാട്ടി ബന്ധത്തെ ശക്തമായി എതിർത്തിരുന്നു. ഇതിലുള്ള പകയിൽ, നവംബർ 27-ന് വൈകുന്നേരം നാന്ദേഡിലെ ജൂന ഗഞ്ച് ഏരിയയിൽ വെച്ച് അഞ്ചലിൻ്റെ പിതാവ് ഗജാനൻ, സഹോദരങ്ങളായ ഹിമേഷ്, സാഹിൽ, മറ്റ് രണ്ട് പേർ എന്നിവർ ചേർന്ന് സക്ഷമിനെ വെടിവെക്കുകയും കല്ലുകൊണ്ട് തലയ്ക്കടിച്ച് കൊലപ്പെടുത്തുകയുമായിരുന്നു.

സുഹൃത്തുക്കൾക്കൊപ്പം നിൽക്കുകയായിരുന്ന സക്ഷവുമായി ഹിമേഷ് വാക്കേറ്റത്തിലേർപ്പെടുകയും തുടർന്ന് വെടിയുതിർക്കുകയുമായിരുന്നു. വാരിയെല്ലിൽ വെടിയേറ്റ സക്ഷമിൻ്റെ തലയ്ക്ക് ഹിമേഷ് ടൈൽ ഉപയോഗിച്ച് ഇടിക്കുകയും സംഭവസ്ഥലത്ത് വെച്ച് തന്നെ മരണം സംഭവിക്കുകയുമായിരുന്നു. ഇതിനു പിന്നാലെ ഹിമേഷ്, സഹോദരൻ സാഹിൽ (25), പിതാവ് ഗജാനൻ മാമിദ്വാർ (45) എന്നിവരെ പോലീസ് അറസ്റ്റ് ചെയ്തു.

 'മരിച്ചാലും ഞാൻ അദ്ദേഹത്തിൻ്റേത്'

അടുത്ത ദിവസം സക്ഷമിൻ്റെ അന്ത്യകർമ്മങ്ങൾക്കുള്ള ഒരുക്കങ്ങൾ നടക്കുന്നതിനിടെയാണ് അഞ്ചൽ വീട്ടിലെത്തിയത്. മരണശേഷവും അദ്ദേഹത്തെ താൻ വിവാഹം കഴിക്കുമെന്നും അദ്ദേഹത്തിൻ്റെ കൂടെ ജീവിക്കുമെന്നും അഞ്ചൽ പ്രഖ്യാപിച്ചു. മൃതദേഹത്തിൽ മഞ്ഞളും സിന്ദൂരവും അണിയിച്ച് അഞ്ചൽ പ്രതീകാത്മക വിവാഹ ചടങ്ങ് പൂർത്തിയാക്കി.

"മരിച്ച ശേഷവും ഞാൻ അദ്ദേഹത്തിൻ്റേതായിരിക്കും," എന്നുപറഞ്ഞ് അഞ്ചൽ പൊട്ടിക്കരഞ്ഞു. "എനിക്ക് നീതി ലഭിക്കണം. പ്രതികളെ തൂക്കിലേറ്റണം," അവർ ആവശ്യപ്പെട്ടു.

മാധ്യമങ്ങളോട് സംസാരിച്ച അഞ്ചൽ, മൂന്ന് വർഷമായി തങ്ങൾ പ്രണയത്തിലായിരുന്നുവെന്നും എന്നാൽ ജാതിയുടെ പേരിൽ പിതാവ് ബന്ധത്തെ എതിർത്തിരുന്നുവെന്നും പറഞ്ഞു. "സക്ഷമിനെ കൊല്ലുമെന്ന് എൻ്റെ കുടുംബം സ്ഥിരമായി ഭീഷണിപ്പെടുത്തിയിരുന്നു. ഇപ്പോൾ അച്ഛനും സഹോദരങ്ങളായ ഹിമേഷും സാഹിലും അത് ചെയ്തു. പ്രതികളെ തൂക്കിലേറ്റണം," അവർ ആവശ്യപ്പെട്ടു. ഇനിമുതൽ സക്ഷമിൻ്റെ വീട്ടിൽ താമസിക്കാനാണ് തൻ്റെ തീരുമാനമെന്നും അഞ്ചൽ വ്യക്തമാക്കി.

കൊലപാതകം, നിയമവിരുദ്ധമായ സംഘം ചേരൽ, കലാപം, എസ്‌സി/എസ്ടി (അതിക്രമങ്ങൾ തടയൽ) നിയമം, ആയുധ നിയമം എന്നിവ പ്രകാരമുള്ള വകുപ്പുകൾ ചേർത്ത് ആറ് പേർക്കെതിരെയാണ് കേസെടുത്തിരിക്കുന്നത്. അറസ്റ്റിലായ പ്രതികളെ മൂന്ന് ദിവസത്തേക്ക് പോലീസ് കസ്റ്റഡിയിൽ വിട്ടിരിക്കുകയാണ്.