പന്തിരുകുലത്തിന്റെ പുണ്യഭൂമിയിൽ വള്ളുവനാട് ഹിന്ദുമത പരിഷത്ത് സമ്മേളനം; ഡിസംബർ 26 മുതൽ തൃത്താലയിൽ

 കൂറ്റനാട്: പന്തിരുകുലത്തിന്റെ ആസ്ഥാനമായ തൃത്താലയിലെ യജ്ഞേശ്വരം ശിവക്ഷേത്രത്തിൽ വള്ളുവനാട് ഹിന്ദുമത പരിഷത്തിന്റെ പന്ത്രണ്ടാമത് സമ്മേളനം ഡിസംബർ 26, 27, 28 തീയതികളിൽ നടക്കും.

സങ്കുചിത രാഷ്ട്രീയത്തിനും ജാതീയമായ ഉച്ചനീചത്വങ്ങൾക്കും അതീതമായി ഹൈന്ദവ ധർമ്മത്തിൽ അധിഷ്ഠിതമായ ഐക്യം വളർത്തുകയാണ് പരിഷത്തിന്റെ ലക്ഷ്യമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു.

ഡിസംബർ 26 (വെള്ളി):

മഹാസുദർശന യജ്ഞം: രാവിലെ 6-ന് ജപപ്പാറയിലെ ദീപസമർപ്പണത്തോടെ തുടക്കം. തുടർന്ന് ഡോ. ശ്രീനാഥ് കാരയാട്ടിന്റെ കാർമ്മികത്വത്തിൽ 2500 ഭക്തർ പങ്കെടുക്കുന്ന മഹാസുദർശന യജ്ഞം.

ഉദ്ഘാടനം: രാവിലെ 11-ന് ജൂന അഖാഡ മഹാമണ്ഡലേശ്വർ സ്വാമി ആനന്ദവനം ഭാരതി മഹാരാജ് സമ്മേളനം ഉദ്ഘാടനം ചെയ്യും. പരിഷത്ത് അധ്യക്ഷൻ ബ്രഹ്മചാരി ടി.കെ വിനയഗോപാൽ അധ്യക്ഷത വഹിക്കും.

ഉച്ചയ്ക്ക് ശേഷം തിരുവാതിരക്കളി, ആദ്ധ്യാത്മിക സമ്മേളനം, കലാപരിപാടികൾ എന്നിവ അരങ്ങേറും.

ഡിസംബർ 27 (ശനി):

മാതൃസമ്മേളനം: രാവിലെ 10-ന് പ്രൊഫ. സരിത അയ്യർ മുഖ്യപ്രഭാഷണം നടത്തുന്ന മാതൃസമ്മേളനം.

സാംസ്കാരിക സമ്മേളനം: വൈകുന്നേരം 4.30-ന് സ്വാമി സ്വരൂപാനന്ദ സരസ്വതി, സ്വാമി അഭയാനന്ദ തുടങ്ങിയവർ പങ്കെടുക്കുന്ന സാംസ്കാരിക സമ്മേളനം നടക്കും.

ഡിസംബർ 28 (ഞായർ):

യുവജന സമ്മേളനം: രാവിലെ 10.30-ന് അഡ്വ. രാജേഷ് വെങ്ങാലിലിന്റെ അധ്യക്ഷതയിൽ യുവജന സമ്മേളനം. വിവിധ മേഖലകളിൽ മികവ് തെളിയിച്ച പ്രതിഭകളെ ആദരിക്കും.

സമാപന സമ്മേളനം: വൈകുന്നേരം 4 മണിക്ക് നടക്കുന്ന സമാപന സമ്മേളനം കേരള ഗവർണർ രാജേന്ദ്ര വിശ്വനാഥ് ആർലേക്കർ ഉദ്ഘാടനം ചെയ്യും. സ്വാമി ദേവാനന്ദ പുരി അനുഗ്രഹ പ്രഭാഷണം നടത്തും.

സമാപനം: രാത്രി 6.30-ന് ഗുരുവായൂർ ഗോകുൽദാസും സംഘവും അവതരിപ്പിക്കുന്ന പഞ്ചരത്ന അഷ്ടപദിയോടെ പരിപാടികൾക്ക് തിരശ്ശീല വീഴും.

പട്ടാമ്പി താലൂക്ക് കേന്ദ്രീകരിച്ച് കഴിഞ്ഞ 12 വർഷമായി സജീവമായ പരിഷത്തിന്റെ ഈ സമ്മേളനത്തിൽ ജാതി-മത ഭേദമന്യേ ഹൈന്ദവ മൂല്യങ്ങളെ ആദരിക്കുന്ന വലിയൊരു ജനവിഭാഗത്തിന്റെ പങ്കാളിത്തമാണ് പ്രതീക്ഷിക്കുന്നത്. വാർത്താ സമ്മേളനത്തിൽ ടി.കെ വിനയഗോപാൽ, പ്രസാദ് പുളിക്കൽ, എ.പി ശിവൻ കണ്ടപ്പു, എം. വിജയകൃഷ്ണൻ, ഡോ. വി പ്രേമചന്ദ്രൻ എന്നിവർ പങ്കെടുത്തു.