"ഞാനൊരു സെലിബ്രിറ്റിയാണ്, 5 മിനിറ്റ് തടഞ്ഞാൽ എന്താ?" മകൻ്റെ ജന്മദിനത്തിന് നടുറോഡിൽ പടക്കം പൊട്ടിച്ച് വ്യവസായി

 അഹമ്മദാബാദ്: മകൻ്റെ ജന്മദിനാഘോഷത്തിൻ്റെ ഭാഗമായി പൊതുവഴി തടസ്സപ്പെടുത്തുകയും പടക്കം പൊട്ടിച്ച് യാത്രക്കാരെ ഭീഷണിപ്പെടുത്തുകയും ചെയ്ത ഗുജറാത്തിലെ വ്യവസായിയുടെ നടപടി വിവാദമാകുന്നു.

ഗുജറാത്തി വ്യവസായിയായ ദീപക് ഇജാർദറാണ് ട്രാഫിക് തടഞ്ഞ് നടുറോഡിൽ ആഘോഷം സംഘടിപ്പിച്ചത്. സംഭവത്തിൻ്റെ വീഡിയോ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിച്ചതോടെ ഇയാൾക്കെതിരെ കടുത്ത പ്രതിഷേധമാണ് ഉയരുന്നത്.

A Gujarat-based businessman sparked widespread outrage after stopping traffic and bursting firecrackers on a public road to celebrate his son’s birthday, an incident that was captured on camera and widely circulated on social media. pic.twitter.com/pZXTtlzrXc

— Rareshares (@unnikutan77) December 25, 2025

തിരക്കേറിയ റോഡിൽ വാഹനങ്ങൾ തടഞ്ഞുനിർത്തിയാണ് ദീപക് ഇജാർദറും സംഘവും പടക്കങ്ങൾ പൊട്ടിച്ചത്. യാത്രക്കാർ ഇതിനെ ചോദ്യം ചെയ്തതോടെ ഇയാൾ അക്രമാസക്തനാവുകയും പടക്കം കാട്ടി വാഹനയാത്രക്കാരെ ഭീഷണിപ്പെടുത്തുകയും ചെയ്തു. റോഡിന് നടുവിൽ പടക്കം കുന്നുകൂട്ടിയിട്ട് പൊട്ടിക്കുന്നത് വീഡിയോയിൽ വ്യക്തമാണ്.

യാത്രക്കാരെ തടഞ്ഞതിനെക്കുറിച്ച് മാധ്യമങ്ങളും പൊതുജനങ്ങളും ചോദിച്ചപ്പോൾ തികച്ചും നിരുത്തരവാദപരമായ മറുപടിയാണ് ഇയാൾ നൽകിയത്. "ഞാനൊരു സെലിബ്രിറ്റിയാണ്. വെറും അഞ്ച് മിനിറ്റല്ലേ നിങ്ങളെ റോഡിൽ തടഞ്ഞുള്ളൂ? അതിൽ ഞാൻ എന്ത് വലിയ കുറ്റമാണ് ചെയ്തത്?" എന്നായിരുന്നു ഇയാളുടെ പ്രതികരണം. നിയമത്തെയോ പൊതുജന സുരക്ഷയെയോ വകവെക്കാതെയുള്ള ഇയാളുടെ പ്രസ്താവനയ്ക്കെതിരെ വലിയ രീതിയിലുള്ള സൈബർ പ്രതിഷേധമാണ് നടക്കുന്നത്.

പണവും സ്വാധീനവുമുണ്ടെങ്കിൽ പൊതുനിയമങ്ങൾ ആർക്കും ലംഘിക്കാമെന്ന ഹുങ്കാണ് വ്യവസായി പ്രകടിപ്പിക്കുന്നതെന്ന് നാട്ടുകാർ ആരോപിച്ചു. സംഭവത്തിൽ പോലീസ് സ്വമേധയാ കേസെടുക്കണമെന്ന ആവശ്യവും ശക്തമാണ്. പൊതുജനങ്ങളുടെ സുരക്ഷ മുൻനിർത്തി ഇത്തരം നിയമലംഘനങ്ങൾക്കെതിരെ കർശന നടപടി വേണമെന്ന് വിവിധ സംഘടനകൾ ആവശ്യപ്പെട്ടു.