ദക്ഷിണാമൂർത്തി സങ്കൽപം: ഭക്തിയും വിജ്ഞാനവും പകർന്ന് സെമിനാർ

 എടപ്പാൾ: ശുകപുരം ശ്രീ ദക്ഷിണാമൂർത്തി ക്ഷേത്രത്തിൽ നടക്കുന്ന ഋഗ്വേദ ലക്ഷാർച്ചനയുടെ ഭാഗമായി, കേരള ടെമ്പിൾ വെൽഫെയർ ഡെവലപ്‌മെൻ്റ് ഫൗണ്ടേഷൻ (KTWDF) സംഘടിപ്പിച്ച 'ദക്ഷിണാമൂർത്തി സങ്കൽപം' സെമിനാർ ശ്രദ്ധേയമായി. ലോകഗുരുവായി ആരാധിക്കപ്പെടുന്ന ദക്ഷിണാമൂർത്തിയുടെ പ്രസക്തി, ശരിയായ ആരാധനാ രീതികൾ, അതുവഴിയുള്ള ഗുണങ്ങൾ എന്നിവ വിശദീകരിച്ച് സെമിനാർ ഭക്തർക്ക് വിജ്ഞാനപ്രദമായി.

കണ്ണൂർ ഡി.എം.ഒ.യും അഡീഷണൽ ഡയറക്ടറുമായ പീയൂഷ് എം. നമ്പൂതിരിപ്പാട് സെമിനാർ ഉദ്ഘാടനം ചെയ്തു. ശിവപ്രകാശ് വാരിയർ വിഷയത്തെക്കുറിച്ച് ആഴത്തിലുള്ള അവതരണം നടത്തി.

സത്യനാരായണൻ വേദപുരത്ത് അധ്യക്ഷത വഹിച്ച ചടങ്ങിൽ രാമചന്ദ്ര അയ്യർ, തന്ത്രി കാലടി പടിഞ്ഞാറേടത്ത് ശങ്കരൻ ഉണ്ണി നമ്പൂതിരിപ്പാട്, സദാനന്ദൻ കാരാട്ട്, ഡോ. അരുൺ രാജ്, ഡോ. നാറാസ് നാരായണൻ നമ്പൂതിരി, പി.എൻ. ഭവത്രാതൻ, കുട്ടികൃഷ്ണൻ നായർ, നാറാസ് ഇട്ടി രവി നമ്പൂതിരി, തെക്കിണിയേടത്ത് കൃഷ്ണൻ നമ്പൂതിരി, മോഹനൻ സുന്ദരൻ, രാവുണ്ണിക്കുട്ടി നായർ, മിത്രൻ മുകുന്ദൻ, രശ്മി സത്യൻ, ശാന്തി ഗോപി എന്നിവർ പ്രസംഗിച്ചു.

3000 ക്ഷേത്രങ്ങളിൽ ചന്ദനത്തോട്ടം: കെ.ടി.ഡബ്ല്യു.ഡി.എഫ്. പദ്ധതി

സംസ്ഥാനത്തെ 3000 ക്ഷേത്രങ്ങളിൽ ചന്ദനത്തോട്ടം നിർമിക്കുന്നതിനുള്ള വിപുലമായ പദ്ധതിക്ക് കേരള ടെമ്പിൾ വെൽഫെയർ ഡെവലപ്‌മെൻ്റ് ഫൗണ്ടേഷൻ തുടക്കമിട്ടു. 30,000 ചന്ദനത്തൈകൾ നട്ടുപിടിപ്പിക്കുന്ന ഈ പദ്ധതിയുടെ പരിപാലനം ക്ഷേത്രങ്ങളിലെ വനിതാ സ്വാശ്രയ സംഘങ്ങൾക്കാണ് ചുമതലപ്പെടുത്തിയിരിക്കുന്നത്.

ഈ പദ്ധതിയുടെ സംസ്ഥാനതല ഉദ്ഘാടനം ശുകപുരം ക്ഷേത്രത്തിൽ വെച്ച് തന്ത്രി കാലടി പടിഞ്ഞാറേടത്ത് ശങ്കരൻ ഉണ്ണി നമ്പൂതിരിപ്പാടും സദാനന്ദൻ കാരാട്ടും ചേർന്ന് നിർവഹിച്ചു. ക്ഷേത്രത്തിൽ കദളി വാഴത്തോട്ട നിർമാണത്തിനും ഇതോടൊപ്പം തുടക്കമായി.

 പുരസ്‌കാര സമർപ്പണവും മറ്റു ചടങ്ങുകളും

വിവിധ മേഖലകളിൽ മികവു തെളിയിച്ച പ്രതിഭകളെ ചടങ്ങിൽ ആദരിച്ചു.

• കവി സി.വി. ഗോവിന്ദൻ (ജ്യോതിഷം)
  
  
• പ്രൊഫ. ഭാരതി കുഞ്ഞുകുട്ടൻ (സംസ്കൃതം)
  
  
• തായമ്പക വിദഗ്ധൻ ശുകപുരം രാധാകൃഷ്ണൻ (വാദ്യകല)
  
  
• പി.വി. ഉണ്ണികൃഷ്ണൻ (ചിത്രകല)

ലക്ഷാർച്ചനയോടനുബന്ധിച്ച് ക്ഷേത്രത്തിൽ മഹാഭഗവതി സേവ, മഹാസർപ്പബലി തുടങ്ങിയ വിശേഷാൽ പൂജകളും നടന്നു. അമ്പലപ്പുഴ ശ്രീകൃഷ്ണസ്വാമി ക്ഷേത്രം തന്ത്രി കടിയക്കോൽ സുബ്രഹ്മണ്യൻ നമ്പൂതിരിപ്പാടിന്റെ മുഖ്യകാർമികത്വത്തിൽ മഹാഭഗവതി സേവയും, ശുകപുരം ക്ഷേത്രം തന്ത്രി കാലടി പടിഞ്ഞാറേടത്ത് ശങ്കരൻ ഉണ്ണി നമ്പൂതിരിപ്പാടിന്റെ കാർമികത്വത്തിൽ മഹാസർപ്പബലിയും നടന്നു.