ആലങ്കോട് പഞ്ചായത്തിൽ 'ഉത്രാടപ്പാച്ചിൽ': മൂന്ന് മുന്നണികളും തീവ്ര പോരാട്ടത്തിൽ

 ചങ്ങരംകുളം: തദ്ദേശ സ്വയംഭരണ തിരഞ്ഞെടുപ്പിന് മുന്നോടിയായുള്ള അവസാന ഞായറാഴ്ച, പന്താവൂരിൽ (ആലങ്കോട് ഗ്രാമ പഞ്ചായത്തിലെ 21-ാം വാർഡ്) കണ്ടത് ഉത്രാടപ്പാച്ചിലിന് സമാനമായ ആവേശക്കാഴ്ച. മൂന്ന് പ്രമുഖ രാഷ്ട്രീയ പാർട്ടികളുടെ സ്ഥാനാർത്ഥികളും തങ്ങളാണ് വിജയിക്കാൻ പോകുന്നതെന്ന് വോട്ടർമാരെ ബോധ്യപ്പെടുത്താൻ വോട്ടുചോദിച്ച് ഇറങ്ങിയതോടെ പ്രചാരണത്തിന് പൂരത്തിരക്കനുഭവപ്പെട്ടു. സാധാരണ ദിവസങ്ങളിൽ ജോലിയുള്ളവർക്ക് ഞായറാഴ്ച പൊതുവേ അവധിയായതിനാൽ, കഴിഞ്ഞ ദിവസങ്ങളിൽ ഒറ്റയ്ക്കും കുറഞ്ഞ പ്രവർത്തകരുമായി വീടുകൾ കയറിയിറങ്ങിയ സ്ഥാനാർത്ഥികൾ ഇന്ന് വൻ പ്രവർത്തക സംഘവുമായാണ് വോട്ടർമാരുടെ മുന്നിലെത്തിയത്.

വാതിലിലെ കോളിംഗ് ബെൽ അമർത്തുമ്പോൾ കാണുന്നത് ഒരു കൂട്ടം പ്രവർത്തകരെയാണ്. സ്ഥാനാർത്ഥിയും സംഘവും വോട്ടഭ്യർത്ഥിച്ച ശേഷം മടങ്ങുമ്പോൾ, "വ്യാഴാഴ്ച ചിഹ്നവും എന്നെയും മറക്കരുത്, ഞാൻ നിങ്ങളുടെ കൂടെയുണ്ടാകും" എന്ന ഉറപ്പും നൽകുന്നുണ്ട്. ഈ തീവ്രമായ അവസാനവട്ട പ്രചാരണം വാർഡിലെ വിജയസാധ്യതകളെ നിർണ്ണയിക്കുന്നതിൽ നിർണ്ണായകമാകും.

ഈ വാർഡിന് മുൻപ് ശക്തമായ രാഷ്ട്രീയ ചരിത്രമുണ്ട്. കഴിഞ്ഞ തവണ ഇടതുപക്ഷത്തിന്റെ നിംന ചെമ്പ്രയാണ് ഇവിടെ വിജയിച്ചത്. അതിനു മുമ്പ്, അഡ്വ. ലിജേഷ് ഐക്യ ജനാധിപത്യ മുന്നണിയുടെ (യു.ഡി.എഫ്.) സ്ഥാനാർത്ഥിയായി വിജയിക്കുകയും പഞ്ചായത്ത് വൈസ് പ്രസിഡന്റ് ആവുകയും ചെയ്തിരുന്നു. കഴിഞ്ഞ തവണ ഭാരതീയ ജനതാ പാർട്ടി (ബി.ജെ.പി.) സ്ഥാനാർത്ഥി പ്രസീന മോഹനൻ നേടിയെടുത്ത ഇരുനൂറ്റമ്പതോളം വോട്ടുകൾ, ഇത്തവണത്തെ സ്ഥാനാർത്ഥി രാഹുൽ വലിയറയിലും ബി.ജെ.പി. പ്രവർത്തകരിലും വലിയ വിജയപ്രതീക്ഷയാണ് ഉണ്ടാക്കിയിരിക്കുന്നത്.

ഇടതുപക്ഷത്തിന് ഈ തിരഞ്ഞെടുപ്പ് അഭിമാന പോരാട്ടമാണ്. സിറ്റിംഗ് സീറ്റ് നിലനിർത്തുക എന്ന ലക്ഷ്യത്തോടെയാണ് എൽ.ഡി.എഫ്. സ്ഥാനാർത്ഥി കക്കിടിക്കൽ പരമേശ്വരൻ തീവ്രമായി പ്രചാരണം നടത്തുന്നത്. അതേസമയം, കൈവിട്ടുപോയ വാർഡ് തിരിച്ചുപിടിക്കുക എന്ന അഭിമാന പ്രശ്നമാണ് യു.ഡി.എഫ്. സ്ഥാനാർത്ഥി കെ.വി. സിദ്ധിഖിനും പ്രവർത്തകർക്കുമുള്ളത്. എൽ.ഡി.എഫ്. സിറ്റിംഗ് സീറ്റ് നിലനിർത്താനും, യു.ഡി.എഫ്. വാർഡ് തിരിച്ചുപിടിക്കാനും, ബി.ജെ.പി. അവരുടെ വോട്ട് അടിത്തറയിൽനിന്ന് വിജയത്തിലെത്താനും തീവ്രമായ പോരാട്ടത്തിലാണ്.

വ്യാഴാഴ്ച പോളിംഗ് ബൂത്തിൽ രേഖപ്പെടുത്താൻ സാധ്യതയുള്ള ആയിരത്തി അറനൂറോളം വോട്ടുകളിൽ ആയിരത്തി മുന്നൂറിലധികം വോട്ടുകൾ രേഖപ്പെടുത്തിയാൽ, അത് ആർക്ക് അനുകൂലമാകും എന്ന ആകാംഷയിലാണ് പന്താവൂർ. എൽ.ഡി.എഫ്. സ്ഥാനാർത്ഥി കെ. പരമേശ്വരൻ നിലനിർത്തുമോ, യു.ഡി.എഫ്. സ്ഥാനാർത്ഥി സിദ്ധിഖ് വാർഡ് തിരിച്ചുപിടിക്കുമോ, അതോ ബി.ജെ.പി. സ്ഥാനാർത്ഥി രാഹുൽ അട്ടിമറി വിജയം നേടുമോ എന്ന ചോദ്യങ്ങൾക്കെല്ലാം ശനിയാഴ്ച വോട്ടെണ്ണൽ വരെ കാത്തിരിക്കേണ്ടിവരും.