ജല ഗുണനിലവാര പരിശോധന ലാബ് ആതവനാട് മർകസ് കോളേജിൽ ആരംഭിച്ചു

 കുറ്റിപ്പുറം — സംസ്ഥാന പൊലൂഷൻ കൺട്രോൾ ബോർഡിന്റെ അംഗീകാരത്തോടെ ആതവനാട് മർകസ് ആർട്സ് ആൻഡ് സയൻസ് കോളേജിൽ ആരംഭിച്ച ജല ഗുണനിലവാര പരിശോധനാ ലാബ്, സംസ്ഥാന പൊലൂഷൻ കൺട്രോൾ ബോർഡ് ചെയർപേഴ്സൺ എസ്. ശ്രീകല ഉദ്ഘാടനം ചെയ്തു.

പരിസര മലിനീകരണ നിയന്ത്രണ രംഗത്തെ സുപ്രധാന ചുവടുവെപ്പാണ് ഈ ലാബ്. ഉദ്ഘാടന ചടങ്ങിൽ കോളേജ് പ്രിൻസിപ്പാൾ ഡോ. സി.പി. മുഹമ്മദ് കുട്ടി അധ്യക്ഷത വഹിച്ചു.

പൊതുജനങ്ങൾക്ക് കുറഞ്ഞ നിരക്കിൽ സേവനം

പൊതുജനങ്ങൾക്ക് മിതമായ നിരക്കിൽ ജലപരിശോധനകൾ നടത്താൻ ലാബിൽ സൗകര്യമൊരുക്കിയിട്ടുണ്ട്. കൂടാതെ, പുറത്തുനിന്നുള്ള വിദ്യാർത്ഥികൾക്ക് അവരുടെ ശാസ്ത്രീയ പ്രോജക്റ്റുകൾ ചെയ്യുന്നതിനും ഈ അത്യാധുനിക ലാബ് പ്രയോജനപ്പെടുത്താം. പ്രദേശത്തെ ജലസ്രോതസ്സുകളുടെ ഗുണനിലവാരം ഉറപ്പാക്കുന്നതിനും ആരോഗ്യപരമായ ഒരു സമൂഹം കെട്ടിപ്പടുക്കുന്നതിനും ഈ സംരംഭം സഹായകമാകും.

ഉദ്ഘാടന ചടങ്ങിൽ ജില്ലാ എൻവിറോൺമെന്റ് എഞ്ചിനീയർ വരുൺ നാരായണൻ, ഐ.ക്യു.എ.സി കോഓർഡിനേറ്റർ ഫസീല, സ്റ്റാഫ് സെക്രട്ടറി ഡോ. പി.പി. ആരിഫ, യൂണിയൻ ചെയർമാൻ രോഹൻ ചുണ്ടയിൽ, ഐ.ഇ.ഡി.സി കോർഡിനേറ്റർ യാസർ അറാഫത്ത്, റിസർച്ച് പ്രമോഷൻ കൗൺസിൽ ഡയറക്ടർ ഡോ. വിമൽ കെ.പി, റിസർച്ച് ലാബ് കോർഡിനേറ്റർ ഡോ. പ്രണമ്യ എന്നിവർ ആശംസകൾ അർപ്പിച്ച് സംസാരിച്ചു.