യുക്രെയ്‌ൻ അഴിമതി വിവാദം: സെലെൻസ്കിയുടെ അടുത്ത അനുയായിക്കെതിരെ കേസ്

 കീവ് / ബ്രസ്സൽസ്: യുക്രെയ്ൻ പ്രസിഡന്റ് വ്‌ളാഡിമിർ സെലെൻസ്കിയുടെ അടുത്ത സഹായിക്കെതിരെ ഉയർന്ന ഞെട്ടിക്കുന്ന അഴിമതി ആരോപണത്തിന്റെ പശ്ചാത്തലത്തിൽ, വിഷയത്തിൽ യുക്രെയ്‌നിൽനിന്ന് കൃത്യമായ ഉറപ്പുകൾ തേടി യൂറോപ്യൻ യൂണിയൻ (EU). ഉന്നതതല അഴിമതി രാജ്യത്തിന്റെ പ്രതിച്ഛായയെ സാരമായി ബാധിക്കുമെന്നും സഹായധന വിനിയോഗം പുനഃപരിശോധിക്കേണ്ടി വരുമെന്നും യൂറോപ്യൻ യൂണിയൻ വൃത്തങ്ങൾ സൂചിപ്പിച്ചതായി പൊളിറ്റിക്കോ യൂറോപ്പ് റിപ്പോർട്ട് ചെയ്തു.

100 മില്യൺ ഡോളറിന്റെ കിക്ക്‌ബാക്ക് ആരോപണം

സെലെൻസ്കിയുടെ അടുത്ത അനുയായിയും മുൻ ബിസിനസ് പങ്കാളിയുമായ തിമൂർ മിൻഡിച്ചിനെതിരെയാണ് ഊർജ്ജ മേഖലയിലെ കരാറുകളിൽ 100 മില്യൺ ഡോളറിന്റെ (ഏകദേശം $800 കോടി രൂപ) കിക്ക്‌ബാക്ക് പദ്ധതിയുടെ ആരോപണം ഉയർന്നത്.യുക്രെയ്‌നിലെ അഴിമതി വിരുദ്ധ ഏജൻസികൾ ഈ തട്ടിപ്പ് പദ്ധതി തിങ്കളാഴ്ചയാണ് പുറത്തറിയിച്ചത്. എന്നാൽ, അറസ്റ്റ് ഒഴിവാക്കി മിൻഡിച്ച് രാജ്യം വിട്ടു.റഷ്യൻ വ്യോമാക്രമണങ്ങളിൽ നിന്ന് രാജ്യത്തിന്റെ ഊർജ്ജ ശൃംഖലയെ സംരക്ഷിക്കാൻ വൻതോതിൽ സാമ്പത്തിക സഹായം നൽകുന്ന പാശ്ചാത്യ രാജ്യങ്ങൾക്കിടയിൽ ഈ സംഭവം വലിയ ആശങ്കയുണ്ടാക്കിയിട്ടുണ്ട്.

യൂറോപ്യൻ യൂണിയന്റെ വിമർശനം

യുക്രെയ്‌നിലെ "സ്ഥിരമായ അഴിമതി" (endemic corruption) 'അരോചകമാണ്' എന്നും ഇത് രാജ്യത്തിന്റെ പ്രതിച്ഛായയ്ക്ക് സഹായകമാകില്ലെന്നും ഒരു യൂറോപ്യൻ യൂണിയൻ ഉദ്യോഗസ്ഥൻ പൊളിറ്റിക്കോയോട് പ്രതികരിച്ചു. യുക്രെയ്‌നിന്റെ ഊർജ്ജ മേഖലയിൽ യൂറോപ്യൻ കമ്മീഷൻ ചെലവഴിക്കുന്ന ഫണ്ടുകൾ എങ്ങനെയാണ് വിനിയോഗിക്കുന്നത് എന്നതിൽ കൂടുതൽ ശ്രദ്ധയും സുതാര്യതയും ആവശ്യമാണെന്നും ഈ ഉദ്യോഗസ്ഥൻ കൂട്ടിച്ചേർത്തു.

അഴിമതി പരിഹരിക്കാനുള്ള ഒരു വ്യക്തമായ പദ്ധതിയിലൂടെ സെലെൻസ്കി എല്ലാവർക്കും ആശ്വാസം നൽകേണ്ടതുണ്ടെന്ന് മറ്റൊരു ഇ.യു. സർക്കാർ ഉദ്യോഗസ്ഥൻ അഭിപ്രായപ്പെട്ടു. സഹായം കൂടുതൽ പരിഷ്കരണങ്ങളെ ആശ്രയിച്ചിരിക്കുമെന്ന് മുൻ യുക്രേനിയൻ ഉദ്യോഗസ്ഥൻ പ്രതീക്ഷ പ്രകടിപ്പിച്ചു.

ജർമ്മനിയുടെ നിലപാട്

ജർമ്മൻ ചാൻസലർ ഫ്രീഡ്രിക്ക് മെർസ് ഈ ആഴ്ച സെലെൻസ്കിയുമായി നടത്തിയ ടെലിഫോൺ സംഭാഷണത്തിൽ, അഴിമതി വിരുദ്ധ നടപടികളും പരിഷ്കരണങ്ങളും മുന്നോട്ട് കൊണ്ടുപോകാൻ യുക്രെയ്ൻ തയ്യാറാകണമെന്ന് ബെർലിൻ പ്രതീക്ഷിക്കുന്നതായി അറിയിച്ചു.

സെലെൻസ്കിയുടെ പ്രതിച്ഛായയ്ക്ക് മങ്ങൽ

2019-ലെ തിരഞ്ഞെടുപ്പിൽ അഴിമതി വിരുദ്ധ പ്ലാറ്റ്‌ഫോമിൽ വിജയിച്ച സെലെൻസ്കിയുടെ പ്രതിച്ഛായക്ക് ആഭ്യന്തരമായും അന്തർദേശീയമായും ഈ വിവാദം വലിയ കോട്ടമുണ്ടാക്കി. മുൻപും, പ്രമുഖ അഴിമതി വിരുദ്ധ ഏജൻസികളുടെ (NABU, SAPO) സ്വാതന്ത്ര്യം നിയന്ത്രിക്കാൻ അദ്ദേഹം ശ്രമിച്ചത് പ്രതിഷേധങ്ങൾക്ക് ഇടയാക്കുകയും പിന്നീട് അദ്ദേഹം ആ തീരുമാനത്തിൽ നിന്ന് പിന്മാറുകയും ചെയ്തിരുന്നു.

മിൻഡിച്ചിനും അദ്ദേഹത്തിന്റെ ബിസിനസ് പങ്കാളി അലക്സാണ്ടർ സുകർമാനുമെതിരെ വ്യാഴാഴ്ച സെലെൻസ്കി ഉപരോധം ഏർപ്പെടുത്തിയിട്ടുണ്ട്. ഇരുവരും ഇസ്രായേലി പാസ്‌പോർട്ട് കൈവശമുള്ളവരാണ്.