കോർപ്പറേഷൻ പോര് കടുക്കുന്നു: തിരുവനന്തപുരത്ത് കെ.എസ്. ശബരീനാഥനെ കളത്തിലിറക്കാൻ കോൺഗ്രസ്

 തിരുവനന്തപുരം കോർപ്പറേഷൻ തെരഞ്ഞെടുപ്പിൽ കരുത്ത് തെളിയിക്കുന്നതിനായി മുൻ എം.എൽ.എയും കെ.പി.സി.സി. ജനറൽ സെക്രട്ടറിയുമായ കെ.എസ്. ശബരീനാഥനെ മത്സരിപ്പിക്കാൻ കോൺഗ്രസ് നേതൃത്വത്തിൽ ധാരണ. ഇന്ന് ഡി.സി.സി. ഓഫീസിൽ ചേർന്ന കോർ കമ്മിറ്റി യോഗത്തിലാണ് സുപ്രധാന തീരുമാനം കൈക്കൊണ്ടത്.

കവടിയാർ വാർഡിൽനിന്നാകും ശബരീനാഥൻ ജനവിധി തേടുക. അദ്ദേഹത്തിന്റെ വീട് സ്ഥിതി ചെയ്യുന്ന ശാസ്തമംഗലം വാർഡ് വനിതാ സംവരണമായതിനാലാണ് തൊട്ടടുത്ത വാർഡായ കവടിയാറിനെ തെരഞ്ഞെടുത്തത്. തിരുവനന്തപുരം കോർപ്പറേഷന്റെ ചുമതലയുള്ള കെ. മുരളീധരൻ ഇക്കാര്യം സ്ഥിരീകരിച്ചു.

 ജനകീയ നേതാക്കളെ ഇറക്കാൻ എ.ഐ.സി.സി. നിർദേശം

ബി.ജെ.പിക്ക് വ്യക്തമായ സ്വാധീനമുള്ള കോർപ്പറേഷനിൽ ജനകീയരും മുതിർന്നവരുമായ നേതാക്കളെ മത്സരിപ്പിക്കണമെന്ന എ.ഐ.സി.സി. നിർദേശത്തെ തുടർന്നാണ് മുൻ എം.എൽ.എയെ കോൺഗ്രസ് കളത്തിലിറക്കുന്നത്. മൂന്നാം സ്ഥാനത്തുള്ള കോർപ്പറേഷനിൽ പരമാവധി സീറ്റുകൾ പിടിച്ചെടുക്കുക എന്ന ലക്ഷ്യത്തോടെയാണ് ഈ നീക്കം.

ശബരീനാഥനെ മുൻനിർത്തിയുള്ള പ്രചാരണത്തിലൂടെ നഗരത്തിലെ യുവാക്കളെയും വിദ്യാസമ്പന്നരെയും ആകർഷിക്കാൻ കഴിയുമെന്നാണ് കോൺഗ്രസ് നേതൃത്വത്തിന്റെ കണക്കുകൂട്ടൽ. കെ.പി.സി.സി. ഭാരവാഹികൾ, കെ.എസ്.യു., യൂത്ത് കോൺഗ്രസ് ഭാരവാഹികൾ എന്നിവരും കോർപ്പറേഷനിൽ മത്സരിക്കുമെന്നും കെ. മുരളീധരൻ അറിയിച്ചു.

സ്ഥാനാർഥി പ്രഖ്യാപനവും പ്രചാരണവും

പരമാവധി യുവാക്കൾക്ക് അവസരം നൽകിക്കൊണ്ടും, മണ്ഡലം പ്രസിഡന്റുമാർ അടക്കമുള്ള പരിചയസമ്പന്നരെ പരിഗണിച്ചുകൊണ്ടുമാകും സ്ഥാനാർഥി പട്ടിക പ്രഖ്യാപിക്കുക. ഘടകകക്ഷികൾക്ക് വിട്ടുകൊടുക്കേണ്ടതില്ലെന്ന് ഉറപ്പുള്ള 48 വാർഡുകളിലെ സ്ഥാനാർഥികളെക്കുറിച്ച് തീരുമാനമായിട്ടുണ്ട്. ചില സീറ്റുകളിൽ കൂടി അന്തിമധാരണയായ ശേഷം ആദ്യഘട്ട സ്ഥാനാർഥി പട്ടിക ഞായറാഴ്ച രാത്രിയോ തിങ്കളാഴ്ചയോ പുറത്തുവിടും.

തിങ്കളാഴ്ച ആരംഭിക്കുന്ന, കെ. മുരളീധരൻ നയിക്കുന്ന വാഹന പ്രചാരണ ജാഥയ്ക്ക് മുന്നോടിയായി സ്ഥാനാർഥികളെ പ്രഖ്യാപിക്കാനാണ് പാർട്ടി ശ്രമം. 101 വാർഡുകളിലൂടെയും കടന്നുപോകുന്ന ജാഥയിൽ എല്ലാ വാർഡുകളിലും പൊതുയോഗങ്ങൾ സംഘടിപ്പിക്കും.

നിലവിൽ യു.ഡി.എഫിന് കോർപ്പറേഷനിൽ ആകെ 10 സീറ്റുകൾ മാത്രമാണുള്ളത് (കോൺഗ്രസ് 8, ഘടകകക്ഷികൾ 2). വീണ എസ്. നായർ, എം.എസ്. അനിൽ കുമാർ, ജി.വി. ഹരി എന്നിവരുൾപ്പെടെയുള്ളവരോട് മത്സരിക്കാൻ നേതൃത്വം ആവശ്യപ്പെട്ടതായും സൂചനയുണ്ട്.