പാലത്തായി പീഡനക്കേസ്; കെ. പത്മരാജന് ജീവപര്യന്തവും 40 വർഷം അധിക തടവും; 2 ലക്ഷം പിഴയും

 തലശ്ശേരി: പാനൂർ പാലത്തായിയിൽ നാലാംക്ലാസ് വിദ്യാർത്ഥിനിയെ ലൈംഗികമായി പീഡിപ്പിച്ച കേസിൽ അധ്യാപകനും BJP നേതാവുമായ കെ. പത്മരാജന് തലശ്ശേരി അതിവേഗ പ്രത്യേക കോടതി ജീവപര്യന്തം തടവും 40 വർഷം അധിക തടവും ശിക്ഷ വിധിച്ചു. ആകെ രണ്ട് ലക്ഷം രൂപ പിഴയും പ്രതി അടയ്ക്കണം.

കഴിഞ്ഞ ദിവസം കേസിൽ പത്മരാജൻ കുറ്റക്കാരനാണെന്ന് കോടതി കണ്ടെത്തിയിരുന്നു. തൃപ്രങ്ങോട്ടൂർ പഞ്ചായത്ത് മുൻ പ്രസിഡന്റും കടവത്തൂർ മുണ്ടത്തോട്ടെ കുറുങ്ങാട്ട് ഹൗസിൽ താമസക്കാരനുമായ കെ. പത്മരാജനെയാണ് (52) ജഡ്ജി എ.ടി. ജലജാറാണി ശിക്ഷിച്ചത്.

ശിക്ഷാവിധി വിശദാംശങ്ങൾ

• ജീവപര്യന്തം തടവ്: ബലാത്സംഗ കുറ്റത്തിന് ജീവപര്യന്തം തടവ്.
  
  
• അധിക തടവും പിഴയും: പോക്സോ കേസ് പ്രകാരം രണ്ട് വകുപ്പുകളിലായി 40 വർഷം അധിക തടവും ഒരു ലക്ഷം രൂപ വീതം ആകെ രണ്ട് ലക്ഷം രൂപ പിഴയും അടക്കണം.
  
  
• പിഴ അടച്ചില്ലെങ്കിൽ ഒരു വർഷം കൂടി അധിക തടവ് അനുഭവിക്കണമെന്നും കോടതി വിധിച്ചു.
  
  
• 12 വയസ്സിന് താഴെയുള്ള കുട്ടിയെ ഒന്നിൽ കൂടുതൽ തവണ പീഡിപ്പിച്ചതിന് പോക്സോ നിയമത്തിലെ വിവിധ വകുപ്പുകൾ പ്രകാരവും ബലാത്സംഗം ചെയ്തതിന് ഇന്ത്യൻ ശിക്ഷാനിയമത്തിലെ വിവിധ വകുപ്പുകൾ പ്രകാരവുമാണ് പ്രതി കുറ്റക്കാരനാണെന്ന് കോടതി കണ്ടെത്തിയത്.
  
  
• പ്രോസിക്യൂഷനുവേണ്ടി സ്പെഷ്യൽ പ്രോസിക്യൂട്ടർ പി.എം. ഭാസുരി ഹാജരായി.

കേസിന്റെ വഴിത്തിരിവുകൾ

2020 ജനുവരിക്കും ഫെബ്രുവരിക്കുമിടയിൽ സ്കൂളിലെ ശൗചാലയത്തിൽ കൊണ്ടുപോയി കുട്ടിയെ മൂന്നുതവണ ലൈംഗികമായി പീഡിപ്പിച്ചെന്നാണ് കേസ്. ചൈൽഡ് ലൈനിലാണ് പീഡനവിവരം ആദ്യമായി ലഭിച്ചത്. തുടർന്ന് 2020 മാർച്ച് 17-ന് പാനൂർ പോലീസ് കേസെടുക്കുകയും ഏപ്രിൽ 15-ന് പ്രതിയെ പിടികൂടുകയും ചെയ്തു.

കേസ് പിന്നീട് ക്രൈംബ്രാഞ്ചും പ്രത്യേക അന്വേഷണ സംഘവും അന്വേഷിച്ചു. ക്രൈംബ്രാഞ്ച് ഐ.ജി.യായിരുന്ന എസ്. ശ്രീജിത്ത് ഫോൺ സംഭാഷണത്തിൽ പ്രതിയെ അനുകൂലിച്ച് സംസാരിച്ചതായുള്ള വെളിപ്പെടുത്തൽ വിവാദമായതിനെത്തുടർന്ന്, പെൺകുട്ടിയുടെ മാതാവ് ഹൈക്കോടതിയെ സമീപിക്കുകയായിരുന്നു. ഇതേത്തുടർന്ന് അന്വേഷണത്തിന് പ്രത്യേക സംഘത്തെ ചുമതലപ്പെടുത്തി. തീരമേഖലാ എ.ഡി.ജി.പി. ഇ.ജെ. ജയരാജൻ, അസി. കമ്മീഷണർ ടി.കെ. രത്നകുമാർ എന്നിവരുടെ നേതൃത്വത്തിലുള്ള പ്രത്യേക സംഘമാണ് 2021 മേയിൽ പോക്സോ വകുപ്പുകൾ ഉൾപ്പെടുത്തി അന്തിമ കുറ്റപത്രം കോടതിയിൽ സമർപ്പിച്ചത്.