SIR നടപടി ;ബംഗ്ലാദേശ് പൗരന്മാർ മടങ്ങുന്നു

 ഹാക്കിംപുർ (പശ്ചിമ ബംഗാൾ): പശ്ചിമ ബംഗാളിലെ ബസീർഹട്ടിലുള്ള ഹാക്കിംപുർ ചെക്ക്പോസ്റ്റിലൂടെ ബംഗ്ലാദേശിലേക്ക് മടങ്ങാൻ കാത്തിരിക്കുന്നത് നൂറുകണക്കിന് ആളുകളാണ്. നിലവിൽ നടക്കുന്ന സ്പെഷ്യൽ ഇൻ്റൻസീവ് റിവിഷൻ (എസ്.ഐ.ആർ.) നടപടികൾ ഉണ്ടാക്കിയ ആശങ്കയാണ് ഈ കൂട്ട പലായനത്തിന് കാരണമായി റിപ്പോർട്ട് ചെയ്യപ്പെടുന്നത്. ഇതിനിടയിൽ, അനധികൃത കുടിയേറ്റക്കാർക്ക് ഇന്ത്യൻ പൗരത്വ രേഖകളും സർക്കാർ ആനുകൂല്യങ്ങളും ലഭിച്ചിരുന്നുവെന്ന ഞെട്ടിക്കുന്ന വെളിപ്പെടുത്തലുകൾ പുറത്തുവന്നു.

ഇന്ത്യൻ രേഖകൾ ലഭിച്ച ബംഗ്ലാദേശ് പൗര:

ബംഗ്ലാദേശ് പൗരയാണെന്ന് അവകാശപ്പെടുന്ന റുഖിയ ബിഗം എന്ന സ്ത്രീക്ക് ഇന്ത്യൻ വോട്ടർ ഐഡിയും ആധാർ കാർഡും ലഭിച്ചിരുന്നതായി ന്യൂസ് 18 റിപ്പോർട്ട് ചെയ്യുന്നു. ആറ് വർഷം മുൻപാണ് താൻ ഇന്ത്യയിൽ എത്തിയതെന്നും സാൾട്ട് ലേക്കിലാണ് താമസിച്ചിരുന്നതെന്നും റുഖിയ ബിഗം വെളിപ്പെടുത്തി. താൻ വോട്ട് ചെയ്തിട്ടുണ്ട് എന്നും എന്നാൽ 2002-ലെ വോട്ടർ പട്ടികയിൽ തന്റെ പേരില്ലാത്തതിനാലാണ് മടങ്ങുന്നതെന്നും ഇവർ പറഞ്ഞു. കൂടാതെ, ഇന്ത്യയിൽ താമസിച്ചിരുന്ന കാലയളവിൽ തനിക്ക് സർക്കാർ ആനുകൂല്യങ്ങൾ ലഭിച്ചിരുന്നു എന്നും ഇവർ അവകാശപ്പെട്ടു.

സത്ഖിരയിൽ നിന്നുള്ള അൻവാര ബീഗം എന്ന മറ്റൊരു സ്ത്രീയും മടങ്ങാനായി കാത്തിരിക്കുന്നവരിൽ ഉണ്ട്. നോർത്ത് 24 പർഗാനാസിലെ ഡൺലോപ്പിന് സമീപം മൂന്ന് വർഷം രേഖകളില്ലാതെയാണ് താമസിച്ചിരുന്നതെന്നും, എസ്.ഐ.ആർ. നടപടികൾ ആരംഭിച്ചതോടെയാണ് തിരികെ പോകാൻ തീരുമാനിച്ചതെന്നും ഇവർ വ്യക്തമാക്കി.

കൂട്ടപലായനത്തിന് കാരണം എസ്.ഐ.ആർ. നടപടികൾ:

കഴിഞ്ഞ നാല് ദിവസമായി നൂറുകണക്കിന് ആളുകളാണ് പശ്ചിമ ബംഗാളിൽ നിന്ന് അതിർത്തി ചെക്ക്പോസ്റ്റിലൂടെ ബംഗ്ലാദേശിലേക്ക് മടങ്ങാനായി തടിച്ചുകൂടിയിരിക്കുന്നത്. ഈ ആളുകളിൽ പലരും ഇന്ത്യയിൽ അനധികൃതമായി പ്രവേശിച്ചവരാണെന്ന് പരസ്യമായി സമ്മതിക്കുന്നുണ്ട്. നിലവിൽ നടക്കുന്ന സ്പെഷ്യൽ ഇൻ്റൻസീവ് റിവിഷൻ നടപടികൾ സൃഷ്ടിച്ച ഭയവും അനിശ്ചിതത്വവുമാണ് ഇവർ കൂട്ടത്തോടെ മടങ്ങാനുള്ള കാരണം.

രേഖകളില്ലാത്ത വിദേശ പൗരന്മാർക്ക് ഇന്ത്യൻ വോട്ടർ ഐഡിയും ആധാർകാർഡും ലഭിച്ചതെങ്ങനെയെന്നുള്ള ചോദ്യങ്ങൾക്ക് ആക്കം കൂട്ടുന്നതാണ് അതിർത്തിയിലെ ഈ വെളിപ്പെടുത്തലുകൾ. വിഷയത്തിൽ ഔദ്യോഗിക പ്രതികരണങ്ങൾക്കായി അധികൃതരെ ബന്ധപ്പെടാൻ ശ്രമം തുടരുകയാണ്.