ഓർമകളിൽ ഇതേ ദിവസം.. 25-ാം വർഷത്തിലേക്ക് കടന്ന് പ്രധാനമന്ത്രി നരേന്ദ്ര മോദി...!

ന്യൂഡൽഹി; സർക്കാരിന്റെ തലവനായി 25-ാം വർഷത്തിലേക്ക് കടന്ന് പ്രധാനമന്ത്രി നരേന്ദ്ര മോദി. 2001ൽ ഗുജറാത്ത് മുഖ്യമന്ത്രിയായി ആദ്യമായി സത്യപ്രതിജ്ഞ ചെയ്തത് ഈ ദിവസമാണെന്ന് അദ്ദേഹം എക്സിലെ പോസ്റ്റിൽ കുറിച്ചു.

ജനങ്ങളുടെ ജീവിതം മെച്ചപ്പെടുത്തുകയും മഹത്തായ ഈ രാഷ്ട്രത്തിന്റെ പുരോഗതിക്കു സംഭാവന നൽകുകയും ചെയ്യുക എന്നതു തന്റെ നിരന്തര പരിശ്രമമാണെന്നും ജനങ്ങളോടു നന്ദിയുണ്ടെന്നും അദ്ദേഹം പറഞ്ഞു.

ഗുജറാത്തിൽ തുടർച്ചയായി നടന്ന മൂന്ന് നിയമസഭാ തിരഞ്ഞെടുപ്പുകളിൽ ബിജെപിയെ വിജയത്തിലേക്കു നയിച്ച മോദി, ബിജെപിയുടെ നേതൃത്വത്തിലുള്ള എൻഡിഎ സഖ്യത്തെ തുടർച്ചയായ മൂന്നു ദേശീയ തിരഞ്ഞെടുപ്പുകളിലും വിജയത്തിലേക്കു നയിച്ചു.

ഭരണാധികാരി എന്ന നിലയിൽ മോദിക്ക് ഒരിക്കലും തിരഞ്ഞെടുപ്പ് പരാജയം നേരിടേണ്ടി വന്നിട്ടില്ല. പ്രധാനമന്ത്രിമാരിൽ, മുഖ്യമന്ത്രിയായി പന്ത്രണ്ടര വർഷത്തിലേറെ ഉൾപ്പെടെ, ഒരു സർക്കാരിന്റെ തലവനായി ഏറ്റവും കൂടുതൽ കാലം സേവനം അനുഷ്ഠിച്ച റെക്കോർഡും അദ്ദേഹത്തിനുണ്ട്.